អន្តរជាតិ
ប្រមុខការទូតអ៊ីរ៉ង់៖ មជ្ឈិមបូព៌ាមិនអាចប្រគល់សន្តិសុខតំបន់ទៅឲ្យ ត្រាំ ចាត់ចែងឡើយ រដ្ឋមន្រ្តីការបរទេសអ៊ីរ៉ង់ Mohammad Javad Zarif (រូបភាព AFP)
× រដ្ឋមន្ត្រីការបរទេសអ៊ីរ៉ង់ Mohammad Javad Zarif នៅថ្ងៃទី២១ ខែមិថុនា បានស្នើឲ្យប្រទេសក្នុងតំបន់មជ្ឈិមបូព៌ាទាំងអស់ជជែកគ្នាដោយខ្លួនឯងដើម្បីដោះស្រាយបញ្ហានានា។ ទំនងចង់ប្រាប់សម្ព័ន្ធមិត្តអាមេរិកក្នុងតំបន់ លោក Zarif និយាយថា មជ្ឈិមបូព៌ាមិនអាចប្រគល់សន្តិសុខរបស់ខ្លួនទៅឲ្យប្រធានាធិបតីអាមេរិក ដូណាល់ ត្រាំ ចាត់ចែងឡើយ។ សម្រាប់អ៊ីរ៉ង់ ប្រទេសក្នុងតំបន់អាចដោះស្រាយបញ្ហាបានដោយមិនចាំបាច់ពឹងនរណាទេ។
ប្រមុខការទូតអ៊ីរ៉ង់ Mohammad Javad Zarif បានរិះគន់ប្រធានាធិបតីអាមេរិក ដូណាល់ ត្រាំ ថាជាមនុស្សគ្រោះថ្នាក់ និងក្រឡេចក្រឡុច។ ដោយសារបែបនេះ លោក Zarif និយាយថា អ៊ីរ៉ង់ មិនអាចចរចាជាមួយអាមេរិកបានឡើយ ហើយក៏មិនអាចទុកឲ្យប្រធានាធិបតីអាមេរិកដែលមានចរិតបែបនេះ ចាត់ចែងកិច្ចការសន្តិសុខរបស់មជ្ឈិមបូព៌ាដែរ។ លោកក៏បានប្រាប់ឲ្យរដ្ឋមជ្ឈិមបូព៌ាផ្សេងទៀតចូលតុចរចាជាមួយគ្នា ជាជាងពឹងពាក់អាមេរិកឲ្យរកដំណោះស្រាយ។
ក្នុងអត្ថបទដែលផ្សាយទីភ្នាក់ងារអ៊ីរ៉ង់ Mehr នៅថ្ងៃទី២១ ខែមិថុនា លោក Zarif និយាយទៀតថា ប្រទេសក្នុងតំបន់អាចសម្រេចបាន «កិច្ចព្រមព្រៀងមិនឈ្លានពាន» និងដោះស្រាយបញ្ហាដោយខ្លួនឯង ដោយមិនបាច់ពឹងអាស្រ័យអ្នកកម្លាំងខាងក្រៅ។ ក្នុងន័យរិះគន់លោក ត្រាំ ត្រង់ៗ ប្រមុខការទូតអ៊ីរ៉ង់បញ្ជាក់ថា ការសម្រេចចិត្តមិនសមហេតុផលរបស់ និងអាកប្បកិរិយាប្រធានាធិបតីអាមេរិក បានក្លាយជារបៀបនៃការសម្រេចចិត្តរបស់អាមេរិកក្នុងរយៈពេល១៧ខែមកនេះ។
ជាថ្មីម្ដងទៀត រដ្ឋមន្ត្រីការបរទេសអ៊ីរ៉ង់រូបនេះក៏បានប្រតិកម្មតបទៅការគំរាមរបស់អាមេរិកជុំវិញដាក់លក្ខខណ្ឌទាមទារ១៥ចំណុចឲ្យអ៊ីរ៉ង់អនុវត្តដើម្បីឈានដល់កិច្ចព្រមព្រៀងនុយក្លេអ៊ែរថ្មី។ លោក Zarif បានទាមទារឲ្យអាមេរិកបញ្ឈប់ការលូកលាន់កិច្ចអ៊ីរ៉ង់ បញ្ចប់សង្គ្រាមនៅយេម៉ែន ក៏ដូចជាប្រាប់អ៊ីស្រាអែលឲ្យរំសាយនុយក្លេអ៊ែរ និងផ្អាកសកម្មភាពធ្វើទុក្ខបុកម្នេញលើជនជាតិប៉ាឡេស្ទីននៅតំបន់ហ្កាស្សា និងត្រើយខាងលិចផង។
ជាងនេះទៅទៀត លោក Zarif ក៏លើកឡើងពីភាពលំបាកក្នុងការជជែកជាមួយរដ្ឋបាលក្រុងវ៉ាស៊ីនតោនដែលលោកចាត់ទុកថាគ្មានហេតុផល និងគ្រោះថ្នាក់។ មន្ត្រីការទូតរូបនេះចង់សំដៅអាកប្បកិរិយាអាងយ៉ាងរបស់លោក ត្រាំ ចំពោះមុខសម្ព័ន្ធមិត្តខ្លួនក្នុងកិច្ចប្រជុំ G7 នៅកាណាដា តែបែរជារួសរាយខ្លាំងជាមួយមេដឹកនាំកូរ៉េខាងជើង គីម ជុងអ៊ុន ក្នុងជំនួបនៅសិង្ហបុរីទៅវិញ។ លោក Zarif សង្កត់ថា អ៊ីរ៉ង់មិនរំពឹងចរចាជាមួយរដ្ឋាភិបាលដែលផ្លាស់ប្ដូរជំហរតាមមិនទាន់បែបនេះឡើយ។
បើពិនិត្យតាមការលើកឡើងរបស់លោក Zarif ការចរចារវាងប្រទេសនៅមជ្ឈិមបូព៌ាពិបាកនឹងកើតឡើងណាស់។ តំបន់សម្បូរធនធានមួយនេះ កំពុងត្រូវបានបែងចែកជាចម្រៀកទៅហើយ។ ម្ខាងគឺក្រុមប្រទេសដែលងាកទៅរកអារ៉ាប៊ីសាអូឌីតមានអាមេរិកចាំជួយពីក្រោយ និងម្ខាងទៀត គឺប្រទេសលំអៀងទៅរកអ៊ីរ៉ង់ដែលមានរុស្ស៊ីខាងក្រោយខ្នង។ មហាអំណាចតំបន់ទាំងពីរចោទគ្នាទៅមកថា ព្យាយាមពង្រីកឥទ្ធិពលលើកប្រទេសផ្សេង ដែលធ្វើឲ្យមានជម្លោះបង្ហូរទល់សព្វថ្ងៃ៕
Tag:
មជ្ឈិមបូព៌ា
អ៊ីរ៉ង់
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com