អន្តរជាតិ
ឡាវ ត្រៀមលក់សញ្ញាបណ្ណក្នុងផ្សារភាគហ៊ុន ក្រោយបានបទពិសោធន៍ពីប្រទេសជិតខាង និងដៃគូអាស៊ាន
× រដ្ឋាភិបាលក្រុងវៀងចន្ទន៍ កំពុងរៀបចំចេញផ្សាយសញ្ញាបណ្ណ ឬបណ្ណបំណុលនៅលើផ្សារមូលបត្ររបស់ខ្លួន។ នេះ គឺជាដំណើរការទៅមុខមួយនៃផ្សារភាគហ៊ុនរបស់ប្រទេសក្រីក្ររបស់ពិភពលោកមួយនេះ បន្ទាប់ពីបានដាក់ដំណើរការអស់រយៈពេលជិតមួយទសវត្សរ៍ហើយនោះ។
លោកស្រីអគ្គលេខាធិការទីផ្សារមូលបត្រឡាវ Saysamone Chanthachack បានឲ្យដឹងថា រដ្ឋាភិបាលឡាវ កំពុងស្ថិតនៅក្នុងដំណាក់កាល នៃការរៀបចំឯកសារ របៀបរបប និងបទបញ្ជានិងក្របខណ្ឌផ្នែកច្បាប់ចាំបាច់ដើម្បីចុះបញ្ជីសញ្ញាបណ្ណរបស់រដ្ឋាភិបាលនៅក្នុងផ្សារភាគហ៊ុនឡាវ។ នេះបើយោងតាមការចុះផ្សាយរបស់សារព័ត៌មានឡាវ Laotiane Times នៅថ្ងៃ២៥ មិថុនា។
លោកស្រីអគ្គលេខាធិការរូបនេះ ថ្លែងថា នីតិវិធីសម្រាប់ការចេញផ្សាយ ឬដាក់លក់សញ្ញាបណ្ណរបស់រដ្ឋាភិបាលឡាវ នឹងត្រូវបញ្ចប់នៅក្នុងឆ្នាំនេះហើយ។ លោកស្រីសង្កត់ធ្ងន់ថា តាមគម្រោងរដ្ឋាភិបាលគ្រោងនឹងចុះបញ្ជីសញ្ញាបណ្ណនៅក្នុងផ្សាយភាគហ៊ុននាពេលខាងមុខដ៏ខ្លី ខណស្ថាប័នដែលនឹងត្រូវទទួលខុសត្រូវលើការសម្រេចចិត្ត គឺក្រសួងហិរញ្ញវត្ថុឡាវ។ ផលិតផលដែលរដ្ឋាភិបាលគ្រោងចុះបញ្ជីដាក់លក់នោះគឺ ការតភ្ជាប់បណ្តាញ( The Local Capital Market Pipeline )។
តាមលោកស្រីអគ្គលេខាធិការនៃផ្សារមូលបត្រឡាវដដែលនោះ គម្រោងនៃបោះសញ្ញាបណ្ណរបស់រដ្ឋាភិបាល ធ្វើឡើងដោយផ្អែកតាមបទពិសោធន៍ ដែលឡាវបានរៀនសូត្រពីបណ្តាប្រទេសជិតខាង និងប្រទេសដៃគូអាស៊ានបូកបី ដែលរួមមាន ចិន ជប៉ុន និងកូរ៉េខាងត្បូង ដែលបានអនុវត្តទៅប្រកបដោយជោគជ័យហើយនោះ។
សូមជម្រាបថា មូលបត្ររដ្ឋ ឬសញ្ញាបណ្ណ គឺជាការដាក់ធានាបំណុល ដែលចេញប្រកាសដោយរដ្ឋាភិបាល។ សញ្ញាបណ្ណ ដែលដាក់លក់នៅផ្សារភាគហ៊ុន ឬផ្សារមូលបត្ររបស់ប្រទេស បើកចំហឲ្យមានការទិញលក់ពីទាំងអ្នកវិនិយោគបរទេស និងអ្នកវិនិយោគក្នុងស្រុក។ ភាគច្រើនរដ្ឋាភិបាលចេញផ្សាយសញ្ញាបណ្ណដើម្បីទាក់ទាញអ្នកវិនិយោគដើម្បីវិនិយោគលើគម្រោងអភិវឌ្ឍរបស់ខ្លួន។
ត្រលប់មកកាន់ការដំណើរការផ្សារមូលបត្រឡាវបន្តិច។ បើតាមសារព័ត៌មាន Laotian Times ផ្សារមូលបត្រឡាវ ត្រូវបានដាក់ដំណើរនៅក្នុងប្រទេសតាំងពីឆ្នាំ២០១០មក ក្រោមការគាំទ្រទាំងផ្នែកបច្ចេកទេស និងហិរញ្ញវត្ថុពីកូរ៉េខាងត្បូង។ ថៃ ដែលជាអ្នកជិតខាងជឿនលឿនហើយនោះ កន្លងមក ក៏បានជួយជ្រោមជ្រែងឡាវផ្នែកបច្ចេកទេសផងដែរ៕
Tag:
ឡាវ
អាស៊ាន
ផ្សារភាគហ៊ុន
© រក្សាសិទ្ធិដោយ thmeythmey.com