ក្រសួងរាជវាំង៖ ព្រះរាជសារ ដែលអំពាវនាវឲ្យពលរដ្ឋទៅបោះឆ្នោត មិនមែនធ្វើឡើងក្រោមការគំរាមនោះទេ

ជាតិ

ក្រសួងរាជវាំង៖ ព្រះរាជសារ ដែលអំពាវនាវឲ្យពលរដ្ឋទៅបោះឆ្នោត មិនមែនធ្វើឡើងក្រោមការគំរាមនោះទេ

08, Jun 2018 , 4:10 pm

រូបភាព

ដោយ: ថ្មីៗ

ព្រះរាជសាររបស់ព្រះមហាក្សត្រ ដែលអំពាវនាវឲ្យប្រជាពលរដ្ឋទៅបោះឆ្នោត គឺជាព្រះរាជសារពិតប្រាកដ ហើយមិនមែនធ្វើឡើងក្រោមការគំរាមកំហែងរបស់ជនណានោះទេ។ នេះជាការបញ្ជាក់របស់ក្រសួងព្រះបរមរាជវាំង តាមរយៈសេចក្តីប្រកាសព័ត៌មាន ដែលចុះនៅថ្ងៃទី៨ ខែមិថុនា ឆ្នាំ២០១៨។

សេចក្តីប្រកាសព័ត៌មាននោះ បានសរសេរយ៉ាងដូច្នេះថា៖«ក្រសួងព្រះបរមរាជវាំង សូមបដិសេធ និងច្រានចោលទាំងស្រុងនូវរាល់ការចោទប្រកាន់ និងការបំផ្លើស ប្រាសចាកការពិត [អំពីព្រះរាជសាររបស់ព្រះមហាក្សត្រ]»។

ដ្បិតមិនសំដៅចំៗទៅកាន់បុគ្គលណាក្តី តែសេចក្តីប្រកាសព័ត៌មានរបស់ក្រសួងព្រះបរមរាជវាំង គឺធ្វើឡើងក្រោយពីលោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេស បានសរសេរសារលើទំព័រហ្វេសប៊ុក ដោយអះអាងថា ព្រះរាជសាររបស់ព្រះមហាក្សត្រ គឺជាព្រះរាជសារក្លែងក្លាយ។ លោក ថែមទាំងបកស្រាយថា ទោះជាព្រះរាជសារ ជាការពិតក៏ដោយ ក៏ធ្វើឡើងក្រោមការគំរាមកំហែងដែរ។

លោក គឹម សន្តិភាព អ្នកនាំពាក្យក្រសួងយុត្តិធម៌ បានលើកឡើងថា លោក សម រង្ស៊ី បានប្រមាថព្រះមហាក្សត្រ ដែលត្រូវផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ។ តាមរយៈសារលើទំព័រហ្វេសប៊ុក អ្នកនាំពាក្យក្រសួងយុត្តិធម៌ បានហៅសំណេររបស់អតីតមេបក្សប្រឆាំង ថាជាការធ្វើឲ្យប៉ះពាល់យ៉ាងធ្ងន់ធ្ងន់ដល់ព្រះកិត្តិយសរបស់ព្រះមហាក្សត្រ៕