ជាតិ
រូបភាពទាំងអស់ពីក្រសួងអប់រំ
×![]()
ភ្នំពេញ៖ ក្រុមប្រឹក្សាភិបាលនៃភាពជាដៃគូសកលសម្រាប់ការអប់រំ (GPE) បានផ្ដល់ហិរញ្ញប្បទានឥតសំណងចំនួន ២០,៦លានដុល្លារ សម្រាប់គាំទ្រដល់កិច្ចខិតខំប្រឹងប្រែងរបស់កម្ពុជា ក្នុងការលើកកម្ពស់គុណភាពអប់រំនៅបឋមសិក្សា។ ហិរញ្ញប្បទានឥតសំណងនេះ នឹងផ្ដល់អត្ថប្រយោជន៍ដល់កុមារមកពីគ្រួសារជួបការលំបាក ក៏ដូចជាការបង្កើនប្រសិទ្ធភាពនៃការបង្រៀន ពង្រឹងភាពដឹកនាំ និងគ្រប់គ្រងរបស់មន្ត្រីអប់រំរួមមាន គ្រូបង្រៀន នាយកសាលា ព្រមទាំងអ្នកផ្ដល់សេវាអប់រំនៅតាមមូលដ្ឋាន និងថ្នាក់ជាតិ។ 
លោក ហង់ ជួន ណារ៉ុន រដ្ឋមន្ត្រីក្រសួងអប់រំ បានលើកឡើងថា៖ «ភាពជាដៃគូសកលសម្រាប់ការអប់រំ បានរួមចំណែកដ៏សំខាន់ដល់វិស័យនៅកម្ពុជាចាប់តាំងពីឆ្នាំ២០០៦មក។ ការជួយគាំទ្របន្ថែមរបស់ GPE នេះ នឹងផ្តល់លទ្ធភាពឲ្យយើងអាចពង្រីកនិងពង្រឹងគ្រូបង្រៀនរបស់យើងឲ្យកាន់តែមានសមត្ថភាពបន្ថែមទៀត ដើម្បីផ្តល់ឲ្យកុមារដែលជួបការលំបាកនូវលក្ខខណ្ឌដែលពួកគេត្រូវការរៀនសូត្រ និងរីកចម្រើន»។ នេះបើតាមទីភ្នាក់ងារសារព័ត៌មានកម្ពុជា AKP ដកស្រង់សម្ដីលោក ហង់ ជួន ណារ៉ុន។
លោកស្រី Alice Albright ប្រធានប្រតិបត្តិនៃ(GPE) បានបញ្ជាក់ថា កម្ពុជាជាដៃគូរបស់ GPE ចាប់តាំងពីឆ្នាំ២០០៦មកបានបង្ហាញពីការប្តេជ្ញាចិត្តយ៉ាងមុតមាំចំពោះវិស័យអប់រំ ដើម្បីធ្វើយ៉ាងណាឲ្យវិស័យនេះកាន់តែមានភាពរឹងមាំ និង កាន់តែមានសមធម៌សម្រាប់កុមារជាច្រើននាក់ទៀត។ តាមរយៈហិរញ្ញប្បទានឥតសំណងលើកទី៣នេះ GPE នឹងជួយពន្លឿនវឌ្ឍនភាពវិស័យអប់រំនៅកម្ពុជាឲ្យមានសមិទ្ធផលគួរឲ្យកត់សម្គាល់បន្ថែមទៀត។
នេះជាលើកទី៣ហើយ ដែលGPE បានផ្ដល់ហិរញ្ញប្បទានឥតសំណងដល់កម្ពុជា។ ក្រុមប្រឹក្សាភិបាលនៃភាពជាដៃគូសកលសម្រាប់ការអប់រំ នឹងនាំមកនូវកិច្ចខិតខំប្រឹងប្រែងបន្ថែមទៀត ជាមួយក្រសួងអប់រំ អង្គការយូណេស្កូ និងអង្គការយូនីសេហ្វ ព្រមទាំងអង្គការដៃគូមួយចំនួនទៀត៕
Tag:
អប់រំ
ជំនួយ
GPE
© រក្សាសិទ្ធិដោយ thmeythmey.com
