អន្តរជាតិ
កូរ៉េខាងជើងរៀបចំរម្លឹក«ខួបសង្គ្រាមកូរ៉េ» តែមិនមានវោហាសព្ទនយោបាយវាយប្រហារអាមេរិក
× កូរ៉េទាំងពីរនាំគ្នារៀបចំខួប ៦៨ នៃសង្គ្រាមកូរ៉េនៅថ្ងៃចន្ទទី ២៥ មិថុនាដើមសប្តាហ៍នេះ។ អ្វីដែលគេកត់សម្គាល់នោះគឺ នៅកូរ៉េខាងជើងមិនមានការឃោសនាណាមួយទិតៀន និងប្រឆាំងសហរដ្ឋអាមេរិកដូចសព្វដងឡើយ។ មិនត្រឹមតែប៉ុណ្ណោះ កូរ៉េទាំងពីរក៏កំពុងជជែកគ្នាបន្ថែមលើការដកកាំភ្លើងធំពីព្រំដែនផងដែរ។
ប្រព័ន្ធផ្សព្វផ្សាយរដ្ឋកូរ៉េខាងជើងរៀងរាល់ថ្ងៃ ២៥ ខែមិថុនា ដែលជាថ្ងៃកូរ៉េខាងជើងលើកកងទ័ពឈ្លានពានកូរ៉េខាងត្បូងកាលពី ៦៨ឆ្នាំមុននោះ តែងតែបញ្ចេញវោហាសព្ទនយោបាយដែលប្រឆាំងអាមេរិក។
កូរ៉េខាងជើងជាលក្ខណៈប្រពៃណីទៅហើយបានបន្តចោទថា សហរដ្ឋអាមេរិកនេះជាអ្នកបង្កើតឲ្យសង្គ្រាមរវាងកូរ៉េទាំងពីរកើតឡើង ព្រោះវាជាយុទ្ធសាស្ត្រឈានទៅគ្រប់គ្រងពិភពលោក។ ក្រុងព្យុងយ៉ាងក៏ចោទផងដែរថា អាមេរិកធ្វើឲ្យកូរ៉េបែងចែកជាពីរដោយមានការឯកភាពគ្នាជាមួយសហភាពសូវៀតក្រោយចប់សង្គ្រាម កាលនោះផង។
យ៉ាងណាមិញ បើតាមការចុះផ្សាយរបស់ទីភ្នាក់ងារព័ត៌មាន AFP ការររៀបចំខួបនៃសង្គ្រាមបងប្អូនកូរ៉េទាំងពីរនៅឆ្នាំនេះ វាមិនមានការឃោសនានយោបាយដែលមានលក្ខណៈប្រឆាំងអាមេរិកទៀតនោះឡើយ។
សារព័ត៌មានរដ្ឋកូរ៉េខាងជើង Rodong Sinmun មានបទវិចារណកថាមួយដែលរៀបរាប់ពីការតស៊ូងប្រឹប្រែងពលីរបស់ប្រជាជន និងទាហានកូរ៉េខាងជើងក្នុងការការពារបូរណភាពទឹកដីក្នុងអំឡុងពេលសង្គ្រាម និងទប់ទល់បច្ចាមិត្ត។
ប៉ុន្តែវាមិនមានការហៅឈ្មោះសត្រូវចំៗដូចពីមុនឡើយ។ គេនៅចាំបានច្បាស់ថា កាលពីឆ្នាំមុន បទវិចាណកថាដែលមានប្រាំមួយទំព័ររបស់កូរ៉េខាងជើងបានរិះគន់អាមេរិកចំៗមិនសំចៃមាត់ ហើយថែមទាំងហៅអាមេរិកថា ជា«មហាអំណាចចក្រពត្តិ» ដែលសម្លាប់រង្គាលប្រជាជនកូរ៉េយ៉ាងព្រៃផ្សៃថែមទៀតផង។
អាចនិយាយបានថា វាជាសញ្ញាវិជ្ជមានខណៈ ព្រោះកូរ៉េខាងជើងនិងអាមេរិកបន្តចរចាគ្នាទៀតដើម្បីឈានទៅរំសាយអាវុធនុយក្លេអ៊ែរដូចការចង់បានរបស់ប្រធានាធិបតីអាមេរិក ដូណាល់ ត្រាំ និងការសន្យារបស់លោក គីម ជុងអ៊ុននោះ ក្រោយកិច្ចប្រជុំប្រវត្តិសាស្ត្រនៅសិង្ហបុរីថ្ងៃ ១២ មិថុនានោះ។
មិនត្រឹមតែមានការបន្ថយពាក្យសម្តីដែលទិតៀនអាមេរិក ប៉ុណ្ណោះ កូរ៉េខាងជើងក៏កំពុងជជែកពិភាក្សាជាមួយកូរ៉េខាងត្បូងផងដែរជុំវិញការឈានទៅដកកាំភ្លើងធំពីព្រំដែនប្រទេសទាំងពីរ។ នាយករដ្ឋមន្ត្រីកូរ៉េខាងត្បូងលោក Lee Nak-yon បានបង្ហើបថា ភាគីទាំងពីរកំពុងស្ថិតក្នុងដំណាក់កាលពិភាក្សា និងឈានទៅដកកាំភ្លើងធំនេះឲ្យផុតពីព្រំដែន។
កូរ៉េខាងជើងមានកាំភ្លើងធំប្រហែល ១០០០ នៅតាមព្រំដែន ហើយវាជាការគំរាមកំហែងខ្លាំងបំផុតសម្រាប់កូរ៉េខាងត្បូងព្រោះក្រុងសេអ៊ូលស្ថិតនៅចម្ងាយត្រឹម ៥០ គីឡូម៉ែត្រប៉ុណ្ណោះពីព្រំដែននោះ។ បើសិនមានគ្រោះអាសន្នកើតឡើង សេអ៊ូលត្រូវរងគ្រោះខ្លាំងជាក់ជាមិនខាន៕
Tag:
អាមេរិក
សង្គ្រាមកូរ៉េ
កូរ៉េខាងជើង
© រក្សាសិទ្ធិដោយ thmeythmey.com