ជាតិ
សេដ្ឋកិច្ច
ក្រសួងកសិកម្ម ស្នើគម្រោងជលផលតម្លៃ១០០លានដុល្លារ ទៅសហភាពអឺរ៉ុប
× ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ កំពុងដាក់សំណើទៅសហភាពអឺរ៉ុប លើគម្រោងជលផលមួយ ដែលមានរយៈពេល៥ឆ្នាំ និងតម្លៃទឹកប្រាក់ ៨៥លានអឺរ៉ូ (ប្រហែល១០០លានដុល្លារ)។ នេះបើតាមព័ត៌មានលើទំព័រហ្វេសប៊ុកក្រសួង។
ក្រោយពីក្រសួងកសិកម្ម និងសហភាពអឺរ៉ុបប្រចាំកម្ពុជា បានបញ្ចប់ការសិក្សាពីលទ្ធភាព និងវាយតម្លៃពីលទ្ធផលរំពឹងទុករួចមក គម្រោង Cambodia program for sustainable and inclusive growth in the fisheries sector (CAPFISH) ត្រូវបានដាក់ស្នើទៅសហភាពអឺរ៉ុប (EU) ដើម្បីពិនិត្យ និងសម្រេចជាផ្លូវការ។
គម្រោងនេះមានរយៈពេល៥ឆ្នាំ និងត្រូវចំណាយទឹកប្រាក់ប្រមាណ ១០០លានដុល្លារ ដែលនឹងមានចូលរួមអនុវត្តដោយរដ្ឋបាលជលផល ដៃគូអភិវឌ្ឍន៍ អង្គការក្រៅរដ្ឋាភិបាល និងវិស័យឯកជន។ គម្រោងនេះផ្ដោតសំខាន់លើការគ្រប់គ្រង អភិរក្ស ធនធានជលផលសមុទ្រ និងទឹកសាប ការកែច្នៃផលិតផលជលផល និងការលើកកម្ពស់ជីវភាពសហគមន៍។
គម្រោងមួយនេះ នឹងត្រូវពិនិត្យក្នុងកិច្ចប្រជុំនៅទីស្នាក់ធំរបស់ EU នាសប្ដាហ៍ខាងមុខនេះ ហើយដែលត្រូវបានរំពឹងថានឹងមានការអនុម័តនៅចុងឆ្នាំនេះ។ នេះបើតាមលោក George Edgar ឯកអគ្គរដ្ឋទូតនៃសភាពអឺរ៉ុបប្រចាំកម្ពុជា ក្នុងជំនួបជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៦មិថុនា៕
© រក្សាសិទ្ធិដោយ thmeythmey.com