ជាតិ
នយោបាយជាតិ
សម្ដេច ហ៊ុន សែន ប្រាប់ឲ្យសមាជិកបក្សបម្រើប្រជាពលរដ្ឋឲ្យល្អ ជាងលាបពណ៌ថា ពួកគេជាក្រុមប្រឆាំង
× ភ្នំពេញ៖
សម្ដេចនាយករដ្ឋមន្ត្រី ហ៊ុន សែន ប្រាប់ឲ្យសមាជិកគណបក្សប្រជាជនកម្ពុជាទាំងអស់ ឲ្យបំពេញសកម្មភាព និងបម្រើផលប្រយោជន៍ប្រជាពលរដ្ឋឲ្យបានល្អត្រឹមត្រូវ ចៀសវាងការដើរបង្កបញ្ហា ហើយចោទពលរដ្ឋថា ជាក្រុមប្រឆាំង។
សម្ដេច ហ៊ុន សែន ដែលបានដឹងព័ត៌មាននេះ បានរំឭកដល់មន្ត្រី និងសមាជិកបក្សខ្លួន ឲ្យមានកែប្រែរាល់ចំណុច ដែលធ្លាប់បង្កភាពថ្នាំងថ្នាក់ជាមួយប្រជាពលរដ្ឋនោះ មកជាការបំពេញការងារឲ្យបានល្អ ក្នុងនាមជាអ្នកបម្រើផលប្រយោជន៍ដល់ប្រជាពលរដ្ឋវិញ។
បើតាមសារព័ត៌មានFresh News ដែលបានស្រងសម្ដីប្រមុខរដ្ឋាភិបាល ក្នុងពិធីសម្ពោធទីស្នាក់ការគណបក្សប្រជាជនកម្ពុជា នៅក្នុងស្រុកត្បូងឃ្មុំ នៅថ្ងៃទី០២ ខែមិថុនានេះ បានបញ្ជាក់ដូច្នេះថា៖« មានក្រុមការងារពង្រឹង នៅតាមមូលដ្ឋានខ្លះទៀត មិនបង្កបញ្ហាដល់ប្រជាពលរដ្ឋនៅកន្លែងខ្លួនចុះពង្រឹងការងារទេ តែបែរជាទៅបង្កបញ្ហាជាមួយប្រជាពលរដ្ឋ នៅតំបន់ផ្សេងទៅវិញ។នៅមានមេភូមិ មេឃុំខ្លះទៀត បង្កបញ្ហាថ្នាំងថ្នាក់ជាមួយប្រជាពលរដ្ឋ ដូចជាជម្លោះដីធ្លីជាដើមហើយលាបពណ៌គេថា ជាបក្សប្រឆាំង។ ចំណុចនេះជាគ្រោះថ្នាក់ខ្លាំងណាស់សម្រាប់បក្ស»។
ត្រង់ចំណុចនេះនាយករដ្ឋមន្ត្រី បានបញ្ជាឲ្យសមាជិកគណបក្សទាំងអស់ ត្រូវយកចិត្តទុកដាក់បម្រើប្រជាពលរដ្ឋ ដូចជាការផ្តល់សេវាសាធារណៈ ទាំងការធ្វើសំបុត្រកំណើត សំបុត្រអាពិពាហ៍ពិពាហ៍ជាដើម។
ការលើកឡើងរបស់សម្ដេច ហ៊ុន សែន ពេលនេះ ធ្វើឡើងបន្ទាប់ពីបញ្ហាសេវាសាធារណៈថ្នាក់មូលដ្ឋានមួយចំនួន ត្រូវបានគេមើលឃើញថា មានការអនុវត្តតួនាទីមិនបានត្រឹមត្រូវ ពីសំណាក់អាជ្ញាធរ ដោយសារការរើសអើងនិន្នាការនយោបាយ មកលើពលរដ្ឋ៕
© រក្សាសិទ្ធិដោយ thmeythmey.com