អន្តរជាតិ
នយោបាយអន្តរជាតិ
មីយ៉ាន់ម៉ា សុំចិត្តសហគមន៍អន្តរជាតិ«កុំបញ្ឆេះបញ្ហាជនជាតិរ៉ូហ៊ីងយ៉ាឲ្យកាន់តែតានតឹងទៀត»
× រដ្ឋាភិបាលក្រុងណៃពិដោរ បានទទូចសុំសហគមន៍អន្តរជាតិ ដែលរួមមានទាំងភ្នាក់ងារជំនាញរបស់អង្គការសហប្រជាជាតិផងនោះចូលរួមចំណែកដោះស្រាយវិបត្តិជនភៀសខ្លួនរ៉ូហ៊ីងយ៉ាដ៏ស្មុគស្មាញ ជាជាងការបន្ទោស និងថ្កោលទោស ដែលធ្វើឲ្យបញ្ហាកាន់តែពិបាកដោះស្រាយ។
នាសន្និសីទសិទ្ធិមនុស្សប្រចាំក្រុងហ្សឺណែវនៅថ្ងៃ២០ ខែមិថុនា តំណាងរដ្ឋាភិបាលមីយ៉ាន់ម៉ា លោក Myint Thu បានអំពាវនាវដល់សហគមន៍អន្តរជាតិ ដែលរួមទាំងភ្នាក់ងារជំនាញសិទ្ធិមនុស្សអង្គការសហប្រជាជាតិ ( OHCHR ) មើលស្ថានភាពនៅក្នុងរដ្ឋរ៉ាខាន (Rakhine) របស់មីយ៉ាន់ម៉ាក្នុងផ្លូវវិជ្ជមាន និងចូលរួមជាផ្នែកនៃដំណោះស្រាយ។ អ្នកតំណាងរូបនេះ បានតវ៉ាសហគមន៍អន្តរជាតិតាមរយៈវេទិកាសិទ្ធិមនុស្សយ៉ាងដូច្នេះថា៖« ការចុចឈ្មោះប្រទេស និងធ្វើឲ្យមីយ៉ាន់ម៉ារងភាពអាម៉ាស មិនអាចជួយដោះស្រាយស្ថានភាពបានឡើយ។ វា មានតែធ្វើឲ្យបញ្ហាកាន់តែអាក្រក់ទៅវិញនោះទេ។»
លោក Myint Thu បានអះអាងថា មីយ៉ាន់ម៉ាបានរងការរំខានយ៉ាងធ្ងន់ធ្ងរតាមរយៈការបង្កើនការប្រើប្រាស់ព័ត៌មានបែកខ្ញែក ដែលរាប់បញ្ចូលទាំងព័ត៌មានដែលជារបាយការណ៍របស់អង្គការសិទិ្ធមនុស្ស OHCHR ដែលមិនបានគោរពបូរណភាព នៃរដ្ឋអធិបតេយ្យមួយ។ លោក បន្ថែមថា ស្ថានភាពនៅក្នុងរដ្ឋរ៉ាខានមានជាប់ពាក់ព័ន្ធនឹងបញ្ហាច្រើនដែលរួមមានទាំងអធិបតេយ្យភាព ភេរវកម្ម នីតិរដ្ឋ និងសិទ្ធិមនុស្សជាដើម។
គួរជម្រាបផងដែរថា វិបត្តិជនភៀសខ្លួនមីយ៉ាន់ម៉ា ដែលផ្ទុះឡើងតាំងពីខែសីហា ឆ្នាំមុន បានក្លាយជាបន្ទុកមួយដ៏ធ្ងន់សម្រាប់រដ្ឋាភិបាលមីយ៉ាន់ម៉ា ដ្បិតដំណោះស្រាយ ត្រូវមានការប្រុងប្រយ័ត្នបំផុតទាំងសម្រាប់កែវភ្នែកសហគមន៍អន្តរជាតិ និងប្រជាជនក្នុងស្រុក។
ថ្មីៗនេះ រដ្ឋាភិបាលមីយ៉ាន់ម៉ា បានចុះហត្ថលេខាព្រមព្រៀងអនុស្សារណៈយោគយល់ពាក់ព័ន្ធដើម្បីបញ្ជូនជនភៀសខ្លួនពីបង់ក្លាដែសទៅមីយ៉ាន់ម៉ាវិញជាមួយនឹងភ្នាក់ងារជំនាញអង្គការសហប្រជាជាតិ។ ភាគីទាំងពីរ កំពុងតែបន្តនីតិវិធីចរចាលម្អិត ដ្បិតកិច្ចព្រមព្រៀងនេះ ទាមទារឲ្យមីយ៉ាន់ម៉ាត្រូវលះបង់សិទ្ធិអធិបតេយ្យច្រើនដើម្បីផ្តល់លទ្ធភាពឲ្យក្រុមការងារជំនាញរបស់អង្គការអាចអនុវត្តការងារនៅក្នុងតំបន់រងផលប៉ះពាល់៕
Tag:
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com