អន្តរជាតិ
ហុងឌូរ៉ាស៖ រាល់ថ្ងៃមនុស្សជាច្រើនបញ្ចុះបញ្ចូលឲ្យហុងឌូរ៉ាសបោះបង់តៃវ៉ាន់ ហើយក្រសោបចិន
× ខណៈពេលដែលតៃវ៉ាន់ កំពុងតែធ្លាក់ចុះឥទ្ធិពលការទូត និងថែមទាំងបាត់បង់កល្យាណមិត្តជាបន្តបន្ទាប់នោះ ប្រទេសសម្ព័ន្ធមិត្តប្រចាំតំបន់អាមេរិកឡាទីន ហុងឌូរ៉ាស បានចេញថ្លែងការណ៍លើកទឹកចិត្តដល់រដ្ឋាភិបាលតៃវ៉ាន់ និងថែមទាំងប្តេជ្ញាពង្រឹងទាំងទំនាក់ទំនងរវាងរដ្ឋនិងរដ្ឋ ក៏ដូចជាប្រជាជននិងប្រជាជននៃប្រទេសទាំងពីរឲ្យកាន់តែល្អប្រសើរ។
អគ្គរដ្ឋទូតហុងឌូរ៉ាស ប្រចាំក្រុងតៃប៉ិ នៃកោះតៃវ៉ាន់ លោក Rafael Sierra បានធ្វើសេចក្តីថ្លែងការណ៍មួយ ដោយបានអះអាងថា រដ្ឋាភិបាលរបស់លោក ពិតជារងសម្ពាធច្រើនទាំងខាងក្នុង និងខាងក្រៅជុំវិញការរក្សាទំនាក់ទំនងការទូជាមួយតៃវ៉ាន់។ សម្ពាធនោះគឺ មិនខុសពីអតីតកល្យាណមិត្តតៃវ៉ាន់ផ្សេងទៀត ហុងឌូរ៉ាស ត្រូវពិចារណាគួរបន្តនៅជាមួយតៃវ៉ាន់ ឬងាកទៅក្រសោបចិនវិញ។
តាមការចុះផ្សាយរបស់សារព័ត៌មានសិង្ហបុរី Today Online នៅថ្ងៃ២៤ មិថុនា លោកអគ្គរដ្ឋទូត បានបញ្ជាក់យ៉ាងដូច្នេះថា៖« រៀងរាល់ថ្ងៃ យើងមានសម្ពាធច្រើនណាស់ .... មានមនុស្សជាច្រើន បន្តជជែកជាមួយនឹងប្រធានាធិបតីហុងឌូរ៉ាស ដោយនិយាយម្តងហើយម្តងទៀតថា តោះយើងទៅរកចិន តោះយើងទៅរកចិន»។
តាមប្រភពព័ត៌មានដដែលនោះ លោកអគ្គរដ្ឋទូត ក៏បានលើកឡើងពីជំហររដ្ឋាភិបាលរបស់លោកទៅកាន់តៃវ៉ាន់ យ៉ាងដូច្នេះថា៖« ខ្ញុំបានប្រាប់តៃវ៉ាន់ថា អ្នកត្រូវតែឆ្លាត។ រដ្ឋាភិបាលចិន កំពុងតែបង្ហាញឥទ្ធិពលក្នុងកម្រិតខ្ពស់ ខណៈអ្នកនៅតែអនុវត្តគោលនយោបាយការទូតត្រឹមត្រូវ»។
លោក ថែ្លងបែបនេះរួចហើយបន្តទៀតថា ស្ថានភាពនយោបាយរវាងតៃវ៉ាន់ និងចិន គឺជារឿងដ៏ស្មុគស្មាញ ដែលពិតជាជះឥទ្ធិពលដល់ហុងឌូរ៉ាស។ លោកបន្ថែមថា វាហាក់ដូចជាមានការប្រយុទ្ធមួយ ដើម្បីរុញច្រានគ្រប់ប្រទេសទាំងអស់ឲ្យនៅឆ្ងាយពីតៃវ៉ាន់។
យ៉ាងណាក៏ដោយ មន្ត្រីការបរទេសហុងឌូរ៉ាសរូបនេះ បានបញ្ជាក់ថា ពេលនេះហុងឌូរ៉ាស មិនទៅណាចោលតៃវ៉ាន់ឡើយ។ លោកក៏បានទទូចឲ្យមានការផ្លាស់ប្តូររវាងប្រជាជនប្រទេសទាំងពីរឲ្យកាន់តែរឹងមាំ ហើយក្រុមហ៊ុនតៃវ៉ាន់កាន់តែច្រើនទៅវិនិយោគនៅហុងឌូរ៉ាស និងផ្លាស់ប្តូរបច្ចេកវិទ្យាជាន់ខ្ពស់របស់តៃវ៉ាន់ទៅកាន់ហុងឌូរ៉ាសជាដើម។
គួរជម្រាបផងដែរ មកទល់ពេលនេះ មានតែប្រទេស និងរដ្ឋចំនួន ១៨ប៉ុណ្ណោះ ដែលនៅតែបន្តទទួលស្គាល់ទំនាក់ទំនងការបរទេសជាមួយនឹងតៃវ៉ាន់ ដែលក្នុងនោះតំបន់ដែលតៃវ៉ាន់នៅសេសសល់សម្ព័ន្ធច្រើនជាងគេ គឺនៅក្នុងតំបន់អាមេរិកឡាទីននោះឯង។ ត្រឹមតែរយៈពេលខ្លីប៉ុណ្ណោះ តៃវ៉ាន់បានបាត់សម្ព័ន្ធមិត្តពីរជាបន្តបន្ទាប់រួមមាន បួគីណា ហ្វាសូ និងសាធារណរដ្ឋដូមីនិក។
រដ្ឋាភិបាលតៃវ៉ាន់ ចោទរដ្ឋាភិបាលចិនពេញៗមាត់ថា ការបាត់បង់សម្ព័ន្ធមិត្តរបស់ខ្លួន ក៏ព្រោះតែគោលនយោបាយដុល្លាររបស់ក្រុងប៉េកាំង៕
Tag:
ហុងឌូរ៉ាស
ចិន
តៃវ៉ាន់
© រក្សាសិទ្ធិដោយ thmeythmey.com