អន្តរជាតិ
មន្ត្រីជប៉ុនម្នាក់ត្រូវពិន័យដោយសារចេញទៅបាយថ្ងៃត្រង់៣នាទីមុនចប់ម៉ោងធ្វើការ
រូបតំណាង
×![]()
ដោយ: ធីតា
មន្ត្រីជប៉ុនម្នាក់ដែលបម្រើការនៅការិយាល័យចែកចាញបណ្តាញទឹកក្នុងក្រុង Kobe ត្រូវបានពិន័យកាត់ប្រាក់ខែ ដោយសារតែគាត់ទម្លាប់ចេញទៅបរិភោគអាហារថ្ងៃត្រង់ មុនចប់ម៉ោងធ្វើការ។ បើតាម AFP គាត់ចេញមុនម៉ោងតែប្រមាណ៣នាទីប៉ុណ្ណោះ។
ម៉ោងការងារពិតជាមានសារសំខាន់ខ្លាំងណាស់នៅជប៉ុន ដោយរាល់ពេលវេលានៅការិយាល័យសុទ្ធតែមានតម្លៃ។ ក្រោមសង្កេតអស់រយៈពេល៧ខែ បុគ្គលិកអាយុ៦៤ឆ្នាំម្នាក់នៅការិយាល័យចែកចាញបណ្តាញទឹកក្នុងក្រុង Kobe បានចេញមុនម៉ោង២៦លើក។
អ្នកនាំពាក្យម្នាក់របស់សាលាក្រុង Kobe បានថ្លែងប្រាប់ AFP ថា ពេលសម្រាកបាយថ្ងៃត្រង់គឺម៉ោង១ ប៉ុន្តែបុគ្គលិករូបនេះ បានតែងតែកេងប្រវញ្ចម៉ោង៣នាទីមុនជានិច្ច។
ជាការព្រមាន ស្ថាប័នបានសម្រេចកាត់ប្រាក់បុគ្គលិករូបនោះ ពាក់កណ្តាលដើម្បីជាការព្រមាន ហើយតម្រូវឲ្យធ្វើសន្និសីទសារព័ត៌មានសុំទោស។ «យើងសោកស្តាយខ្លាំងណាស់ដែលបណ្តាលឲ្យមានរឿងបែបនេះកើតឡើង»។ នេះបើតាមការលើកឡើងរបស់មន្ត្រីម្នាក់។
នៅជប៉ុន មន្ត្រីត្រូវផ្តោតទៅលើការងាររបស់ខ្លួនឲ្យបានដិតដល់ ដើម្បីកុំរំលោភលើសេវាកម្មសាធារណៈ។ ទោះបីជាយ៉ាងណាក៏ដោយ អ្នកប្រើប្រាស់បណ្តាញសង្គម Twitter មួយចំនួនបានលើកឡើងថា វាជារឿងគួរឲ្យហួសចិត្ត ឆ្កួតលីលា និងអស់សំណើច។ អ្នកខ្លះចោទសួរថា៖ «ចុះបើបុគ្គលិកចេញទៅជក់បារី?»។
តាមពិតទៅ វាមិនមែនជារឿងថ្មីនោះឡើយ ពីព្រោះកាលពីខែកុម្ភៈកន្លងមក មន្ត្រីម្នាក់ត្រូវបានព្យួរការងារមួយខែ ដោយសារតែចេញពីការិយាល័យមុនបញ្ចប់ការងារជាច្រើនលើក។ តាមការបូកសរុប មន្ត្រីនោះ បានអវត្តមាន៥៥ម៉ោងនាអំឡុង៦ខែ៕
Tag:
ជប៉ុន
© រក្សាសិទ្ធិដោយ thmeythmey.com
