ជាតិ
អតីតអ្នកកាសែតអាស៊ីសេរី ត្រូវបានហៅទៅសួររឿងមួយទៀត ជុំវិញការផលិតវីដេអូអាសអាភាស លោក អ៊ួន ឈិន (ខាងឆ្វេង) លោក យាង សុជាមេត្តា (ខាងស្ដាំ)។ រូបពីហ្វេសប៊ុកលោក អ៊ួន ឈិន
× លោក អ៊ួន ឈិន និងលោក យាង សុជាមេត្តា អតីតអ្នកកាសែតនៃវិទ្យុអាស៊ីសេរី ត្រូវមន្ត្រីពន្ធនាគារ ដឹកទៅឲ្យលោក ពេជ្រ វិជ្ជាធរ ចៅក្រមស៊ើបសួរនៃសាលាដំបូងរាជធានីភ្នំពេញ នៅព្រឹកថ្ងៃទី៣១ ខែឧសភា ឆ្នាំ២០១៨នេះ ដើម្បីឆ្លើយបំភ្លឺករណីមួយបន្ថែមទៀត គឺការផលិតវីដេអូអាសអាភាស។
លោក កែវ វ៉ាន្នី មេធាវីរបស់អ្នកទាំងពីរ បានប្រាប់សារព័ត៌មានថ្មីៗតាមទូរសព្ទថា លោក ក៏បានចូលរួមស្តាប់ការសាកសួរនោះដែរ។ ប៉ុន្តែ លោក មិនអាចបង្ហើបបានឡើយ ជុំវិញសំណួរនិងចម្លើយ រវាងកូនក្តី និងចៅក្រមស៊ើបសួរ ដោយលោក អះអាងថា ជានីតិវិធី ដែលមិនអាចបង្ហាញដល់សាធារណជន។
ការផលិតវីដេអូអាសអាភាស គឺជាបទល្មើសទីពីរ ដែលលោក អ៊ួន ឈិន និងលោក យាង សុជាមេត្តា ត្រូវចោទប្រកាន់។ កន្លងមក អ្នកទាំងពីរ ត្រូវបានហៅទៅសួរតែបទល្មើសទីមួយប៉ុណ្ណោះ គឺបទប្រគល់ឲ្យបរទេសនូវព័ត៌មានជាអាទិ ដែលធ្វើឲ្យអន្តរាយដល់ការការពារជាតិ ក្រោយតុលាការ រកឃើញថាបានដំឡើងប្រព័ន្ធផ្សព្វផ្សាយ និងផលិតព័ត៌មាន ហើយបញ្ជូនទៅឲ្យស្ថាប័នរបស់ខ្លួន ដែលមានមូលដ្ឋាននៅរដ្ឋធានីវ៉ាស៊ីតោននៃសហរដ្ឋអាមេរិក។
បច្ចុប្បន្ន សំណុំរឿងរបស់ពួកគេ ក៏ស្ថិតក្នុងដៃតុលាការកំពូលដែរ។ មេធាវី បានដាក់បណ្តឹងសាទុក្ខ នៅតុលាការកំពូល ដើម្បីសុំឲ្យដោះលែងកូនក្តីជាបណ្តោះអាសន្ន។
កន្លងមក មេធាវី បានដាក់សំណើនេះជាហូរហែ ទាំងនៅសាលាដំបូងរាជធានីភ្នំពេញ និងសាលាឧទ្ធរណ៍។ ប៉ុន្តែ សំណើសុំនៅក្រៅឃុំទាំងប៉ុន្មានលើកនោះ សុទ្ធតែត្រូវបានច្រានចោល។
មកដល់ពេលនេះ លោក អ៊ួន ឈិន និងលោក យាង សុជាមេត្តា បានជាប់ឃុំលើសពី៦ខែហើយ៕
Tag:
តុលាការ
អាស៊ីសេរី
មេធាវី
© រក្សាសិទ្ធិដោយ thmeythmey.com