អន្តរជាតិ
បារាំងដឹកនាំរដ្ឋអឺរ៉ុប ៨ បង្កើតកងកម្លាំងអន្តរាគមន៍ថ្មីមួយដើម្បីការពារអឺរ៉ុប
× ប្រទេសអឺរ៉ុបប្រាំបួនត្រៀមឯកភាពគ្នាលើគម្រោងបង្កើតកងកម្លាំងយោធាសម្រាប់ការអន្តរាគមន៍នៅអឺរ៉ុបនៅដើមសប្តាហ៍នេះ។ គំនិតផ្តួចផ្តើមនេះត្រូវបានដឹកនាំដោយប្រមុខរដ្ឋបារាំង និងបានទទួលការគាំទ្រខ្លាំងពីសំណាក់ចក្រភពអង់គ្លេសដែលត្រៀមលែងលះជាមួយសហភាពអឺរ៉ុបផងដែរ។
គំនិតផ្តួចផ្តើមរបស់ប្រធានាធិបតីបារាំងលោក អេម៉ានុយអែល ម៉ាក្រុង ក្នុងការបង្កើតកម្លាំងយោធាអន្តរាគមន៍របស់អឺរ៉ុប (European Intervention Initiative) ជិតចេញរូបរាងហើយ។ នៅថ្ងៃចន្ទទី ២៥ មិថុនានេះ ប្រទេសសមាជិកប្រាំបួននឹងអនុម័តយកគម្រោងនេះ។
បើតាមទីភ្នាក់ងារព័ត៌មាន AFP ដែលដកស្រង់សម្តីរដ្ឋមន្ត្រីការពារជាតិបារាំងលោកស្រី Florence Parly សមាជិកប្រាំបួននោះមានដូចជា បារាំង អាល្លឺម៉ង់ បែលហ្ស៊ិក អង់គ្លេស ដាណឺម៉ាក ហូឡង់ អេស្តូនី អេស្ប៉ាញ និងព័រទុយកាល់។
បើតាមការអះអាងរបស់មេដឹកនាំបារាំងកន្លងមក ការបង្កើតកម្លាំងទ័ពពិសេសតែមានលក្ខណៈទ្រង់ទ្រាយតូចនេះគឺដើម្បីឆ្លើយតបនឹងវិបត្តិមានឆាប់រហ័ស និងមានប្រសិទ្ធិភាព ព្រោះគេអាចពង្រាយកងទ័ពងាយស្រួលជាងកិច្ចសហប្រតិបត្តិការធំៗ។
សម្រាប់បារាំង កងទ័ពនេះអាចនឹងអន្តរាគមន៍ដោះស្រាយបញ្ហានានាដែលគំរាមកំហែងសន្តិសុខអឺរ៉ុប ជម្លៀសប្រជាជន និងឆ្លើយតបនឹងគ្រោះមហន្តរាយធម្មជាតិជាដើម។ ហើយវាក៏អាចសម្រេចធ្វើការងារបានដាច់ណាត់ និងដោយសេរី មិនសូវមានបន្ទុកធ្ងន់ដូច បក្សសម្ព័ន្ធយោធាណាតូ ឬគំនិតផ្តួចផ្តើមយោធាផ្សេងទៀតឡើយ។
គេឃើញអង់គ្លេសដែលត្រៀមដើរចេញពីសហភាពអឺរ៉ុបចូលរួមជាសមាជិកនៃគំនិតផ្តួចផ្តើមថ្មីនេះដែរព្រោះគំនិតផ្តួចផ្តើមថ្មីនេះវាដាច់ដោយឡែកពីកិច្ចសហប្រតិបត្តិការអឺរ៉ុបដែលមានស្រាប់។ ដូច្នេះ វាបង្កការងារស្រួលសម្រាប់ប្រទេសដែលចង់ចូលរួមទោះជាមិនមែនសមាជិកសហភាពអឺរ៉ុបក៏ដោយ។
តាំងពីដើមមក អង់គ្លេសពិតជាចង់បន្តកិច្ចសហប្រតិបត្តិការជាមួយបណ្តាប្រទេសអឺរ៉ុបជាពិសេសវិស័យការពារជាតិនេះតែម្តង បើទោះជាខ្លួននឹងលែងជាសមាជិកសហភាពអឺរ៉ុបក៏ដោយ។ អង់គ្លេសមើលឃើញពីផលលំបាកជាពិសេសការគំរាមកំហែងនានាដែលអង់គ្លេសពិបាកប្រឈមម្នាក់ឯង។
ចាប់ពីឆ្នាំ ២០០៧ មក សហភាពអឺរ៉ុបមានកងកម្លាំងយោធាចម្រុះបួនផ្សេងគ្នា ប៉ុន្តែដោយសារការមិនេកភាពគ្នាលើបញ្ហានយោបាយ កងម្លាំងនេះមិនដែលត្រូវបានគេប្រើប្រាស់និងពង្រាយឡើយ។ កាលពីខែធ្នូឆ្នាំមុន សមាជិកសហភាពអឺរ៉ុបចំនួន ២៥ បានសម្រេចចុះកិច្ចព្រមព្រៀងការពាជាតិទ្រង់ទ្រាយធំមួយដោយភាគីបានសហការគ្នាបង្កើតកិច្ចសហប្រតិបត្តិការលើវិស័យជាច្រើន ប៉ុន្តែគេមិនបានដឹងច្បាស់ថា អង់គ្លេសត្រូវបានគេអនុញ្ញាតឲ្យចូលរួមឬអត់ឡើយ។
ក្រៅពីប្រទេស ៩ ខាងលើ អ៊ីតាលីក៏ចង់ចូលរួមក្នុងគំនិតផ្តួចផ្តើមនេះដែរដើមឡើយ ប៉ុន្តែរដ្ឋាភិបាលថ្មីកំពុងពិចារណាឡើងវិញ និងសម្រេចចិត្តនៅឡើយថាគួរចូលរួមឬអត់។ មកដល់ពេលនេះ គេក៏មិនទាន់ឃើញមានការសម្រេចចិត្តជាផ្លូវការឡើយទេ៕
Tag:
បារាំង
សហភាពអឺរ៉ុប
European Intervention Initiative
© រក្សាសិទ្ធិដោយ thmeythmey.com