ជាតិ
ខ្យល់កន្ត្រាក់នៅភ្នំពេញ៖ មនុស្សម្នាក់របួស, យានយន្តមួយចំនួនខូចខាត, ដើមឈើ និងផ្ទាំងប៉ាណូមួយចំនួនបាក់រលំ រូបភាពពី ហ្វេសប៊ុក
× ភ្នំពេញ៖ ដើមឈើ និងស្លាកប៉ាណូផ្សព្វផ្សាយពាណិជ្ជកម្មចំនួន ៣ទីតាំងផ្សេងគ្នា បានបាក់រលំ ដោយសារភ្លៀង និងខ្យល់កន្ត្រាក់ខ្លាំង។ ករណីនេះ បណ្ដាលឲ្យមនុស្សម្នាក់រងរបួស និងម៉ូតូ១គ្រឿង រួមទាំងរ៉ឹម៉ក១គ្រឿងខូចខាត។
នារសៀលថ្ងៃទី ៩ មិថុនានេះ មានភ្លៀង និងខ្យល់កន្ត្រាក់ខ្លាំង បានធ្វើឲ្យដើមឈើ និងស្លាកប៉ាណូផ្សព្វផ្សាយពាណិជ្ជកម្មមួយចំនួន បានបាក់រលំ។ លោក ម៉ែត មាសភក្ដី អ្នកនាំពាក្យនៃសាលារាជធានីភ្នំពេញ បានប្រាប់សារព័ត៌មានថ្មីៗតាមទូរសព្ទថា៖ «តាមព័ត៌មានបឋម ភ្លៀងនិងខ្យល់កន្ត្រាក់ខ្លាំងនៅរសៀលនេះ បានធ្វើឲ្យដើមឈើបាក់រលំ និងស្លាកប៉ាណូ២ទីតាំងបាក់ ដែលបណ្ដាលឲ្យមនុស្សម្នាក់រងរបួស និងម៉ូតូ១គ្រឿង រួមទាំងរ៉ឺម៉ក១គ្រឿងខូតខាត»។
ករណីនេះ កើតឡើងនៅទីតាំង៣ផ្សេងគ្នា គឺនៅមុខវិទ្យាល័យបាក់ទូក (ដើមឈើ), ច្រមុះជ្រូកស្ទឹងមានជ័យ (ស្លាកប៉ាណូ) និងមុខប៉ុស្ដិ៍នគរបាលចតុមុខ (ស្លាកប៉ាណូ)។ ក្រោយកើតហេតុ អាជ្ញាធរនៅតំបន់នោះ បានបញ្ជូនជនរងគ្រោះទៅមន្ទីរពេទ្យ និងរៀបចំសណ្ដាប់ធ្នាប់ឡើងវិញ។ លោក ម៉ែត មាសភក្ដី ក៏បានអំពាវនាវដល់ប្រជាពលរដ្ឋឲ្យមានការប្រុងប្រយ័ត្នចំពោះគ្រោះធម្មជាតិខ្យល់កន្ត្រាក់នេះផងដែរ៕
រូបភាពពី ហ្វេសប៊ុកTag:
ខ្យល់
ភ្លៀង
ដើមឈើ
ស្លាកប៉ាណូ
ខ្យល់កន្ត្រាក់
© រក្សាសិទ្ធិដោយ thmeythmey.com