កីឡាករ អ៊ឹម រិទ្ធា រ៉ាប់រងជំនួសសិស្សច្បង រារាំងកុំឲ្យមានការស៊ុតបញ្ចូលទីពីក្រុមវិសាខារសៀលនេះ

កីឡាជាតិ

ជាតិ

កីឡាករ អ៊ឹម រិទ្ធា រ៉ាប់រងជំនួសសិស្សច្បង រារាំងកុំឲ្យមានការស៊ុតបញ្ចូលទីពីក្រុមវិសាខារសៀលនេះ

09, Jun 2018 , 2:14 pm

រូបភាព

កីឡាករ អ៊ឹម រិទ្ធា ហ្វឹកហាត់មុនជំនួបជាមួយវិសាខា, រូបភាពពីហ្វេសប៊ុកក្លិបបាល់ទាត់ព្រះខ័នរាជស្វាយរៀង

ដោយ:

ក្រុមបាល់ទាត់ព្រះខ័នរាជស្វាយរៀងត្រូវបង្ខំចិត្តប្រើប្រាស់អ្នកចាំទីដៃទី៣ អ៊ឹម រិទ្ធា ជំនួសអ្នកចាំទីដៃទី១និងទី២ក្នុងជំនួបតទល់ជាមួយក្រុមវិសាខា សម្រាប់ពានរង្វាន់បាល់ទាត់ក្របខណ្ឌកំពូលកម្ពុជានាម៉ោង៣រសៀលថ្ងៃទី៩ ខែមិថុនា ឆ្នាំ២០១៨។ ព្រះខ័នរាជស្វាយរៀង ត្រូវប្រើប្រាស់កីឡាករយុវជនច្រើនសម្រាប់ជំនួបរសៀលនេះ ក្រោយកីឡាករមួយចំនួនជាប់ពិន័យ។ ទោះបីយ៉ាងនេះក្តី វិសាខាមិនបានមើលស្រាលសមត្ថភាពគូប្រកួតនោះទេ ដោយអះអាងថា នឹងប្រើប្រាស់កីឡាករពេញជើងតែម្តង។

អ្នកចាំទីដៃទី៣ អ៊ឹម រិទ្ធា មានភារកិច្ចដ៏ធំមួយ គឺរារាំងកុំឲ្យមានការស៊ុតបញ្ចូលទីព្រះខ័នរាជស្វាយរៀងពីសំណាក់កីឡាករវិសាខា ជំនួសអ្នកចាំដៃទី១ អោម ឧត្តម និងអ្នកចាំដៃទី២ អាំ សុវណ្ណារ៉ាត់ ដែលរងពិន័យព្យួរបីខែពាក់ព័ន្ធចូលរួមប្រើប្រាស់អំពើហិង្សា។ បទពិសោធក្មេងខ្ចីរបស់អ្នកចាំទីវ័យ១៩ឆ្នាំខាងលើ បានក្លាយជាក្តីកង្វល់ដ៏ធំ សម្រាប់ថ្នាក់ដឹកនាំក្លិបព្រះរាជស្វាយរៀងក្នុងការតទល់ជាមួយក្រុមចំណូលថ្មីវិសាខា។

លោក អោក សំណាង អគ្គលេខាធិការក្លិបព្រះខ័នរាជស្វាយរៀងបានបង្ហាញក្តីបារម្ភយ៉ាងដូច្នេះថា៖«ក្លិបព្រះខ័នរាជស្វាយរៀងប្រើប្រាស់តែយុវជនខ្លួនឯងនោះទេ ហើយក៏មិនបានយកពីក្លិបផ្សេងៗដែរ មានប៉ុន្មានប្រើប៉ុណ្ណឹង។ ប៉ុន្តែអ្វីដែលពិបាកបំផុត គឺអ្នកចាំទីខ្ញុំទាំងពីរជាប់ពិន័យ ហើយនៅថ្ងៃសៅរ៍នេះ យើងជួបវិសាខា ដូច្នេះយើងត្រូវប្រើអ្នកចាំទីដៃទី៣ដែលគាត់មានបទពិសោធក្មេងខ្ចី នេះជាក្តីកង្វល់សម្រាប់យើង»។

ការប្រើប្រាស់អ្នកចាំទីដៃទី៣ជាបញ្ហាមួយ ប៉ុន្តែការអវត្តមានខ្សែការពារ សឿយ វិសាល, ណុប តុលា, សារ៉េត គ្រីយ៉ា, ខែបម្រើ ហូយ ផល្លីន និងខ្សែប្រយុទ្ធ សុក សំណាង ដែលជាប់ពិន័យរៀងៗខ្លួន បានជាបញ្ហាធំសម្រាប់ព្រះខ័នរាជស្វាយរៀង។ តែយ៉ាងណា លោក Conor Nestor គ្រូបង្វឹកក្រុមព្រះខ័នរាជស្វាយរៀងចាត់ទុកបញ្ហានេះ មិនជះឥទ្ធិពលធ្ងន់ធ្ងរឡើយសម្រាប់ក្រុម។

«យើងនៅសល់កីឡាករ១៦រូបដែលពោរពេញដោយសមត្ថភាព ជាធម្មតាការប្រកួតបាល់ទាត់យើងមិនពឹងតែលើកីឡាករ៥ទៅ៦រូបនោះទេ។ ហើយខ្ញុំនឹងព្យាយាមប្រើប្រាស់ធនធានទាំងនេះ ខ្ញុំជឿជាក់លើពួកគេ ព្រោះពួកគេមានសមត្ថភាព និងទេពកោសល្យ។ ដូច្នេះយើងមានកីឡាករគ្រប់គ្រាន់ដើម្បីប្រកួត និងស្វែងរកជ័យជម្នះ»។ នេះជាការអះអាងរបស់លោក Conor Nestor គ្រូបង្វឹកក្រុមព្រះខ័នរាជស្វាយរៀង។

គួររំលឹកថា កីឡាករនិងមន្ត្រីក្លិបព្រះខ័នរាជស្វាយរៀងចំនួន៨រូប ត្រូវបានគណៈកម្មការវិន័យរបស់សហព័ន្ធកីឡាបាល់ទាត់កម្ពុជាពិន័យព្យួរការប្រកួត ក្រោយផ្ទុះហិង្សាក្នុងជំនួបជាមួយក្រសួងការពារកាលពីសប្តាហ៍មុននៅលើទឹកដីខេត្តស្វាយរៀង។ ក្នុងនោះកីឡាករ ណុប តុលា និង សឿយ វិសាល ត្រូវបានពិន័យព្យួរ២ប្រកួត និង៤ប្រកួតរួមទាំងថវិកា៥០ម៉ឺនរៀលរៀងៗខ្លួន ក្រោមបទចោទវាយគូប្រកួត ខណៈកីឡាករ ហូយ ផល្លីន, សុក សំណាង, អោម ឧត្តម, សារ៉េត គ្រីយ៉ា, អាំ សុវណ្ណារ៉ាត់ និងគ្រូជំនួយ សួន ធួន រងពិន័យព្យួររយៈពេល៣ខែនិងថវិកា៥០ម៉ឺនរៀល ក្រោមបទចោទចូលរួមការវាយតប់តាមមាត្រា៤៨ និង៥០នៃក្រមវិន័យ។

បន្ថែមលើនេះ ក្នុងនាមជាម្ចាស់ផ្ទះរៀបចំការប្រកួត ក្លិបបាល់ទាត់ព្រះខ័នរាជស្វាយរៀងត្រូវបានគណៈកម្មការវិន័យចោទពីបទធ្វេសប្រហែសធ្ងន់ធ្ងរ ផ្នែកសន្តិសុខ សណ្តាប់ធ្នាប់ និងការការពារ ដែលអាចរងពិន័យពីរលានរៀលក្នុង១ប្រកួត ក្នុងករណីប្រកួតលើកក្រោយៗមិនមានអ្នកគាំទ្រ។

ទោះបីស្វាយរៀងបានបាត់បង់សមាជិកមួយចំនួនក៏ដោយ តែវិសាខាមិនហ៊ានមើលស្រាលសមត្ថភាយុវជនស្វាយរៀង ហើយក៏មិនធ្វេសប្រហែសដែរ ពោលគឺវិសាខានឹងប្រើប្រាស់កីឡាករពេញជើងតែម្តងសម្រាប់ជំនួបនៅរសៀលនេះ។ «យើងមិនអាចដឹងលទ្ធផលមុនបាននោះទេ។ ដូច្នេះយើងក៏មិនអាចមើលស្រាលលើសមត្ថភាពគូប្រកួតដែរ ព្រោះស្វាយរៀងនៅសល់យុវជនដែលសមត្ថភាពច្រើន ហើយពួកគេក៏ជាកីឡាករជម្រើសជាតិ អតីតកីឡាករជម្រើសជាតិ និងជម្រើសកម្រិត U ដែលធ្វើឲ្យយើងពិបាកក្នុងការយកឈ្នះ»។ នេះជាការលើកឡើងរបស់លោក ហុក សុជីវ័ន្ត គ្រូបង្វឹកក្រុមវិសាខា។

កីឡដ្ឋានវេស្ទើនភ្នំពេញក្លាយជាទីតាំងកាត់សេចក្តីជំនួបរវាងក្រុមវិសាខាជាមួយព្រះខ័នរាជស្វាយរៀង សម្រាប់ជំនួបសប្តាហ៍ទី៩នៃពានរង្វាន់បាល់ទាត់ក្របខណ្ឌកំពូលកម្ពុជា នវេលាម៉ោង៣រសៀលថ្ងៃទី៩ ខែមិថុនា ឆ្នាំ២០១៨នេះ។ សម្រាប់ជំនួបសប្តាហ៍មុនវិសាខាបានយកឈ្នះណាហ្គាវើលក្នុងលទ្ធផល ៣-០ ខណៈព្រះខ័នរាជស្វាយរៀងចាញ់ក្រសួងការពារ ២-១ ក្នុងជំនួបដ៏រកាំរកូស។

នៅថ្ងៃសៅរ៍នេះដែរ ក្រុមអង្គរថាយហ្គឹរត្រូវប្រជែងជាមួយក្រុមមានមូលដ្ឋាននៅខេត្តសៀមរាបដូចគ្នា សូលទីឡូអង្គរ នាវេលាម៉ោង៣និង៣០នាទីរសៀលនៅកីឡដ្ឋានខេត្តសៀមរាប។ ចំណែកក្រុមភ្នំពេញក្រោនបើកទ្វារកីឡដ្ឋាន RSN ស្វាគមន៍ក្រុមបឹងកេតនាម៉ោង៦ល្ងាច៕