អន្តរជាតិ
ប្រធានអាស៊ានសិង្ហបុរីប្រកាសផ្តល់ជំនួយនិងការផ្គត់ផ្គង់នានាដល់ប្រជាជនឡាវក្នុងគ្រាអាសន្ន នាយករដ្ឋមន្ត្រីសិង្ហបុរី លោក Lee Tsein Loong។ រូបថត AFP
× សិង្ហបុរីបានចេញសាររំលែកទុក្ខជូនដល់ប្រជាជនឡាវដែលកំពុងរងគ្រោះដោយសារករណីបាក់ទំនប់វារីអគ្គិសនី Xe Pien-Xe Namnoy ។ ក្នុងនាមជាប្រធានអាស៊ានឆ្នាំនេះផង សិង្ហបុរីបានប្រកាសត្រៀមផ្តល់ជំនួយ និងការផ្គត់ផ្គង់នានាដល់រដ្ឋាភិបាលឡាវសម្រាប់ការសង្គ្រោះប្រជាជនដែលរងផលប៉ះពាល់ដោយសារគ្រោះមហន្តរាយនេះ ដែរ។
ក្រសួងការបរទេសសិង្ហបុរីបានចេញសេចក្តីថ្លែងការណ៍មួយនៅថ្ងៃអង្គារទី ២៤ ខែកក្កដាថា សិង្ហបុរីត្រៀមខ្លួនផ្តល់ជំនួយ និងការផ្គត់ផ្គង់នានាដែលចាំបាច់បន្ទាន់ដើម្បីជួយគាំទ្រដល់រដ្ឋាភិបាលឡាវក្នុងប្រតិបត្តិការសង្គ្រោះប្រជាជនដែលរងគ្រោះដោយសារករណីបាក់ទំនប់វារីអគ្គិសនីនៅឡាវ។
ដោយឡែក នាយករដ្ឋមន្ត្រីសិង្ហបុរីលោក លី សៀនឡុង វិញបានបង្ហោះសារតាមគណនីហ្វេសប៊ុកផ្លូវការដោយបង្ហាញអារម្មណ៍សោកស្តាយពេកក្រៃចំពោះឧបទ្ទវហេតុដែលកើតមានឡើងនៅឡាវដែលធ្វើឲ្យមនុស្សស្លាប់និងខូចខាតធ្ងន់ធ្ងរ។ ថ្វីបើមិនទាន់ដឹងច្បាស់ថាការខូចខាតមានទំហំប៉ុណ្ណាក្តី លោក លី សង្កត់ធ្ងន់ថា ខាងរដ្ឋាភិបាលសិង្ហបុរីបានទាក់ទងទៅរដ្ឋាភិបាលឡាវរួចហើយដើម្បីផ្តល់ជំនួយក្នុងគ្រាអាសន្ននេះហើយ។
«យើងសោកស្តាយណាស់ដែលបានដឹងពីករណីបាក់ទំនប់វារីអគ្គីសនី Xe Pien-Xe Namnoy នៅឡាវ។ យើងសូមចូលរំលែកទុក្ខយ៉ាងជ្រាលជ្រៅចំពោះអ្នកដែលរងផលប៉ះពាល់ដោយសារសោកនាដកម្មនេះ។ យើងបានទាក់ទងភាគីឡាវដើម្បីផ្តល់ជំនួយ ហើយយើងបានប្រាប់ឲ្យភាគីឡាវដឹងថាសិង្ហបុរីត្រៀមខ្លួនជានិច្ចដើម្បីជួយតាមអ្វីដែលយើងអាចធ្វើបាន»។ លោក លី សៀនឡុងបានសរសេរបែបនេះ។
រដ្ឋមន្ត្រីការបរទេសសិង្ហបុរីលោក វីវៀន បាឡាសគ្រីស្នាន់ (Vivian Balashkrisnan) ក៏ចេញសាររំលែកទុក្ខចំពោះប្រជាជនឡាវដូចគ្នានៅថ្ងៃអង្គារម្សិលមិញ។ លោកបានអះអាងថា លោកបានទាក់ទងផ្ទាល់ទៅកាន់រដ្ឋមន្ត្រីការបរទេសឡាវលោក Saleumxay Kommasith រួចរាល់ហើយដើម្បីផ្តល់ជំនួយនិងការគាំទ្រដល់ប្រជាជនឡាវក្នុងពេលប្រឈមគ្រោះមហន្តរាយនេះដូចគ្នា។
ហេតុការណ៍បាក់ទំនប់វារីអគ្គិសនី បានកើតឡើងនៅរាត្រីថ្ងៃទី២៣ ខែកក្កដា នៅក្នុងខេត្ត Attapeu ។ ទឹកចំនួន៥ពាន់លានម៉ែត្រគីប ត្រូវបានហូរចេញពីទំនប់ ដែលសម្លាប់មនុស្សជាច្រើន និងរាប់រយនាក់ទៀតនៅបន្តបាត់ខ្លួននៅឡើយ។ គម្រោងវារីអគ្គិសនីដែលមានសមត្ថភាព ៤១០មេហ្គាវ៉ាត់នេះ ត្រូវបានវិនិយោគដោយក្រុមហ៊ុនថៃ កូរ៉េខាងត្បូង និងឡាវ ហើយគ្រោងនឹងចាប់ផ្ដើមដំណើរការនៅឆ្នាំ២០១៩ ។
ក្រោយឧបទ្ទវហេតុកើតមានឡើង អាជ្ញាធរថ្នាក់មូលដ្ឋានបានទទូចឲ្យរដ្ឋាភិបាលចេញចំណាត់ការផ្តល់ជំនួយសម្រាប់គ្រាអាសន្នមានសម្លៀកបំពាក់ ចំណីអាហារ ទឹក និងថ្នាំសង្កូវផងដែរ។ គណៈកម្មការជាតិឡាវទទួលបន្ទុកការពារនិងគ្រប់គ្រងគ្រោះមហន្តរាយបានជួបពិភាក្សាគ្នាបន្ទាន់ និងដាក់ចេញវិធានការចាំបាច់ក៏ដូចជាកញ្ចប់មូលនិធិដើម្បីឆ្លើយតបនឹងតម្រូរការជាក់ស្តែងក្នុងប្រតិបត្តិការសង្គ្រោះ។ នាយករដ្ឋមន្ត្រីឡាវលោក Thongloun Sisoulith បានសម្រេចពន្យារពេលប្រជុំគណៈរដ្ឋមន្ត្រី ហើយធ្វើដំណើរទៅកាន់តំបន់ដែលរងគ្រោះដើម្បីតាមដានស្ថានការណ៍ និងត្រួតពិនិត្យមើលការអន្តរាគមន៍ជួយសង្គ្រោះប្រជាពលរដ្ឋផង៕
Tag:
ឡាវ
សិង្ហបុរី
អាស៊ាន
Xe Pien-Xe Namnoy
© រក្សាសិទ្ធិដោយ thmeythmey.com