មនុស្សស្លាប់និងរបួស១៤៣នាក់ ខណៈផ្ទះជាង២ពាន់ខ្នងរងការខូចខាត ដោយសារគ្រោះធម្មជាតិ ក្នុងរយៈពេល៥ខែ

ជាតិ

សង្គមជាតិ

មនុស្សស្លាប់និងរបួស១៤៣នាក់ ខណៈផ្ទះជាង២ពាន់ខ្នងរងការខូចខាត ដោយសារគ្រោះធម្មជាតិ ក្នុងរយៈពេល៥ខែ

02, Jun 2018 , 2:02 pm

រូបភាព

ដោយ:

ភ្នំពេញ៖ មនុស្សស្លាប់ និងរងរបួស១៤៣នាក់ ខណៈផ្ទះសម្បែងរងការខូចខាត២២៧៩ខ្នង ដោយសារគ្រោះមហន្តរាយធម្មជាតិ ដែលបានកើតឡើង១០៧លើក ក្នុងរយៈពេល៥ខែ ដើមឆ្នាំ២០១៨នេះ។

តាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ថា គ្រាន់តែភ្លៀងលាយខ្យល់កន្ត្រាក់ នៅខែឧសភាកន្លងមក បានកើតឡើង ៥៤លើក ដែលបានធ្វើឲ្យខូចខាតផ្ទះដួលរំលំធ្ងន់ធ្ងរ ២៨៣ខ្នង និងខូចខាតមធ្យម ៩៩៨ខ្នង រួមទាំងសាលារៀន ៦អាគារ ។ គ្រោះធម្មជាតិនេះ ក៏បានបណ្ដាលឲ្យប្រជាពលស្លាប់១ម្នាក់ និងរបួស ២៩នាក់។

ចំណែកឯប្រជាពលរដ្ឋស្លាប់ដោយសាររន្ទះបាញ់ ៤៣នាក់ និងរបួស ៣៤នាក់ ហើយនិងគោក្របីងាប់ ៥៤ក្បាល។ នេះបើតាមលោក កែវ វី ដែលបានបន្ថែមថា ករណីរន្ទះបាញ់មនុស្សស្លាប់ក្នុងខែឧសភា មានការកើនឡើងប្រមាណ៣០ភាគរយបើធៀបរយៈពេលដូចគ្នាទៅឆ្នាំមុន។

អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយរូបនេះ បានបញ្ជាក់ថា ការផ្លាស់ប្តូរពីរដូវប្រាំង ទៅរដូវវស្សា ជារៀងរាល់ឆ្នាំ គឺតែងតែកើតមាននូវខ្យល់ព្យុះ ផ្គររន្ទះ ជាពិសេសចន្លោះខែមេសា ទៅខែមិថុនា ។

ងាកមកបញ្ហាទឹកជំនន់តាមទន្លេមេគង្គវិញ លោក កែវ វី បានបញ្ជាក់ដូច្នេះថា៖ «នៅខែឧសភា មានចលនាទឹកបានឡើងបន្តិចតាមរយៈភ្លៀងធ្លាក់។ ប៉ុន្តែបើជំនន់ខ្លាំងគឺចាប់ពីខែកក្កដា។ ឆ្នាំនេះនៅស្ថានីយចតុមុខ ទឹកអាចឡើង ១០.០៥ម៉ែត្រ កម្រិតនេះមិនទាន់ដល់ការប្រកាសប្រុងប្រយ័ត្នទេគ្រាន់តែជាជំនន់ធំធម្មតា ប៉ុន្តែបើទឹកឡើងដល់ ១០.៥០ម៉ែត្រទើបអាចប្រកាសអាសន្ន»។

បើតាមអ្នកនាំពាក្យរូបនេះ រដ្ឋាភិបាលបានត្រៀមបម្រុងនូវអង្ករ ១០,០០០តោន ស្រូវពូជ ២ពាន់តោន និងគ្រាប់បន្លែចម្រុះប្រភេទ ៥តោន ដើម្បីផ្គត់ផ្គង់ដល់ប្រជាពលរដ្ឋដែលរងគ្រោះមហន្តរាយធម្មជាតិ៕