អន្តរជាតិ
នយោបាយអន្តរជាតិ
រដ្ឋាភិបាលថ្មីមិនទាន់ចាប់ផ្តើមផង រដ្ឋក្មេងខ្ចីទីម័រខាងកើត ជួបរឿងល្អក់កករថ្មីទៀត
× នៅថ្ងៃ២២ មិថុនា ទីម័រខាងកើត បានប្រារព្ធពិធីស្បថចូលកាន់តំណែងរបស់នាយករដ្ឋមន្ត្រីថ្មី លោក Taur Matan Ruak ក្រោមអធិបតីភាពលោកប្រធានាធិបតី Francisco Guterres។ ពិធីស្បថកាន់តំណែងនេះ ក៏បានបង្កជាភាពល្អក់កករមួយ ដ្បិតឥស្សរជនមួយចំនួន ដែលត្រូវបានបក្សឈ្នះឆ្នោតតែងតាំងជារដ្ឋមន្ត្រីក្នុងគណៈរដ្ឋមន្ត្រីថ្មី ត្រូវបានបដិសេធដោយលោកប្រធានាធិបតី Guterres។
នៅបំផុតទីម័រខាងកើត អាចមានអ្នកកាច់ចង្កូតក្បាលម៉ាស៊ីនរដ្ឋាភិបាលថ្មីបានហើយ បន្ទាប់ពីរដ្ឋវ័យក្មេងបំផុតប្រចាំតំបន់អាស៊ីអាគ្នេយ៍មួយនេះ បានជាប់គាំងវិបត្តិនយោបាយអស់រយៈពេលជាង១១ខែហើយនោះ។ ការបញ្ចប់ភាពជាប់គាំងនោះ កើតឡើងតាមរយៈវត្តមាននាយករដ្ឋមន្ត្រីថ្មីគឺ Taur Matan Ruak ដែលត្រូវបានតែងតាំងពីសម្ព័ន្ធបក្សកាន់អំណាចដែលមានសំឡេងក្នុងសភាភាគច្រើន។
យ៉ាងណាក៏ដោយ ស្របជាមួយនឹងការចាប់ផ្តើមនៃក្បាលម៉ាស៊ីនរដ្ឋាភិបាលថ្មីនេះ នយោបាយទីម័រខាងកើតក៏ចាប់ផ្តើមប្រឈមបាតុភាពថ្មី ដែលបង្កជាភាពល្អក់កករសម្រាប់ការដឹកនាំប្រទេស។ នោះក៏ព្រោះតែការខ្វែងគំនិតគ្នាលើការតែងតាំងសមាជិកគណៈរដ្ឋមន្ត្រីថ្មីរវាងលោកប្រធានាធិបតី Francisco Guterres និងសម្ព័ន្ធបក្សកាន់អំណាចដែលដឹកនាំដោយវីរៈបុរសឯករាជ្យជាតិ Xanana Gusmao ។
បើតាមការចុះផ្សាយរបស់សារព័ត៌មានក្នុងស្រុក UCA នាថ្ងៃស្បថចូលកាន់តំណែង មានតែឥស្សរជន៣២រូបនៃឥស្សរជនសរុប ៤៣ ដែលត្រូវបានសម្ព័ន្ធបក្សកាន់អំណាចតែងតាំងជារដ្ឋមន្ត្រី និងអនុរដ្ឋមន្ត្រី បានចូលរួម។ ១១រូបផ្សេងទៀត អវត្តមាន ដ្បិតត្រូវបានប្រធានាធិបតីបដិសេធទទួលសំណើតែងតាំងក្រោមមូលហេតុ ឥស្សរជនទាំងនេះ កំពុងតែស្ថិតក្រោមការស៊ើបអង្កេតពុករលួយ។
តាមប្រភពព័ត៌មានដដែលនោះ ជាការតវ៉ា នៃការបដិសេធទទួលយកការតែងតាំងបេក្ខភាពសមាជិកគណៈរដ្ឋមន្ត្រីទាំង១១រូប ប្រមុខសម្ព័ន្ធបក្សកាន់អំណាច និងជាអតីតប្រធានាធិបតី និងនាយករដ្ឋមន្ត្រីទីម័រខាងកើត លោក Xanana Gusmao បានពហិកាចូលរួមកម្មវិធីផងដែរ។
សូមជម្រាបផងដែរថា ទីម័រខាងកើត ជារដ្ឋអធិបតេយ្យមួយ ដែលប្រកាន់របបដឹកនាំតាមបែប«ពាក់កណ្តាលប្រធានាធិបតី»។ របបនេះ បោះឆ្នោតជ្រើសប្រធានាធិបតី និងសភាដាច់ដោយឡែកពីគ្នា។ ប្រធានាធិបតី ត្រូវបានជ្រើសរើសតាមរយៈការបោះឆ្នោតរបស់ប្រជាពលរដ្ឋ ខណៈនាយករដ្ឋមន្ត្រី ត្រូវបានជ្រើសតាំងពីបក្សឈ្នះឆ្នោតសភា និងទទួលស្គាល់ដោយប្រធានាធិបតី។
ប្រព័ន្ធនយោបាយបែបនេះ តម្រូវឲ្យមេដឹកនាំ ឬអ្នកនយោបាយ ធ្វើសម្បទាន និងការចរចាជាមួយនឹងគ្នាច្រើន។ ជាក់ស្តែងប្រធានាធិបតីទីម័រខាងកើតបច្ចុប្បន្ន គឺជាសមាជិកនៃបក្សប្រឆាំងទីម័រខាងកើតនោះទេ។ ដូច្នេះហើយទើបបានជា ភាគីទាំងពីរ មានការពិបាកក្នុងការស្រុះស្រួលគ្នាបែបនេះ។
គួររម្លឹកមួយទៀតនោះគឺ មុននៃការចាប់ផ្តើមបង្កើតក្បាលម៉ាស៊ីននេះ ទីម័រខាងកើត ក៏ជួបប្រទះការជាប់គាំងវិបត្តិនយោបាយជាច្រើនដងរួចទៅហើយ បន្ទាប់ពីការបោះឆ្នោតសភាឆ្នាំ២០១៧ មក។ វិបត្តិនោះគឺ រដ្ឋាភិបាលដែលកើតចេញពីបក្សប្រឆាំងទីម័រខាងកើតបច្ចុប្បន្ន មិនអាចអនុម័តច្បាប់សំខាន់ៗរបស់ប្រទេសបាន ដ្បិតមិនមានសំឡេងគាំទ្រគ្រប់គ្រាន់នៅក្នុងសភា៕
Tag:
ទីម័រខាងកើត
នយោបាយ
© រក្សាសិទ្ធិដោយ thmeythmey.com