ភ្នំពេញ៖ សម្តេចនាយករដ្ឋមន្ត្រី ហ៊ុន សែន ហាក់ធុញទ្រាន់នឹងបរទេសមួយចំនួន ដែលនៅតែបង្គាប់ឲ្យកម្ពុជា ធ្វើនេះ ឬធ្វើនោះ។ ប្រមុខរដ្ឋាភិបាលរូបនេះ ចង់ឲ្យបរទេសទាំងនោះ ឈប់លូកមាត់លូកកពីរឿងផ្ទៃក្នុងរបស់កម្ពុជា ជាពិសេសពាក់ព័ន្ធនឹងការបោះឆ្នោត ដែលនឹងឈានមកដល់ នៅរយៈពេលតែ៦០ថ្ងៃទៀត។
សម្តេច ហ៊ុន សែន លើកឡើងថា បរទេសអាចបញ្ចេញយោបល់បានជុំវិញការបោះឆ្នោត។ ប៉ុន្តែ នាយករដ្ឋមន្ត្រីកម្ពុជា សង្កត់ធ្ងន់ថា បរទេសទាំងនោះ មិនអាចធ្វើសេចក្តីសម្រេចជំនួសប្រជាពលរដ្ឋ លើដំណើរការបោះឆ្នោតជាដាច់ខាត។
ធ្វើជាអធិបតីក្នុងពិធីពិសាអាហារស្រាយបួសជាមួយបងប្អូនខ្មែរ-ឥស្លាមប្រមាណជិត៥ពាន់នាក់ មកពីទូទាំងប្រទេស នៅល្ងាចថ្ងៃទី២៩ ខែឧសភា ឆ្នាំ២០១៨នេះ សម្តេច ហ៊ុន សែន បានរម្លឹកពីវិនាសកម្មដ៏ធ្ងន់ធ្ងរ ដែលកម្ពុជាធ្លាប់ជួបប្រទះ ដោយសារតែការលូកដៃរបស់បរទេស។ សម្តេច ហ៊ុន សែន ប្រកាសថា សូម្បីរហូតមកដល់ពេលនេះ ក៏មានបរទេសខ្លះ នៅតែចង់បំផ្លិចបំផ្លាញកម្ពុជា។
មេដឹកនាំកម្ពុជារូបនេះ ផ្ញើសារទៅកាន់បរទេសទាំងឡាយ ដែលចូលចិត្តធ្វើអន្តរាគមន៍មកលើផ្ទៃក្នុងរបស់កម្ពុជា យ៉ាងដូច្នេះថា៖«ខ្ញុំគ្រាន់តែមានបំណងរម្លឹកអំពីអតីតកាលរបស់កម្ពុជា ដែលមានការឈឺចាប់។ វា គ្រប់គ្រាន់ណាស់ទៅហើយ។ សូមកុំបំផ្លាញយើងទៀត។ សូមមេត្តាគោរពដល់សេចក្តីសម្រេចរបស់យើងខ្ញុំ។ ខ្ញុំអត់មានសូមអ្វីទេ។ ខ្ញុំ ចង់ឲ្យតែប្រទេសកម្ពុជា មានសិទ្ធិគ្រប់គ្រាន់ក្នុងការធ្វើសេចក្តីសម្រេចក្នុងឋានៈជារដ្ឋឯករាជ្យ និងមានអធិបតេយ្យភាពប៉ុណ្ណោះ»។
បន្ទាប់ពីដាស់តឿនបរទេសរួចហើយ សម្តេច ហ៊ុន សែន ក៏ឆ្លៀតនិយាយទៅកាន់គណបក្ស១៩ទៀត ដែលចូលរួមប្រកួតប្រជែងយកអាសនៈរដ្ឋសភា សម្រាប់នីតិកាលទី៦នេះ នៅថ្ងៃទី២៩ ខែកក្កដា ឆ្នាំ២០១៨។ ប្រធានគណបក្សកាន់អំណាចរូបនេះ ប្រាប់ទៅគណបក្សទាំងនោះថា ទោះជាទទួលបានអាសនៈប៉ុន្មានក៏ដោយ ក៏ត្រូវតែគោរពការសម្រេចចិត្តរបស់ប្រជាពលរដ្ឋ តាមរយៈការបោះឆ្នោត។
សហគមន៍អន្តរជាតិខ្លះ មិនសូវសាទរនោះទេ ចំពោះការបោះឆ្នោតក្នុងនីតិកាលនេះ ដ្បិតគណបក្សសង្គ្រោះជាតិ មិនបានចូលរួម។ ពួកគេ យល់ថា ការបោះឆ្នោត ដែលអវត្តមានគណបក្សប្រឆាំងបែបនេះ នឹងមិនមានភាពស្របច្បាប់ និងមិនប្រព្រឹត្តទៅតាមគន្លងប្រជាធិបតេយ្យឡើយ។
លើសពីនេះ លោកស្រី រ៉ូណា ស្មីត អ្នករាយការណ៍ពិសេសរបស់អង្គសហប្រជាជាតិ បានហៅការបោះឆ្នោត ដែលអវត្តមានគណបក្សប្រឆាំងធំជាងគេ ថាមិនមែនជាការបោះឆ្នោតពិតប្រាកដនោះទេ។
ចំណែកឯលោក សម រង្ស៊ី និងក្រុមប្រឆាំងនៅក្រៅប្រទេស បានអំពាវនាវម្តងហើយម្តងទៀត មកកាន់ប្រជាពលរដ្ឋនៅកម្ពុជា កុំឲ្យទៅបោះឆ្នោតនាពេលខាងមុខ។ លោក សម រង្ស៊ី ប្រាប់ប្រជាពលរដ្ឋថា ការបោះឆ្នោត ដែលគ្មានគណបក្សប្រឆាំង ថាជាការបោះឆ្នោតក្លែងក្លាយ។
ស្ថាប័នមានសមត្ថកិច្ច អះអាងថា ការអំពាវនាវរបស់ក្រុមប្រឆាំង គឺស្មើនឹងការរារាំងប្រជាពលរដ្ឋមិនឲ្យទៅបោះឆ្នោត ដែលជាទង្វើខុសនឹងច្បាប់។ រដ្ឋាភិបាលកម្ពុជា បានព្រមានចាត់វិធាការផ្លូវច្បាប់ចំពោះក្រុមប្រឆាំង ដែលបន្តការអំពាវនាវមិនឲ្យប្រជាពលរដ្ឋទៅបោះឆ្នោត៕