ជាតិ
សេដ្ឋកិច្ច
កម្ពុជាទទួលបានថវិកា ៦៤លានដុល្លារ ពីមូលនិធិអន្តរជាតិសម្រាប់អភិវឌ្ឍន៍កសិកម្ម រូបភាព បានពីក្រសួងសេដ្ឋកិច្ច និងហិរញ្ញវត្ថុ
× មូលនិធិអន្តរជាតិ សម្រាប់អភិវឌ្ឍន៍កសិកម្ម (IFAD) បានផ្តល់ថវិកាចំនួន ៦៤លានដុល្លារ ដល់កម្ពុជា។ ក្នុងចំនួនថវិកានេះ មាន១២លានដុល្លារ សម្រាប់បន្ថែមលើគម្រោងដែលកំពុងអនុវត្ត និង ៥២លានដុល្លារទៀត សម្រាប់គម្រោងថ្មី ដែលផ្តោតលើការជំរុញ «ទីផ្សារកសិកម្ម និងកសាងហេដ្ឋា រចនាសម្ព័ន្ធ កសិកម្ម និងជនបទ» ដោយគ្រោងអនុវត្តពីឆ្នាំ ២០១៩-២០២១។
ចំនួនថវិកាខាងលើ ដែលផ្តល់ឲ្យកម្ពុជា បានធ្វើឡើងក្នុងជំនូប រវាង រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន ជាមួយ លោក ណាយជែល ប្រេត(Nigel Brett) នាយកប្រចាំតំបន់អាស៊ី និងប៉ាស៊ីហ្វិក របស់មូលនិធិអន្តរជាតិ សម្រាប់អភិវឌ្ឍន៍កសិកម្ម (IFAD) ធ្វើឡើងនៅថ្ងៃទី២៩ ខែឧសភា ឆ្នាំ២០១៨ នៅទីស្តីការ ក្រសួងសេដ្ឋកិច្ច និងហិរញ្ញវត្ថុ។
លោក ណាយជែល ប្រេត បានវាយតម្លៃខ្ពស់ចំពោះរាជរដ្ឋាភិបាលកម្ពុជា ដែលបានដឹកនាំ និងគ្រប់គ្រងលើ ការអនុវត្តគម្រោងក្រោមក្របខ័ណ្ឌហិរញ្ញប្បទានរបស់ IFAD ប្រកបដោយជោគជ័យ និងប្រសិទ្ធភាពខ្ពស់។ បន្ថែមពីនេះ IFAD នឹងសហការជិតស្និទ្ធ ជាមួយរាជរដ្ឋាភិបាលកម្ពុជា ដើម្បីរៀបចំក្របខ័ណ្ឌយុទ្ធសាស្ត្រ ក្នុងកិច្ចសហប្រតិបត្តិការផ្តល់ហិរញ្ញប្បទានថ្មីសម្រាប់ឆ្នាំ ២០២១-២០២៦ ក្នុងទំហំហិរញ្ញប្បទានធំជាងមុន ។
ជាមួយនឹងគ្នានេះ លោក អូន ព័ន្ធមុនីរ័ត្ន បានសង្កត់ធ្ងន់ ចំពោះទិសដៅយុទ្ធសាស្ត្រនៃក្របខណ្ឌកិច្ចសហប្រតិបត្តិការ IFAD សម្រាប់ពេលខាងមុខ គឺមិនត្រឹមតែផ្តោតលើផលិតកម្មដើម្បី សន្តិសុខស្បៀងប៉ុណ្ណោះទេ ពោលផ្តោតលើ « ការលើកកម្ពស់ផលិតភាពកសិកម្ម ពាណិជ្ជូបនីយកម្ម និងពិពិធកម្មកសិកម្ម » ដើម្បីលើកស្ទួយជីវភាព និងវិបុលភាពរបស់ប្រជាកសិករកម្ពុជា៕
Tag:
អូន ព័ន្ធមុនីរ័ត្ន
ណាយជែល ប្រេត
IFAD
© រក្សាសិទ្ធិដោយ thmeythmey.com