ការប៉ះទង្គិចនៅស្វាយរៀងធ្វើឲ្យកីឡាករនិងមន្ត្រី១២រូបរងពិន័យ

កីឡាជាតិ

ជាតិ

ការប៉ះទង្គិចនៅស្វាយរៀងធ្វើឲ្យកីឡាករនិងមន្ត្រី១២រូបរងពិន័យ

07, Jun 2018 , 6:34 pm

រូបភាព

លោក អោក សំណាង (ស្តាំ)អគ្គលេខាធិការ និងគ្រូបង្វឹកក្លិបព្រះខ័នរាជស្វាយរៀងក្នុងសន្និសីទសារព័ត៌មានជុំវិញការពិន័យកីឡាកររបស់ខ្លួន

ដោយ:

គណៈកម្មការវិន័យរបស់សហព័ន្ធកីឡាបាល់ទាត់កម្ពុជានៅថ្ងៃទី៧ ខែមិថុនានេះ បានសម្រេចពិន័យកីឡាករ និងមន្ត្រីចំនួន១២រូបពាក់ព័ន្ធរឿងប្រទូសរ៉ាយរវាងកីឡាករព្រះខ័នរាជស្វាយរៀងជាមួយក្រសួងការពារជាតិ។ បន្ថែមលើនេះម្ចាស់ផ្ទះស្វាយរៀងរងពិន័យពីបទធ្វេសប្រហែសធ្ងន់ធ្ងរ ផ្នែកសន្តិសុខ សណ្តាប់ធ្នាប់ និងការការពារ ដែលអាចរងពិន័យ២លានរៀលក្នុង១ប្រកួត បើគ្មានអ្នកគាំទ្រនៅប្រកួតក្រោយៗ។

ការប្រទូសរ៉ាយគ្នារវាងកីឡាករព្រះខ័នរាជស្វាយរៀងជាមួយក្រសួងការពារជាតិ បានធ្វើឲ្យកីឡាករនិងមន្ត្រីនៃក្លិបទទាំងពីរចំនួន១២រូបរងពិន័យយ៉ាងធ្ងន់ធ្ងរពីគណៈកម្មការវិន័យនៃសហព័ន្ធកីឡាបាល់ទាត់កម្ពុជា ដោយ៨រូបមកពីព្រះខ័នរាជស្វាយរៀង និង៤រូបមកពីក្រសួងការពារជាតិ។ នេះបើយោងតាមសេចក្តីសម្រេចរបស់គណៈកម្មការវិន័យនៃសហព័ន្ធកីឡាបាល់ទាត់កម្ពុជាដែលចេញផ្សាយនៅថ្ងៃទី៧ ខែមិថុនា ឆ្នាំ២០១៨នេះ។

កីឡាករ ណុប តុលា និង សឿយ វិសាល ត្រូវបានពិន័យព្យួរ២ប្រកួត និង៤ប្រកួតរួមទាំងថវិកា៥០ម៉ឺនរៀលរៀងៗខ្លួន ក្រោមបទចោទវាយគូប្រកួត ខណៈកីឡាករ ហូយ ផល្លីន, សុក សំណាង, អោម ឧត្តម, សារ៉េត គ្រីយ៉ា, អាំ សុវណ្ណារ៉ាត់ និងគ្រូជំនួយ សួន ធួន រងពិន័យព្យួររយៈពេល៣ខែនិងថវិកា៥០ម៉ឺនរៀល ក្រោមបទចោទចូលរួមការវាយតប់តាមមាត្រា៤៨ និង៥០នៃក្រមវិន័យ។

បន្ថែមលើនេះ ក្នុងនាមជាម្ចាស់ផ្ទះរៀបចំការប្រកួត ក្លិបបាល់ទាត់ព្រះខ័នរាជស្វាយរៀងត្រូវបានគណៈកម្មការវិន័យចោទពីបទធ្វេសប្រហែសធ្ងន់ធ្ងរ ផ្នែកសន្តិសុខ សណ្តាប់ធ្នាប់ និងការការពារ ដែលអាចរងពិន័យពីរលានរៀលក្នុង១ប្រកួត ក្នុងករណីប្រកួតលើកក្រោយៗមិនមានអ្នកគាំទ្រ។

លោក អោក សំណាង អគ្គលេខាធិការក្លិបបាល់ទាត់ព្រះខ័នរាជស្វាយរៀងបានបញ្ជាក់ថា លោកនឹងដាក់បណ្តឹងឧទ្ធរណ៍ទៅកាន់គណៈកម្មការឧទ្ធរណ៍នៃសហព័ន្ធកីឡាបាល់ទាត់កម្ពុជា ដើម្បីស្នើសុំបន្ធូរទណ្ឌកម្ម ក្រោយលោកយល់ថា ការពិន័យរបស់គណៈកម្មការវិន័យហាក់ធ្ងន់ធ្ងរពេក។ តែលោកអះអាងថា សម្រាប់កីឡាករ ណុប តុលា, សឿយ វិសាល និងគ្រូជំនួយ សួន ធួន មិនត្រឹមតែមិនដាក់បណ្តឹងឧទ្ធរណ៍ដើម្បីសម្រាលទោសប៉ុណ្ណោះទេ ថែមទាំងអាចរងពិន័យបន្ថែមពីក្លិបថែមទៀតផង។

អគ្គលេខាធិការរូបនេះបន្ថែមថា ក្លិបបាល់ទាត់ព្រះខ័នរាជស្វាយរៀងនឹងដាក់ពិន័យលើកីឡាករខាងលើបន្ថែម តាមរយៈការកាត់ប្រាក់ខែពី៣០ទៅ៤០ភាគរយ រហូតដល់៦០ភាគរយក្នុងករណីរកឃើញថាបានប្រព្រឹត្តអំពើហិង្សាធ្ងន់ធ្ងរ។ បន្ថែមលើនេះ លោកនឹងមើលវីដេអូសកម្មភាពបន្ថែម ដើម្បីស្វែងរកអ្នកបង្កកំហុសផ្សេងទៀតយកមកដាក់ពិន័យ។ តែលោកអះអាងថា មិនមានការដាក់ពិន័យរហូតបញ្ចប់កិច្ចសន្យានោះទេ។

ដោយឡែកខ្សែបម្រើជប៉ុន Yudai Ogawa ដែលរងរបួសបែកក្រដាសត្រចៀក, ខ្សែបម្រើកូរ៉េខាងត្បូង Song Chi-hun ដែលក្លិបក្រសួងការពារជាតិបានបញ្ចប់កិច្ចសន្យារងពិន័យ១ប្រកួតនិង២ប្រកួតរៀងខ្លួន ពីបទវាយគូប្រកួត។ រីឯលោក ឡេង ណារិន រងពិន័យព្យួរ៣ខែ ក្រោមបទចោទចូលរួមការវាយតប់ និងលោក ភា សុភក្ត្រា គ្រូបង្វឹកក្លិបក្រសួងការពារជាតិទទួលលិខិតព្រមានចុងក្រោយ ក្រោមបទចោទបំពានសេចក្តីសម្រេចរបស់គណៈកម្មការវិន័យនៃសហព័ន្ធកីឡាបាល់ទាត់កម្ពុជា។

គួររំលឹកថា ក្នុងជំនួបសប្តាហ៍ទី៨នៃពានរង្វាន់លីគកំពូលកម្ពុជាកាលពីថ្ងៃទី៣ មិថុនា នៅកីឡដ្ឋានខេត្តស្វាយរៀង មានករណីវាយតប់គ្នារវាងកីឡាករព្រះខ័នរាជស្វាយរៀងជាមួយក្រសួងការពារជាតិ ដែលបណ្តាលឲ្យកីឡាករជប៉ុន Ydai Ogawa រងរបួសបែកក្រដាសត្រចៀក និងកីឡាករកូរ៉េខាងត្បូងម្នាក់ត្រូវបានក្លិបបញ្ចប់កិច្ចសន្យាមុនពេលវេលាកំណត់។ ភ្លាមៗនោះកីឡាករ៤រូបត្រូវបានអាជ្ញាកណ្តាលបណ្តេញចេញពីទីលានប្រកួតផងដែរ។

មួយថ្ងៃក្រោយការប៉ះទង្គិចលោក រិទ្ធ ឌីកា ប្រធានបច្ចេកទេសក្លិបព្រះខ័នរាជស្វាយរៀង និងលោក ខូវ ឆាយ ថ្នាក់ដឹកនាំក្លិបក្រសួងការពារជាតិបានលេងបាល់ទាត់ជាមួយ ដើម្បីជាគំរូ ក៏ដូចជាបញ្ចប់ភាពតានតឹងរវាងក្លិបទាំងពីរ។ បន្ថែមលើនេះ កាលពីថ្ងៃទី៦ ខែមិថុនា ឆ្នាំ២០១៨ លោក អោក សំណាង អគ្គលេខាធិការក្លិបព្រះខ័នរាជស្វាយរៀងនិងកីឡាករបានមកសួរសុខទុក្ខកីឡាករជប៉ុន Yudai Ogawa ដែលកំពុងសម្រាកព្យាបាលរបួសបែកក្រដាសត្រចៀកថែមទៀតផង៕