ជាតិ
មន្ត្រីសង្គមស៊ីវិលពីរនាក់ ត្រូវចូលបំភ្លឺពីរឿងលោក កឹម សុខា នៅថ្ងៃនេះ លោកស្រី ចក់ សុភាព ជាមនុស្សម្នាក់ ក្នុងចំណោម៨នាក់ ដែលត្រូវបានកោះហៅឲ្យចូលបំភ្លឺលើសំណុំរឿងលោក កឹម សុខា
× បើតាមដីកា អ្នកស្រី ចក់ សុភាព ជានាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា និងលោក មាស គឹមសេង ប្រធានសមាគមធាងត្នោត ត្រូវទៅជួបលោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ នៅព្រឹកថ្ងៃទី៧ ខែមិថុនានេះ ដើម្បីបំភ្លឺលើសំណុំរឿងលោក កឹម សុខា អតីតប្រធានគណបក្សសង្គ្រោះជាតិ។ អ្នកទាំងពីរ ចូលបំភ្លឺក្នុងនាមជាសាក្សី។
មជ្ឈមណ្ឌលសិទ្ធិមនុស្សកម្ពុជា បានចេញសេចក្តីថ្លែងការណ៍ថា លោកស្រី ចក់ សុភាព នឹងចូលបំភ្លឺតាមដីកាបង្គាប់។
ចៅក្រមស៊ើបសួរនៃសាលាដំបូងរាជធានីភ្នំពេញ បានបង្គាប់មនុស្ស៨នាក់ឯណោះ ឲ្យចូលបំភ្លឺក្នុងនាមជាសាក្សី លើសំណុំរឿងរបស់លោក កឹម សុខា ដែលកំពុងជាប់ឃុំក្រោមការសង្ស័យថា បានប្រព្រឹត្តអំពើក្បត់ជាតិ ព្រោះតែគប់គិតជាមួយបរទេស ដើម្បីផ្តួលរំលំរដ្ឋាភិបាល។
មនុស្ស៦នាក់ទៀត គឺលោក ប៉ា ងួនទៀង ជានាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក សៀ ភារម្យ ជានាយកប្រតិបត្តិនៃអង្គការក្រុមការងារពិសេសសិទ្ធិលំនៅដ្ឋាន លោក កែវ រតនា អ្នកបម្រើការងារក្នុងក្រុមហ៊ុនឯកជនមួយ លោក ខឿន វីរ៉ាត់ ជានិស្សិត និងលោក គ្រី សុង ជាកសិករ។
ចៅក្រមស៊ើបសួរ បានកំណត់ឲ្យអ្នកទាំង៨នាក់ ចូលបំភ្លឺក្នុងខែមិថុនា ឆ្នាំ២០១៨ដូចគ្នា ដោយគ្រាន់តែខុសថ្ងៃប៉ុណ្ណោះ ពោលគឺលោក គ្រី សុង ត្រូវបំភ្លឺនៅថ្ងៃទី៥, លោក មាស គឹមសេង និងអ្នកស្រី ចក់ សុភាព ត្រូវបំភ្លឺនៅថ្ងៃទី៧, លោក ប៉ា ងួនទៀង ត្រូវបំភ្លឺនៅថ្ងៃទី៩, លោក សៀ ភារម្យ, ត្រូវបំភ្លឺនៅថ្ងៃទី១២, លោក ហេង ពិសិដ្ឋ ត្រូវបំភ្លឺនៅថ្ងៃទី១៣, លោក កែវ រតនា ត្រូវបំភ្លឺនៅថ្ងៃទី១៥, និងលោក ខឿន វីរ៉ាត់ ត្រូវបំភ្លឺនៅថ្ងៃទី១៣។
បច្ចុប្បន្ន សំណុំរឿងរបស់លោក កឹម សុខា កំពុងស្ថិតក្នុងដំណាក់កាលនៃការស៊ើបសួរ។ កន្លងមក ចៅក្រមស៊ើបសួរ បានទៅសួរលោក កឹម សុខា ដល់ពន្ធនាគារត្រពាំងផ្លុវ ក្នុងខេត្តត្បូងឃ្មុំចំនួន៣លើករួចមកហើយ។
លោក កឹម សុខា ត្រូវបានសមត្ថកិច្ចចាប់ខ្លួនកាលពីអំឡុងខែកញ្ញា ឆ្នាំ២០១៧។ ដល់ពេលនេះ លោក បានជាប់ឃុំប្រមាណជា១0ខែ៕
© រក្សាសិទ្ធិដោយ thmeythmey.com