ជាតិ
សង្គមជាតិ
កម្ពុជា ស្ថិតក្នុងប្រទេសបំបែកឯកត្តករពិភពលោក ដែលសម្រេចគោលដៅប្រយុទ្ធប្រឆាំងមេរោគអេដស៍
រូបភាព បានពីក្រសួងសេដ្ឋកិច្ច និងហិរញ្ញវត្ថុ
×![]()
ភ្នំពេញ៖ កម្ពុជាបានក្លាយជាប្រទេសមួយ ក្នុងចំណោមប្រទេសទាំង៧ លើពិភពលោក ដែលសម្រេចបាននូវគោលដៅ ប្រយុទ្ធប្រឆាំងមេរោគអេដស៍ តាមផែនការរបស់ UNAIDS ។ នេះជាការបញ្ជាក់របស់លោក អេមុន មើហ្វី (Eamonn Murphy) នាយកគ្រប់គ្រងប្រចាំតំបន់អាស៊ី-ប៉ាស៊ីហ្វិករបស់កម្មវិធីអង្គការសហប្រជាជាតិ ទទួលបន្ទុកប្រយុទ្ធប្រឆាំងមេរោគអេដស៍ (UNAIDS) ក្នុងជំនួបជាមួយ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោក អូន ព័ន្ធមុនីរ័ត្ន កាលពីថ្ងៃទី៣០ ខែឧសភា។
លោក អេមុន មើហ្វី បានបញ្ជាក់ថា UNAIDS នឹងបន្តគាំទ្រកម្ពុជា លើការងារប្រយុទ្ធប្រឆាំងមេរោគអេដស៍ និងផ្តល់កិច្ចសហការពេញលេញ ដើម្បីគាំទ្រការអនុវត្ត «កម្មវិធីប្រយុទ្ធប្រឆាំងមេរោគអេដស៍ និងរបេងនៅកម្ពុជា ឆ្នាំ២០១៨ -២០២០» ជាហិរញ្ញប្បទានដោយមូលនិធិសកល ឲ្យកាន់តែជោគជ័យបន្ថែមទៀត។
នាយកគ្រប់គ្រងប្រចាំតំបន់អាស៊ី-ប៉ាស៊ីហ្វិក បានបញ្ជាក់ដូច្នេះថា៖ «កម្ពុជាបានក្លាយជាប្រទេសមួយ ក្នុងចំណោមប្រទេសទាំង៧ លើពិភពលោក ដែលបំបែកឯកត្តកម្ម សម្រេចបាននូវគោលដៅ ប្រយុទ្ធប្រឆាំងមេរោគអេដស៍»។
រដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរ័ត្ន បានបញ្ជាក់ថា ថ្វីត្បិតការប្រយុទ្ធប្រឆាំងមេរោគអេដស៍នៅកម្ពុជា មានវឌ្ឍនភាពគួរឲ្យកត់សម្គាល់ក៏ពិតមែន ប៉ុន្តែកិច្ចការប្រយុទ្ធប្រឆាំងនឹងមេរោគអេដស៍នេះ នៅតែបន្តអនុវត្ត ព្រោះជាការងារដែលពាក់ព័ន្ធនឹង ការកែប្រែឥរិយាបទរបស់បុគ្គល។
ជាមួយគ្នានេះ រដ្ឋាភិបាលកម្ពុជា កំពុងតៀមខ្លួនឆ្លើយតប ចំពោះនិន្នាការធ្លាក់ចុះនៃថវិកាពីដៃគូ ដោយកំពុងរៀបចំ «យុទ្ធសាស្ត្រអន្តរកាល» ដែលមានលក្ខណប្រយ័ត្នប្រយែង, ប្រទាក់ក្រឡា និងគ្រប់ជ្រុងជ្រោយ ។
«យុទ្ធសាស្ត្រ អន្តរកាល» នេះ គឺគិតគូរឡើងវិញអំពីវិធីសាស្ត្រនៃការធ្វើអន្តរាគមន៍, នីតិវិធី និងយន្តការគ្រប់គ្រង និងការអនុវត្ត ដើម្បីធានាបាននូវប្រសិទ្ធភាពចំណាយខ្ពស់ជាមុន និងពិនិត្យលទ្ធភាពបង្កើនថវិការដ្ឋទៅតាមលទ្ធភាពដែលមានជាក់ស្តែង៕
Tag:
ភ្នំពេញ
អូន ព័ន្ធមុនីរ័ត្ន
អេមុន មើហ្វី
UNAIDS
© រក្សាសិទ្ធិដោយ thmeythmey.com
