កីឡាអន្តរជាតិ
អន្តរជាតិ
ជាការដឹងគុណ ក្លិបបាល់ទាត់កំពូលមួយនៅអ៊ីស្រាអែល ដាក់ឈ្មោះលោក «ត្រាំ»
× ក្លិបកីឡាបាល់ទាត់ Beitar Jerusalem F.C នៃលីកកំពូលអ៊ីស្រាអែល បានប្តូរឈ្មោះទៅជា Beitar Trump Jerusalem F.C វិញ ដើម្បីជាការអបអរដល់ប្រធានាធិបតីអាមេរិក ដូណាល់ ត្រាំ ដែលបានផ្លាស់ប្តូរទីតាំងស្ថានទូតអេមេរិកប្រចាំនៅអ៊ីស្រាអែលទៅកាន់ទីក្រុងហ្ស៊េរុយសាឡិម។
សារព័ត៌មាន Theguardian បានផ្សាយថា ស្របពេលក្រុងហ្ស៊រុយសាឡិមបានរៀបចំពិធីសម្ពោធស្ថានទូតអាមេរិកថ្មីរបស់ខ្លួននៅថ្ងៃចន្ទទី១៤ ខែឧសភានេះ ក្រុមកីឡាបាល់ទាត់ដ៏ល្បីឈ្មោះបំផុតប្រចាំនៅទីក្រុងនេះបានប្រកាសថាខ្លួនបានប្តូរឈ្មោះក្លិបដើម្បីជាការផ្តល់កិត្តិយសដល់លោកត្រាំ។
កាលពីខែធ្នូកន្លងទៅ ប្រធានាធិបតីអាមេរិករូបនេះប្រកាសប្ដូរទីតាំងស្ថានទូតអាមេរិកពីទីក្រុងតែលអាវីវទៅកាន់ទីក្រុងហ្ស៊េរុយសាឡិមវិញ ដែលធ្វើឲ្យជនជាតិប៉ាឡេស្ទីន នៅជុំវិញពិភពលោកផ្ទុះប្រតិកម្មយ៉ាងខ្លាំង ប៉ុន្តែលោកហៅការសម្រេចចិត្តនេះជាការទទួលស្គាល់ការពិតប៉ុណ្ណោះ។
ក្លិប Beitar Jerusalem បានសរសេរនៅលើទំព័រហ្វេសប៊ុកផ្លូវការរបស់ខ្លួនថា៖«អស់រយៈពេល ៧០ឆ្នាំមកហើយដែលទីក្រុងហ្ស៊េរុយសាឡិមបានកំពុងរង់ចាំការទទួលស្គាល់ជាអន្តរជាតិរហូតដល់ប្រធានាធិបតីដូណាល់ ត្រាំ មានចិត្តអង់អាចក្លាហានហ៊ានទទួលស្គាល់ទីក្រុងមួយនេះជារបស់អ៊ីស្រាអែល។ លោក Trump បានបង្ហាញភាពក្លាហាននិងក្ដីស្រលាញ់ពិតប្រាកដចំពោះប្រជាជនអ៊ីស្រាអែល និងរដ្ឋធានីរបស់ពួកគេហើយសព្វថ្ងៃនេះប្រទេសដទៃទៀតកំពុងដើរតាមការដឹកនាំរបស់លោកក្នុងការផ្តល់ឲ្យក្រុងហ្ស៊េរុយសាឡិមនូវឋានៈត្រឹមត្រូវរបស់ខ្លួន ... ប្រធានក្លិបលោក Eli Tabib និងនាយកប្រតិបត្តិ លោក Eli Ohana បានសម្រេចចិត្តបន្ថែមឈ្មោះរបស់ក្លិបនេះឲ្យមានឈ្មោះTrump ដែលលោកបានបង្កើតប្រវត្តិសាស្ត្រសម្រាប់អ៊ីស្រាអែល ហើយចាប់ពីពេលនេះទៅក្លិបនឹងត្រូវគេហៅថា Beitar Trump Jerusalem វិញ»។
តែយ៉ាងណាក៏ដោយ គេនៅមិនទាន់ច្បាស់ទេថា តើការផ្លាស់ប្តូរឈ្មោះនេះជាអចិន្ត្រៃយ៍នោះឡើយ។
ក្រុម Beitar ធ្លាប់ឈ្នះជើងឯកពានរង្វាន់លំដាប់កំពូលអ៊ីស្រាអែល Israel Premier League ៦លើក ហើយបច្ចុប្បន្នកំពុងស្ថិតក្នុងចំណាត់ថ្នាក់ទី ២ ក្នុងតារាង៕
Tag:
បាល់ទាត់
ដូណាល់ ត្រាំ
អាមេរិក
អ៊ីស្រាអែល
ហ្ស៊េរុយសាឡិម
© រក្សាសិទ្ធិដោយ thmeythmey.com