ជាតិ
សេដ្ឋកិច្ច
រដ្ឋរកចំណូលពីការលក់ប័ណ្ណទស្សនារមណីយដ្ឋានអង្គរបាន៥៥លានដុល្លារ ក្នុងរយៈពេល៥ខែ
× សៀមរាប៖ ក្នុងរយៈពេល៥ខែ ក្នុងឆ្នាំ២០១៨ ចំណូលពីការលក់សំបុត្រចូលទស្សនារមណីយដ្ឋានអង្គរ រកបានចំនួនជិត ៥៥លានដុល្លារ គឺស្មើនឹង ៥៤,៩៩៣,៣៩១ដល្លារអាមេរិក។ តាមការកក់ត្រារបស់គ្រឹះស្ថានអង្គរ ចំនួននេះមានការកើនឡើង ១៩,៧៨ភាគរយ បើធៀបនឹងឆ្នាំ២០១៧។
រយៈពេល៥ខែ គឺចាប់ពីខែមករា ដល់ខែឧសភា មានភ្ញៀវទេសចរបរទេសចំនួន ១,២០៦,១៨៨នាក់ ដែលបានទិញប័ណ្ណចូលទស្សនារមណីយដ្ឋានអង្គរពីគ្រឹះស្ថានអង្គរ។ ចំនួននេះបានកើនឡើងជាង១០ភាគរយ ធៀបនឹងឆ្នាំទៅ។
សេចក្តីប្រកាសព័ត៌មានរបស់គ្រឹះស្ថានអង្គរ ចុះថ្ងៃទី១ មិថុនា បានបញ្ជាក់ថា ក្នុងខែ ឧសភា ចំណូលពីការលក់ប័ណ្ណទស្សនានេះមានចំនួន ៦,៧៣៨,០៧២ដុល្លារ ក្នុងចំនួនភ្ញៀវទេសចរចំនួន ១៥៥,១៩៦នាក់។ បើតាមសេចក្តីប្រកាសដដែល ចំណូលពីការលក់ប័ណ្ណចូលទស្សនារមណីយដ្ឋានអង្គរ រយៈពេល៥ខែនេះ បានឧបត្ថម្ភមូលនិធិមន្ទីរពេទ្យគន្ធបុប្ផាចំនួន ២,៤១២,៣៧៦ ដុល្លារអាមេរិក។
គួរបញ្ជាក់ថា រដ្ឋាភិបាលកម្ពុជាតាមរយៈគ្រឹះស្ថានអង្គរ បានចេញផ្សាយពីគោលការណ៍តម្លៃសំបុត្រទស្សនារមណីយដ្ឋានអង្គរថ្មី។ ក្នុងសេចក្តីសម្រេចដែលនឹងចាប់ផ្តើមអនុវត្តន៍ចាប់ពីដើមខែកុម្ភៈ ឆ្នាំ២០១៧មក គឺតម្លៃសំបុត្រក្នុងមួយថ្ងៃឡើងពី២០ ទៅ៣៧ដុល្លារ ដែលមានសុពលភាព ៣ថ្ងៃ សំបុត្រមានសុពលភាពមួយសប្ដាហ៍ ឡើងពី៤០ ទៅ៦២ដុល្លារ និងសុពលភាព មួយសប្ដាហ៍ ឡើងពី ៦០ ទៅ៧២ដុល្លារ។ ក្នុងសេចក្តីសម្រេចនោះបានបញ្ជាក់ថា រាល់តម្លៃសំបុត្រមួយៗត្រូវដកចំនួន ២ដុល្លារ ដើម្បីបង់ចូលក្នុងមូលនិធិមន្ទីរពេទ្យគន្ធបុប្ផា៕
© រក្សាសិទ្ធិដោយ thmeythmey.com