ជាតិ
សង្គមជាតិ
ក្រសួងបរិស្ថាន អំពាវនាវឲ្យគ្រប់ក្រសួង ស្ថាប័ន និងពលរដ្ឋ ចូលរួមថែរក្សាអនាម័យបរិស្ថាន គំនរសម្រាមក្បែស្តុបផ្សារដើមគរកាលពីកន្លងមក
× ក្រសួងបរិស្ថាន នឹងរៀបចំប្រារព្ធទិវាបរិស្ថានជាតិ ស្របគ្នាជាមួយនឹងទិវាបរិស្ថានពិភពលោក នៅថ្ងៃទី៥ ខែមិថុនា ឆ្នាំ២០១៨ ។ ទិវានេះ គឺជាការប្រារព្ធលើកទី៤៦ នៃទិវាបរិស្ថានពិភពលោក និងទី២២ សម្រាប់ទិវាបរិស្ថាននៅកម្ពុជា ដែលបានប្រារព្ធឡើងជារៀងរាល់ឆ្នាំ ចាប់តាំងពីឆ្នាំ១៩៩៦ មក។
ទិវាបរិស្ថានជាតិ និងបរិស្ថានពិភពលោក ត្រូវបានរៀបចំឡើងជាងរៀងរាល់ឆ្នាំ ក្នុងបំណង លើកកម្ពស់ការយល់ដឹងជាសាធារណៈ អំពីការគ្រប់គ្រង និងប្រើប្រាស់ធានធានធម្មជាតិប្រកដោយនិរន្តរភាព ការប្រយុទ្ធប្រឆាំងនឹងការប្រែប្រួលអាកាសធាតុ ការគ្រប់គ្រងគុណភាព បរិស្ថាន សំដៅលើការលើកកម្ពស់សុខភាពសាធារណៈ។ ទិវានេះ ក៏ប្រារព្ធឡើង ដើម្បីចូលរួមគាំពារបរិស្ថាន ការអភិរក្សចម្រុះ ការគ្រប់គ្រងធនធានធម្មជាតិប្រកបដោយនិរន្តរភាព និងការបំផុតចលនាប្រជាពលរដ្ឋគ្រប់រូប ឲ្យផ្សារភ្ជាប់ទំនាក់ទំនងជាមួយធម្មជាតិ និងកែលម្អគុណភាព សោភណភាពទីក្រុង ទីប្រជុំជន ជនបទភូមិដ្ឋាន វត្តអារាម សាលារៀន មន្ទីរពេទ្យ រោងចក្រ សហគ្រាស ទីផ្សារ មជ្ឈមណ្ឌលសេដ្ឋកិច្ច-ល-។
ដើម្បីជំរុញឲ្យចលនានៃការប្រារព្ធទិវាបរិស្ថានជាតិ និងទិវាបរិស្ថានពិភពលោក ប្រព្រឹត្តទៅយ៉ាងផុសផុល ក្រសួងបរិស្ថាន ក៏បានណែនាំឲ្យអាជ្ញាធរដែនដីចូលរួមផ្សព្វផ្សាយ ដល់ប្រជាពលរដ្ឋឲ្យធ្វើអនាម័យបរិស្ថាន ដាំដើមឈើ និងទុកដាក់ និងវេចខ្ចប់សំណល់រឹង និងសំរាម ក្នុងធុងសំរាម ឬនៅទីតាំងកំណត់ឲ្យបានត្រឹមត្រូវ ចៀសវាងការដុត ឬបោះចោលមិនត្រឹមត្រូវ ដែលអាចបង្កការប៉ះពាល់ដល់សុខភាពមនុស្ស សត្វ និងគុណភាពបរិស្ថាន។
ក្រសួងស្ថាប័ន គ្រឹះស្ថាននានា សាលារៀន វត្តអារាម និងមន្ទីរពេទ្យ ក៏ត្រូវចាត់ចែងធ្វើអនាម័យទាំងក្នុង និងក្រៅបរិវេណអង្គភាពរបស់ខ្លួន ក៏ដូចជាចូលរួមផ្សព្វផ្សាយតាមរយៈការធ្វើក្បួនដង្ហែកង់ ការប្រគំតន្ត្រីបៃតង ការនិពន្ធអត្ថបទ និងការប្រកួតផ្ទាំងរូបភាពនៅក្នុងសាលារៀន កាដាំដើមឈើ ការកែច្នៃនានា យុទ្ធនាការសម្អាតជាដើម។ ចំណែកឯ រមណីយដ្ឋាន មជ្ឈមណ្ឌកម្សាន្ត ភោជនីយដ្ឋាន និងអាហារដ្ឋាន ក៏តោងយកចិត្តទុកដាក់ លើការសន្សំសំចៃថាមពល ចូលរួមថែរក្សាការពារជីវចម្រុះ និងធនធានធមមជាតិ ចូលរួមធ្វើអនាម័យ និងគ្រប់គ្រងសំណល់រឹង សំណល់រាវ ឲ្យបានត្រឹមត្រូវផងដែរ៕
© រក្សាសិទ្ធិដោយ thmeythmey.com