អន្តរជាតិ
ប្រមុខការពារជាតិអាមេរិកទៅចិន ដើម្បីពិភាក្សាពីជម្លោះសមុទ្រចិនខាងត្បូង និងនុយក្លេអ៊ែរកូរ៉េខាងជើង
× រដ្ឋមន្ត្រីការពារជាតិអាមេរិកលោក ជេម ម៉ាធីស នឹងបំពេញទស្សនកិច្ចនៅក្នុងប្រទេសចិនសប្តាហ៍នេះ ដើម្បីស្វែងរកការពិភាក្សាពាក់ព័ន្ធនឹងបញ្ហានុយក្លេអ៊ែរកូរ៉េខាងជើង។ ក្រៅពីនេះ តំណាងក្រុងវ៉ាស៊ីនតោនក៏នឹងផ្តោតលើបញ្ហាជម្លោះសមុទ្រចិនខាងត្បូងដ៏ចម្រូងចម្រាសផងដែរ ស្របពេលដែលចិនបានដំឡើងសព្វាវុធលើកោះសិប្បនិម្មិតក្នុងតំបន់ជម្លោះរួចទៅហើយនោះ។
នៅសប្តាហ៍នេះ ប្រមុខការពារជាតិអាមេរិកនឹងចាប់ផ្តើមដំណើទស្សនកិច្ចទៅកាន់ប្រទេសចិន កូរ៉េខាងត្បូង និង ជប៉ុន។ គោលដៅសំខាន់នៃដំណើរទស្សនកិច្ចនេះគឺ ផ្តោតសំខាន់លើបញ្ហាតំបន់មានដូចជាវិបត្តិនុយក្លេអ៊ែរកូរ៉េខាងជើង និងបញ្ហាជម្លោះសមុទ្រចិនខាងត្បូងដែលនៅបន្តកើនកម្តៅផង។
បើតាមការចុះផ្សាយរបស់ទីភ្នាក់ងារព័ត៌មាន AFP ប្រមុខការពារជាតិអាមេរិកលោក ម៉ាធីស នឹងជួបមន្ត្រីយោធាជាន់ខ្ពស់ចិននៅថ្ងៃអង្គារទី ២៦ ខែមិថុនា ដើម្បីស្នើសុំឲ្យក្រុងប៉េកាំងបន្តដាក់សម្ពាធលើកូរ៉េខាងជើងឲ្យបោះបង់អាវុធនុយក្លេអ៊ែរតាមការសន្យារបស់ខ្លួន។
គេដឹងច្បាស់ថា ការរំសាយអាវុធនេះជាលក្ខខណ្ឌចម្បងដែលត្រូវកូរ៉េខាងជើងបានសន្យាក្នុងជំនួបប្រវត្តិសាស្ត្ររវាងលោក គីម ជុងអ៊ុន ជាមួយប្រធានាធិបតីអាមេរិក ដូណាល់ ត្រាំ នៅសិង្ហបុរីកាលពីថ្ងៃ ១២មិថុនានោះ។
នៅថ្ងៃអាទិត្យទី ២៤ ខែមិថុនា លោក ម៉ាធីស បានបញ្ជាក់ប្រាប់អ្នកសារព័ត៌មានថា អាមេរិក ជប៉ុន កូរ៉េខាងត្បូង និងចិនមានគោលដៅរួមគ្នា គឺធានាថា វានឹងមានការរំសាយសព្វាវុធពេញលេញ មិនអាចត្រឡប់ក្រោយបាន និងអាចផ្ទៀងផ្ទាត់បានច្បាស់លាស់ផង។
ក្រោយចាកចេញពីចិននៅថ្ងៃព្រហស្បតិ៍ លោក ម៉ាធីស នឹងបន្តដំណើរទៅកាន់កូរ៉េខាងត្បូង និងជប៉ុនទៀតដោយលោកនឹងជួបមួយសមភាគីកូរ៉េខាងត្បូង Song Young-Moo និង សមភាគីជប៉ុន Itsunori Onodera ទៀត។
ជំនួបជាមួយប្រមុខការពារជាតិកូរ៉េខាងត្បូង និងជប៉ុននេះ លោកម៉ាធីស នឹងពន្យល់សម្ព័ន្ធមិត្តទាំងពីរពាក់ព័ន្ធនឹងជំហរអាមេរិកក្នុងការជួយធានាសន្តិសុខតំបន់។ លោកនឹងប្រាប់ថា ជំហរអាមេរិកនឹងមិនប្រែប្រួលនោះឡើយ បើទោះបីជាប្រធានាធិបតី ត្រាំ បានប្រកាសផ្អាកសមុទ្រយោធាជាមួយកូរ៉េខាងត្បូងដែលជាសម្បទានដ៏ធំទៅឲ្យកូរ៉េខាងជើងក៏ដោយ។
ម៉ាធីសទៅឈ្លេចសួរចិន ពីមហិច្ឆតាពិតប្រាកដ ក្រោយដំឡើងសព្វាវុធនៅសមុទ្រចិនខាងត្បូង
តាមពិតទៅ វាជាដំណើរទស្សនកិច្ចលើកទីប្រាំពីរហើយមកកាន់តំបន់អាស៊ីក្រោយលោក ម៉ាធីស ឡើងកាន់តំណែងរដ្ឋមន្ត្រីការពារជាតិអាមេរិកនោះ។ ប៉ុន្តែទស្សនកិច្ចរបស់មន្ត្រីយោធាអាមេរិកជាន់ខ្ពស់លើកនេះកើតឡើងចំពេលដែលទំនាក់ទំនងទ្វេភាគីរវាងចិន និងអាមេរិកកាន់តែតានតឹងខ្លាំងផង ដោយសារជម្លោះពាណិជ្ជកម្ម សន្តិសុខអ៊ីនធឺណិត និងបញ្ហាផ្សេងទៀតផង។
យ៉ាងណាដោយ វាមិនមែនជារឿងចម្លែកទេ ដែលពេលបំពេញទស្សនកិច្ចនៅចិន លោក ម៉ាធីស នឹងលើកយកជម្លោះសមុទ្រចិនខាងត្បូងដាក់លើតុពិភាក្សាជាមួយភាគីចិននោះ។ លោកក៏ទំនងជានឹងឆ្លៀតឈ្លេចសួរនាំមន្ត្រីចិនផងដែរពីគោលបំណងពិតប្រាកដនៃការដំឡើងសព្វាវុធ បើទោះជាចិនអះអាងម្តងជាពីរដងថា សព្វាវុធគឺសម្រាប់ការពារខ្លួនប៉ុណ្ណោះ។
ប្រមុខការពារជាតិអាមេរិក បារម្ភខ្លាំងពីបញ្ហាសន្តិសុខអាស៊ីប៉ាស៊ីហ្វិក ក្រោយពេលក្រុងប៉េកាំងដំឡើងសព្វាវុធនៅលើកោះជម្លោះសមុទ្រចិនខាងត្បូងនោះ។ លោកបានថ្លែងថា ចិនកំពុងបង្កើនមហិច្ឆតាយុទ្ធសាស្ត្ររបស់ខ្លួន និងបង្កើនអំណាចយោធាកាន់តែធំនៅក្នុងតំបន់ប៉ាស៊ីហ្វិកផងដែរ។ គេនៅចាំបានថា លោក ម៉ាធី ធ្លាប់ហៅចិនថា ជាដៃគូប្រជែងយុទ្ធសាស្ត្រ និងជាតួអង្គដែលគំរាមកំហែងសន្តិសុខធំបំផុតរបស់អាមេរិកផង ពេលលោកបញ្ចេញយុទ្ធសាស្ត្រការពារជាតិថ្មីរបស់អាមេរិក។
ដោយឡែក កាលពីខែឧសភាកន្លងមក ដើម្បីបង្ហាញអារម្មណ៍មិនពេញចិត្តចិន ក្រុងវ៉ាស៊ីនតោនសម្រេចមិនអញ្ជើញក្រុងប៉េកាំងឲ្យចូលរួមក្នុងសមយុទ្ធយោធប៉ាស៊ីហ្វិក RIMPAC ២០១៨ ខណៈដែលប្រទេសប្រហែល ២០ ដែលនឹងមានវត្តមានក្នុងសមយុទ្ធទ្រង់ទ្រាយធំប្រចាំឆ្នាំនេះ។
ប៉ុន្មានសប្តាហ៍ក្រោយមក នៅក្នុងវេទិកាសន្តិសុខ Shagri-la នៅសិង្ហបុរី ប្រមុខការពារជាតិអាមេរិកខាងលើស្រាប់តែចេញទិតៀនចិនម្តងទៀតជុំវិញការបង្ហាញឥរិយាបថគឃ្លើនបំពានប្រយោជន៍ប្រទេសដទៃនៅក្នុងសមុទ្រចិនខាងត្បូង។ លោក ម៉ាធីស បានចោទប្រកាន់ចំៗថា ការដំឡើងសព្វាវុធនៅក្នុងតំបន់ជម្លោះនេះជាមហិច្ឆតារបស់ចិនក្នុងការឈានទៅប្រើប្រាស់កម្លាំងយោធាគំរាមកំហែង និងបង្ខំឲ្យបណ្តាប្រទេសដទៃខ្លាចខ្លួន។
យ៉ាងណាក៏ដោយ ភាគីចិនបានទាត់ចោលការចោទប្រកាន់ និងបានបកស្រាយថា សព្វាវុធដែលខ្លួនបានដំឡើងនៅលើកោះនោះមិនមែនប្រើប្រាស់ដើម្បីគំរាមកំហែងអ្នកណាឡើយ ប៉ុន្តែដើម្បីការពារខ្លួនប៉ុ ណ្ណោះ៕
Tag:
អាមេរិក
ចិន
សមុទ្រចិនខាងត្បូង
កូរ៉េខាងជើង
© រក្សាសិទ្ធិដោយ thmeythmey.com