ជាតិ
បោះឆ្នោត
×![]()
ដោយ: សារព័ត៌មានថ្មីៗ
គណបក្សប្រជាធិបតេយ្យមូលដ្ឋាន (GDP) ចាប់បានលំដាប់លេខរៀងទី៧ លើសន្លឹកឆ្នោត ដែលពីមុនជាលេខរបស់គណបក្សសង្គ្រោះជាតិ។ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំពិធីចាប់ឆ្នោត ដើម្បីកំណត់លំដាប់លេខរៀងគណបក្សនយោបាយលើសន្លឹកឆ្នោត ដែលមានសម្តេចសង្ឃទាំងពីរគណៈ ជាអ្នកចាប់ នៅព្រឹកថ្ងៃទី២៩ ខែឧសភា ឆ្នាំ២០១៨។
លោក ហេង សំអ៊ន ប្រធាននាយកដ្ឋានកិច្ចការបោះឆ្នោតនៃគណបក្សប្រជាធិបតេយ្យមូលដ្ឋាន ដែលទៅចូលរួមក្នុងពិធីចាប់លេខរៀង បានឆ្លៀតផ្តល់បទសម្ភាសដល់អ្នកសារព័ត៌មានថ្មីៗថា ការចាប់បានលេខ៧នេះ គឺជាគុណសម្បតិ្តមួយ ដែលធ្វើឲ្យប្រជាពលរដ្ឋ ឆាប់ស្គាល់គណបក្សប្រជាធិបតេយ្យមូលដ្ឋាន ពីព្រោះលេខនេះ ធ្លាប់តំណាងឲ្យគណបក្សសង្គ្រោះជាតិ។ បើតាមការយល់ឃើញរបស់លោក អារម្មណ៍របស់អ្នកបោះឆ្នោតមួយចំនួន អាចគិតថា គណបក្សប្រជាធិបតេយ្យមូលដ្ឋាន ដែលពេលនេះ មានលេខ៧ជាតំណាង នឹងដើរតួជំនួសគណបក្សសង្គ្រោះជាតិ។
លោក និយាយយ៉ាងដូច្នេះថា៖«លេខ៧ ស្រួលបង្ហាញទៅប្រជាពលរដ្ឋ ដូចជាយើងលើកម្រាមដៃចំនួន៧ ជាដើម។ ហើយលេខ៧ហ្នឹង អាចជួយបានខ្លះដែរ អាចធ្វើឲ្យប្រជាពលរដ្ឋស្គាល់ ដោយសារតែមានប្រជាជនប្រហែល៣លាននាក់ ស្គាល់លេខ៧ចាស់ [គណបក្សសង្គ្រោះជាតិ] អ៊ីចឹងលេខ៧ថ្មី [គណបក្សប្រជាធិបតេយ្យមូលដ្ឋាន] ពួកគាត់ អាចនឹងស្គាល់ដែរ។ យើង អាចនឹងបានសំឡេងខ្លះពីអតីតគណបក្សសង្គ្រោះជាតិ និងពីអ្នកគាំទ្រគណបក្សប្រជាជន ព្រោះគោលនយោបាយរបស់យើងល្អ»។
យ៉ាងណាក៏ដោយ លោក ហេង សំអ៊ន អះអាងថា ការប្រជែងយកអាសនៈរដ្ឋសភា មិនមែនពឹងផ្អែកលើលេខរៀងនោះទេ។ លោក បញ្ជាក់ថា គោលនយោបាយ និងការដឹកនាំរបស់គណបក្ស ទើបជាអ្វីដែលត្រូវយកទៅប្រកួតប្រជែងក្នុងការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។
កាលពីបោះឆ្នោតឆ្នាំ២០១៣ លេខ៧ មានប្រជាប្រិយភាពខ្លាំងណាស់ សម្រាប់អ្នកគាំទ្រគណបក្សសង្គ្រោះជាតិ។ កាលនោះ លេខ៧នេះ គឺតំណាងឲ្យអតីតគណបក្សសង្គ្រោះជាតិ។
លទ្ធផលនៃការចាប់លេខរៀងគណបក្សលើសន្លឹកឆ្នោត សម្រាប់ការបោះឆ្នោតឆ្នាំ២០១៨ បង្ហាញថា គណបក្សខ្មែររួបរួមជាតិ លេខរៀងទី១ គណបក្សមាតុភូមិយើង លេខរៀងទី២ គណបក្សពន្លឺថ្មី លេខរៀងទី៣ គណបក្សសញ្ជាតិកម្ពុជា លេខរៀងទី៤ គណបក្សខ្មែរក្រោក លេខរៀងទី៥ គណបក្សសំបុកឃ្មុំសង្គមប្រជាធិបតេយ្យ លេខរៀងទី៦ គណបក្សប្រជាធិបតេយ្យមូលដ្ឋាន លេខរៀងទី៧ គណបក្សសាធារណរដ្ឋប្រជាធិបតេយ្យ លេខរៀងទី៨ គណបក្សរស្មីខេមរា លេខរៀងទី៩ គណបក្សសម្ព័ន្ធដើម្បីប្រជាធិបតេយ្យ លេខរៀងទី១០ គណបក្សខ្មែរសាធារណរដ្ឋ លេខរៀងទី១១ គណបក្សខ្មែរឈប់ក្រ លេខរៀងទី១២ គណបក្សហ្វ៊ុនស៊ិនប៉ិច លេខរៀងទី១៣ គណបក្សខ្មែរអភិវឌ្ឍន៍សេដ្ឋកិច្ច លេខរៀងទី១៤ គណបក្សយុវជនកម្ពុជា លេខរៀងទី១៥ គណបក្សធម្មាធិបតេយ្យ លេខរៀងទី១៦ គណបក្សឆន្ទៈខ្មែរ លេខរៀងទី១៧ គណបក្សជនជាតិដើមប្រជាធិបតេយ្យកម្ពុជា លេខរៀងទី១៨ គណបក្សខ្មែរតែមួយ លេខរៀងទី១៩ និងគណបក្សប្រជាជនកម្ពុជា លេខរៀងទី២០៕
Tag:
បោះឆ្នោត
GDP
ហេង សំអ៊ន
© រក្សាសិទ្ធិដោយ thmeythmey.com
