ជាតិ
បោះឆ្នោត
លោក ខឹម វាសនា៖ ពង្រីកគំនិតទៅកាន់ពលរដ្ឋ មានប្រយោជន៍ជាងការវាយប្រហារ ឬលើកតម្កើងលេខរៀងបក្ស
× គណបក្សសម្ព័ន្ធដើម្បីប្រជាធិបតេយ្យ (LDP) ដែលដាក់បេក្ខភាពទាំង២៥ខេត្ត-រាជធានី ស្ថិតនៅលំដាប់លេខរៀងទី១០ក្នុងសន្លឹកឆ្នោតសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ខាងមុខ។ ខណៈដែលតំណាងបក្សជាច្រើនបានលើកឡើងពីលក្ខខណ្ឌវិជ្ជមានទាក់ទងនឹងលំដាប់លេខរៀងរបស់ខ្លួន ប្រធានបក្ស LDP លោក ខឹម វាសនា យល់ថា មិនមានប្រយោជន៍អ្វីឡើយក្នុងការវាយប្រហារ ឬលើកតម្កើង។
«មិនមានអ្វីជាប្រយោជន៍អ្វីទេរឿងវាយប្រហារ ឬលើកតម្កើងលេខរៀងគណបក្សនយោបាយនោះ។ ធ្វើការងារពង្រីកគំនិតយើងទៅកាន់ពលរដ្ឋទៅ នោះទើបជាការងារត្រឹមត្រូវរបស់យើង»។ នេះបើតាមសំណេររបស់លោក ខឹម វាសនា ប្រតិកម្មទៅលើរូបភាពមួយដែលបានចាត់ទុក LDP ថាជាមាសទឹក១០ ដូចទៅនឹងចំណងជើងបទចម្រៀងរបស់លោក ស៊ីន ស៊ីសាមុត។
តាមរយៈហ្វេសប៊ុករបស់ខ្លួន ដដែល លោក ខឹម វាសនា បានលើកឡើងពីករណីបញ្ជីឈ្មោះបេក្ខជននៅក្នុងបក្សរបស់ខ្លួន។ មេបក្សរូបនេះ បានបញ្ជាក់ថា៖ «ស្ទើរគ្រប់បេក្ខជនឈរឈ្មោះលេខលើក្បាលបញ្ជីឈរឈ្មោះក្នុងតារាងបេក្ខជនតំណាងរាស្ត្រទាំងអស់គ្រប់ខេត្តក្រុងរបស់ LDP ដែលបានបញ្ជូនទៅគជបថ្មីៗនេះ ខ្ញុំសុទ្ធតែបាននិយាយពន្យល់សុំអោយពួកគេព្រមទទួលយកអំរែកនេះទៅ»។
លោកបានគូសបញ្ជាក់ថា អ្នកខ្លះបានប្រកែកទំរាំព្រមទទួលយកអំរែក ហើយលោកមើលឃើញអ្នកខ្លះ សរសេរថា មិនយុត្តិធម៌ទាក់ទងនឹងលេខរៀងបេក្ខភាព។ លោកលើកឡើងថា៖ «មនុស្សនេះនៅមានអារម្មណ៍ថាតួនាទីតំណាងរាស្ត្រជាអ្វីដែលបានមកខ្លួន មិនមែនជាអំរែក ឬការទទួលខុសត្រូវដែលជាទម្ងន់ទេ ហើយខ្ញុំបានចំណាំមុខអ្នកនោះជាប់ដោយកំណត់ក្នុងចិត្តថា មនុស្សនេះដាច់ខាតមិនអាចប្រគល់មុខនាទីណាមួយទៅឲ្យឡើយ»។
លោក ខឹម វាសនា ដែលបានដកខ្លួនចេញពីបញ្ជីបេក្ខភាពតំណាងរាស្ត្រនោះ បានលើកឡើងថា ក្នុងនាមជាប្រមុខដែលជាតំណាងឲ្យមនុស្សក្នុងបក្សទាំងមូល ការសម្រេចទាំងឡាយដែលមិនភ្ជាប់ផលប្រយោជន៍ផ្ទាល់ខ្លួន លោកមិនដែលខ្លាចការប្រឆាំងតបណាមួយពីសមាជិកឬអ្នកគាំទ្ររបស់ខ្លួនឡើយ៕
© រក្សាសិទ្ធិដោយ thmeythmey.com