ជាតិ
បោះឆ្នោត
អ្នកនាំពាក្យ៖ តំណាងរាស្ត្រ ត្រូវគោរពក្រមសីលធម៌ថ្មី ដើម្បីចៀសវាងការមានទោស
× ភ្នំពេញ៖ គណៈកម្មការធិការអចិន្ត្រៃយ៍រដ្ឋសភា បានចេញសេចក្តីសម្រេច ស្ដីពី «ក្រមសីលធម៌របស់តំណាងរាស្ត្រ» ដើម្បីឲ្យតំណាងរាស្ត្រគ្រប់គណបក្សនយោបាយគោរពឲ្យបានត្រឹមត្រូវ សម្រាប់នីតិកាលទី៦ខាងមុខ។ តំណាងរាស្ត្រ ដែលមិនគោរពក្រមសីលធម៌ថ្មីនេះ នឹងត្រូវមានទោស។
អ្នកនាំពាក្យរដ្ឋសភាលោក ឡេង ប៉េងឡុង បាននិយាយថា មូលហេតុដែលរដ្ឋសភា សម្រេចដាក់ចេញ«ក្រមសីលធម៌របស់តំណាងរាស្ត្រ» ដើម្បីពង្រឹងកិត្តិយស និងសេចក្ដីថ្លៃថ្នូររបស់តំណាងរាស្ត្រ ក្នុងឋានៈជាអ្នកបំពេញការងារក្នុងស្ថាប័នកំពូលមួយ។ ថ្លែងប្រាប់សារព័ត៌មានថ្មីៗ លោក ឡេង ប៉េងឡុង បានបញ្ជាក់ដូច្នេះថា៖ «តំណាងរាស្ត្រខ្លះកន្លងមកមានអាកប្បកិរិយាមិនសមរម្យវាជារឿងមួយដែរ តែវាមិនមែនជារឿងធំទេ។ មូលហេតុដែលយើងចេញក្រមសីលធម៌នេះ គឺដើម្បីឲ្យសមស្រប តាមសភានៅក្នុងពិភពលោកដែលសុទ្ធតែមានក្រមសីលធម៌»។
បន្ថែមពីនេះលោក ឡេង ប៉េងឡុង បានសង្កត់ធ្ងន់ថា ច្បាប់ក្រមសីលធម៌ថ្មី ដែលបានដកស្រង់ខ្លឹមសារពីច្បាប់នានាមកនេះ នឹងដាក់ពិន័យ ឬអនុវត្តទោសលើតំណាងរាស្ត្ររូបណា ដែលបានធ្វើខុសពីក្រមសីលធម៌ដែលបានចែង។ អ្នកនាំពាក្យរូបនេះ បានបញ្ជាក់ដូច្នេះថា៖«ក្រមសីលធម៌នេះមិនត្រូវបានកំណត់ពីទោសទណ្ឌឡើយ ប៉ុន្តែតំណាងរាស្ត្រណាដែរប្រព្រឹត្តិខុសនិងក្រមសីលធម៌ គឺដូចជាខុសនិងច្បាប់កំពូលៗរបស់កម្ពុជាផងដែរ»។
«ក្រមសីលធម៌របស់តំណាងរាស្ត្រ»ថ្មីនេះ នឹងត្រូវអនុវត្តចាប់ពីថ្ងៃទី៣០ ខែឧសភា ឆ្នាំ២០១៨ តទៅ បន្ទាប់ពីមានក្រុមតំណាងរាស្ត្រស្នើដាក់សេចក្ដីព្រាងអស់រយៈពេលប្រមាណ៣ខែ។ សេចក្ដីសម្រេចនេះ ក៏ត្រូវបានគាំទ្រដោយក្រុមតំណាងរាស្ត្រមកពី ៤គណបក្ស ដែលមាននៅក្នុងរដ្ឋសភាបច្ចុប្បន្ន។ នេះបើតាមលោក ឡេង ប៉េងឡុង បណ្ដាប្រទេសផ្សេងៗសុទ្ធសឹងតែមានក្រមសីលធម៌របស់អ្នកតំណាងរាស្ត្រដែរ។
«ក្រមសីលធម៌របស់តំណាងរាស្ត្រ» នេះ ត្រូវបានរដ្ឋសភាសម្រេចចំនួន៩ចំណុច រួមមាន៖ ទី១ តំណាងរាស្ត្រត្រូវមានឆន្ទៈមោះមុត ប្ដូរផ្ដាច់ រួបរួមគ្នាពង្រឹងឯកភាពជាតិ ផ្អែកលើប្រព័ន្ធប្រជាធិបតេយ្យ សេរីពហុបក្ស គោរពសិទ្ធិមនុស្ស និងគោលការណ៍ច្បាប់ដោយម៉ឹងម៉ាត់។ ទី២ ក្នុងពេលប្រតិបត្តិការក្នុងមុខតំណែងរបស់ខ្លួន តំណាងរាស្ត្រមិនត្រូវធ្វើសកម្មភាពណា ទោះដោយផ្ទាល់ក្តី ដោយប្រយោលក្តី ដែលនាំឲ្យប៉ះពាល់ដល់ផលប្រយោជន៍ជាតិ និងប្រជាពលរដ្ឋឡើយ។ តំណាងរាស្ត្រត្រូវតម្កល់ផលប្រយោជន៍របស់ប្រជារាស្ត្រ ប្រជាជាតិ និងមាតុភូមិកម្ពុជាជាធំ។ នៅគ្រប់កាលៈទេសៈត្រូវទុកផលប្រយោជន៍ទៅទៅខ្ពស់ជាងផលប្រយោជន៍បុគ្គល និងបក្ខពួក។ ទី៣ តំណាងរាស្ត្រត្រូវមានសេរីភាព ឯករាជ្យភាព ក្នុងការបំពេញការងារក្នុងនីតិកាលរបស់ខ្លួន ដោយមិនចំណុះផ្នែកហិរញ្ញវត្ថុ សម្ភារៈ និងស្មារតី ជាមួយគ្រប់បុគ្គល និងមិនចំណុះបរទេស។ ទី៤ តំណាងរាស្ត្រមានកាតព្វចូលរួមក្នុងការប្រជុំ រក្សាវប្បធម៌នៃការសន្ទនា ការបញ្ចេញមតិ និងកិច្ចការរួមរបស់រដ្ឋសភា។ ទី៥ តំណាងរាស្ត្រត្រូវធានាឲ្យបាននូវឥរិយាបថថ្លៃថ្នូរ សុជីវធម៌ សីលធម៌ល្អ គោរពតួនាទី និងភារកិច្ចរបស់ខ្លួន។ ទី៦ តំណាងរាស្ត្រ ត្រូវប្រកាន់សុចរិតភាព ដោយមិនត្រូវយល់ព្រម ឬទទួលនូវគ្រប់រូបភាពនូវផលប្រយោជន៍សម្ភារ ហិរញ្ញវត្ថុ និងស្មារតី ដើម្បីជួយភាគីអ្នកជួយនោះទេ។ ទី៧ តំណាងរាស្ត្រ ត្រូវតម្កល់ជានិច្ចនូវចិត្តស្មោះត្រង់ ដោយមិនត្រូវស្ថិតនៅក្នុងទំនាស់ផលប្រយោជន៍។ ទី៨ តំណាងរាស្ត្រ មិនត្រូវមានភាពក្រអឹតក្រទម តែត្រូវថែរក្សាជានិច្ច នូវភាពសាមញ្ញ រម្យទមសុភាពរាបសា និងចុងក្រោយ ក្នុងឋានៈជាតំណាងរបស់ប្រជាពលរដ្ឋ តំណាងរាស្ត្រគ្រប់រូប ត្រូវតាំងចិត្តថា មិនកេងប្រវ័ញ្ចផលប្រយោជន៍ជាតិ សម្រាប់ផ្ទាល់ខ្លួន ឬសម្រាប់គ្រួសារ ឬសម្រាប់បក្ខពួក ឬសម្រាប់ភាគីរៀងៗខ្លួន។
ក្រមសីលធម៌នេះ ត្រូវបានដកស្រង់ចេញពី រដ្ឋធម្មនុញ្ញ, ច្បាប់ស្ដីពី លក្ខន្តិកៈតំណាងរាស្ត្រ និងច្បាប់ស្ដីពីគណបក្សនយោបាយ, និងបទបញ្ជាផ្ទៃក្នុងរដ្ឋសភា។ នេះបើតាមសេចក្ដីសម្រេចរបស់សម្ដេច ហេង សំរិន ប្រធានរដ្ឋសភា នៅថ្ងៃទី៣០ ខែឧសភា ឆ្នាំ២០១៨៕
Tag:
រដ្ឋសភា
តំណាងរាស្ត្រ
ច្បាប់ថ្មី
សេចក្ដីព្រាងច្បាប់
© រក្សាសិទ្ធិដោយ thmeythmey.com