អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
១០ថ្ងៃក្រោយជំនួបប្រវត្តិសាស្ត្រនៅសិង្ហបុរី ប្រធានាធិបតីអាមេរិក ដូណាល់ ត្រាំ បានសម្រេចចិត្តបន្តទណ្ឌកម្មលើកូរ៉េខាងជើងដដែល ដោយបាននិយាយថា កូរ៉េខាងជើងនៅតែបន្តគំរាមកំហែងអាមេរិក។ ការបន្តទណ្ឌកម្មមិនមែនជារឿងប្លែកព្រោះលោក ត្រាំ ធ្លាប់ប្រកាសហើយថា អាមេរិកនឹងបន្តដាក់សម្ពាធលើកូរ៉េខាងជើងរហូតដល់មានការរំសាយនុយក្លេអ៊ែរពិតប្រាកដ ប៉ុន្តែអ្វីដែលប្លែក គឺវាផ្ទុយពីការលើកឡើងរបស់លោក ត្រាំ ផ្ទាល់ ដែលថា ជំនួបនៅសិង្ហបុរីជោគជ័យ។
គ្មានការគំរាមកំហែងពីកូរ៉េខាងជើងទៀតឡើយ។ អាចសម្រាន្តបានស្រួលហើយយប់នេះ។ នេះគឺជាសំណេរខ្លះនៅបណ្ដាញសង្គម Twitter របស់លោកប្រធានាធិបតីអាមេរិក ដូណាល់ ត្រាំ នៅក្រោយជំនួបជាមួយមេដឹកនាំកូរ៉េខាងជើង គីម ជុងអ៊ុន នៅថ្ងៃទី១២ ខែមិថុនា។ ប៉ុន្តែនៅថ្ងៃទី២២ ខែមិថុនា លោក ត្រាំ បានសរសេរសំបុត្រមួយទៅកាន់សភាអាមេរិកដែលសំដៅបន្តដាក់ទណ្ឌកម្មសេដ្ឋកិច្ចលើកូរ៉េខាងជើងទៅវិញ។
ក្នុងសំបុត្រផ្ញើទៅកាន់សភា លោក ត្រាំ ហាក់ជំហរផ្ទុយស្រឡះពីជំហរភ្លាមៗក្រោយជំនួបថ្ងៃទី១២ ខែមិថុនា។ លោកបានពន្យល់ស្ថាប័ននីតិបញ្ញត្តិអាមេរិកពីភាពចាំបាច់ក្នុងការបន្តអនុវត្តទណ្ឌកម្មសេដ្ឋកិច្ចដែលដាក់លើកូរ៉េខាងជើងតាំងពីសម័យរដ្ឋបាលលោក ចច ដាប់បែលយូ ប៊ូស មក។ លោក ត្រាំ និយាយថា វត្តមាន និងការសាយភាយអាវុធដែលអាចប្រើប្រាស់បាននៅឧបទ្វីបកូរ៉េ ក៏ដូចជាសកម្មភាព និងនយោបាយរបស់រដ្ឋាភិបាលកូរ៉េខាងជើង បន្តជាការគំរាមកំហែងលើអាមេរិកដដែល។
«ខ្ញុំបន្តមួយឆ្នាំទៀតនូវភាពអាសន្នរបស់អាមេរិកពាក់ព័ន្ធកូរ៉េខាងជើង»។ នេះជាការបញ្ជាក់របស់លោក ត្រាំ ដែលមានន័យបន្តទណ្ឌកម្មទាំងឡាយរបស់អាមេរិកលើកូរ៉េខាងជើង ដែលផ្សាយដោយទីភ្នាក់ងារព័ត៌មាន AFP ។ តាមពិតទៅ ការគំរាមកំហែងរបស់កូរ៉េខាងជើង បានធ្វើឲ្យរដ្ឋាភិបាលអាមេរិកពីមុន និងអតីតកាលចេញបញ្ជាប្រតិបត្តិចំនួន៦ តាមច្បាប់ស្ដីពីភាពអាសន្នជាតិ។
ការបន្តដាក់ទណ្ឌកម្មមួយឆ្នាំទៀតលើកូរ៉េខាងជើង គឺស្របតាមការសន្យារបស់លោក ត្រាំ ផ្ទាល់នាពេលកន្លងមក។ ពោល គឺបើគ្មានការលុបបំបាត់នុយក្លេអ៊ែរទាំងស្រុងទេ អាមេរិកនឹងបន្តដាក់សម្ពាធគ្រប់យ៉ាងលើកូរ៉េខាងជើងដដែល។ ជានិច្ចកាល អាមេរិកក៏តែងទទូចឲ្យកូរ៉េខាងជើងបោះបង់នុយក្លេអ៊ែររបស់ខ្លួន ជាថ្នូរនឹងការព្យួរទណ្ឌកម្មផង និងផលប្រយោជន៍សេដ្ឋកិច្ចផង ប៉ុន្តែគេមិនទាន់ឃើញមានវិធានការរឹងមាំណាមួយពីកូរ៉េខាងជើងឡើយ។
រឿងដែលភ្ញាក់ផ្អើលនោះ មុនសរសេរសំបុត្រនេះ លោក ត្រាំ ទើបនិយាយថា គ្មានគំរាមកំហែងពីកូរ៉េខាងជើងទៀតទេ។ នៅថ្ងៃទី២១ ខែមិថុនា លោក ត្រាំ បានប្រកាសក្ដែងៗថា កូរ៉េខាងជើងបានចាប់ផ្ដើមការរំសាយនុយក្លេអ៊ែររបស់ខ្លួនហើយ និងបានកម្ទេចទីតាំងសាកល្បងធំៗដល់ទៅ៤កន្លែងទៀតផង។ ប៉ុន្តែពេលនេះ លោកបែរជាយករឿងដដែល ធ្វើជាមូលហេតុបន្តអនុវត្តទណ្ឌកម្មលើកូរ៉េខាងជើងទៅវិញដែរ៕
Tag:
អាមេរិក
កូរ៉េខាងជើង
ដូណាល់ ត្រាំ
ទណ្ឌកម្ម
© រក្សាសិទ្ធិដោយ thmeythmey.com
