វេជ្ជបណ្ឌិត៖ កុមារថៃ១២នាក់ និងគ្រូពួកគេ នៅមានជីវិតដោយសារផឹកទឹកពីផ្ទាំងថ្ម

អន្តរជាតិ

វេជ្ជបណ្ឌិត៖ កុមារថៃ១២នាក់ និងគ្រូពួកគេ នៅមានជីវិតដោយសារផឹកទឹកពីផ្ទាំងថ្ម

04, Jul 2018 , 8:39 pm

រូបភាព

ដោយ: ទេព ពិទូរ្យ

ក្រុមវេជ្ជបណ្ឌិតដែលចូលរួមក្នុងប្រតិបត្តិការរុករកបាននិយាយថាសមាជិកក្រុមកីឡាបាល់ទាត់យុវជនថៃទាំង១៣នាក់ដែលបានបាត់ខ្លួនអស់រយៈពេល ១០ថ្ងៃ ហើយនៅតែអាចរស់រានមានជីវិតបាន ដោយសារពួកគេស្ថិតនៅក្នុងល្អាងមានសំនើម និងទឹកផឹកដែលសើមស្រក់ពីលើផ្ទាំងថ្មក្នុងរូងភ្នំនោះ។

ក្មេងប្រុសអាយុចន្លោះពី ១១ ទៅ១៦ឆ្នាំព្រមទាំងគ្រូបង្វឹកបាល់ទាត់ម្នាក់អាយុ២៥ឆ្នាំដែលបាត់ខ្លួនតាំងពីថ្ងៃទី២៣ ខែមិថុនា ក្នុងរូងភ្នំ Tham Luang Nang Non ត្រូវបានក្រុមអ្នកមុជទឹកអង់គ្លេសរកឃើញស្ថិតនៅទីទួលដែលស្ថិតក្នុងរូងភ្នំនោះកាលពីថ្ងៃទី២ ខែកក្កដា ហើយពួកគេនៅមានសុវត្ថិភាពធម្មតាដោយគ្រាន់តែខ្សោយកំលាំងប៉ុណ្ណោះ។

មានមនុស្សជាច្រើនឆ្ងល់ថា ហេតុអ្វីក្មេងទាំង១៣នាក់នោះនៅតែអាចមានជីវិតរស់ បើទោះបីអត់ចំនីអាហារ និងទឹកស្អាតរហូតដល់ទៅ១០ថ្ងៃ។

ទីភ្នាក់ងារព័ត៌មាន AFP ផ្សាយដូច្នេះថា បើតាមអ្នកជំនាញគ្រូពេទ្យដែលមានវត្តមានក្នុងព្រឹត្តិការណ៍រុករកនោះលើកឡើងថាក្មេងៗទាំងនោះអាចមានជីវិតរស់បានព្រោះពួកបានផឹកទឹកដែលមានជាតិរ៉ែជាកំណកទឹកស្រក់ពីផ្ទាំងថ្មដែលមានរាងស្រួចៗដូចផ្ទាំងទឹកកនៅក្នុងរូងភ្នំដោយសារភ្លៀងពីខាងក្រៅ។ សំណើមទឹកជាប់នឹងផ្ទាំងថ្មនោះ ក៏ជាបច្ច័យល្អដើម្បីទ្រទ្រង់បរិយាកាសដល់ទីតាំងដែលក្មេងស្ថិតនៅដែរ។

បច្ចុប្បន្ន សមាជិកទាហានជើងទឹកថៃ ៧នាក់ដែលមានជំនាញមុជទឹករួមទាំងគ្រូពេទ្យ និងអ្នកព្រឹក្សាម្នាក់កំពុងស្ថិតនៅជាមួយជនរងគ្រោះទាំងអស់នោះ។ ដោយស្ថានភាពផ្លូវក្នុងរូងភ្នំត្រូវលិចទឹកអស់និងមានចម្ងាយឆ្ងាយពីមាត់រូងផងនោះទើបធ្វើឲ្យពិបាកនាំពួកគេមុជទឹកដើម្បីចេញពីរូងភ្នំ។ ជារួម គឺចាំបាច់ត្រូវបង្រៀនឲ្យពួកគេចេះមុជទឹកដើម្បីហែលឆ្លងកាត់តាមផ្លូវទឹកដែលជាច្រកក្រោមដីដ៏ស្មុគស្មាញ និងជាគ្រោះថ្នាក់ដ៏ធំមួយផងដែរ៕