អន្តរជាតិ
លោក ស៊ី ជិនភីង អំពាវនាវឲ្យមហាអំណាចសេដ្ឋកិច្ចថ្មី BRICS បន្តបើកចំហសេដ្ឋកិច្ច និងគាំទ្រប្រទេសក្រីក្រ
× ប្រធានាធិបតីចិនលោក ស៊ី ជិនភីង បានអំពាវនាវឲ្យមេដឹកនាំប្រទេសមហាអំណាចសេដ្ឋកិច្ចថ្មីសមាជិក ក្រុម BRICS បន្តបើកចំហសេដ្ឋកិច្ច, ពង្រឹងកិច្ចសហប្រតិបត្តិការ និងគាំទ្រប្រទេសក្រីក្រឲ្យអភិវឌ្ឍរហ័ស។ មេដឹកនាំចិនលើកឡើងបែបនេះ ស្របពេលដែលសង្គ្រាមពាណិជ្ជកម្មរវាងចិននិងអាមេរិកកំពុងបន្តឆាបឆេះដែលធ្វើឲ្យពិភពលោកព្រួយបារម្ភខ្លាំងដែរ។
នាវេទិកាជំនួបកំពូលប្រទេសមហាអំណាចសេដ្ឋកិច្ចជាន់ថ្មី BRICS នៅទីក្រុង Johannesburg ប្រទេសអាហ្វ្រិកខាងត្បូង សង្គ្រាមពាណិជ្ជកម្មរវាងមហាអំណាចពិភពលោកជាពិសេសរវាងអាមេរិក និងចិនគ្រប់ដណ្តប់វេទិកាទាំងមូល។ ប្រធានាធិបតីលោក ស៊ី ជិនភីង បានទទូចឲ្យប្រទេសជាមិត្តជាពិសេសសមាជិក BRICS ចៀសឲ្យផុតពីសង្គ្រាមដែលគ្មានអ្នកឈ្នះនេះដែរ។
បើតាមទីភ្នាក់ងារព័ត៌មាន Xinhua លោក ស៊ី ជិនភីង បានអះអាងថា៖«សង្គ្រាមពាណិជ្ជកម្មមិនល្អឡើយ ព្រោះគ្មានអ្នកណាឈ្នះទេ។ ពង្រឹងអនុត្តរភាពសេដ្ឋកិច្ចតែម្នាក់ឯងគឺរឹតតែគ្រោះថ្នាក់ ព្រោះវានឹងធ្វើឲ្យខូចខាតដល់ប្រយោជន៍រួមរបស់សហគមន៍អន្តរជាតិ។ អ្នកដែលបន្តធ្វើសកម្មភាពទាំងនេះត្រឹមតែធ្វើឲ្យគ្រោះថ្នាក់ដល់ខ្លួនប៉ុណ្ណោះពេលចុងក្រោយ»។
តាមពិតទៅ សង្គ្រាមពាណិជ្ជកម្មរវាងអាមេរិកនិងចិនផ្ទុះឡើងជាផ្លូវការកាលពីដើមខែកក្កដាកន្លងមកនេះ។ សមរភូមិនេះចាប់ផ្តើមដោយការដំឡើងពន្ធ ២៥ ភាគរយជំហានដំបូងរបស់អាមេរិកប្រឆាំងទំនិញចិនដែលមានទំហំ ៣៤ ពាន់លានដុល្លារដែលទំនិញទាំងនោះមានយ៉ាងតិច ៨០០ មុខផ្សេងគ្នារួមបញ្ចូលទាំងគ្រឿងម៉ាស៊ីនឧស្សាហកម្ម, គ្រឿងបរិក្ខារសុខាភិបាល និងគ្រឿងបន្លាស់រថយន្តជាដើម។ ឯចិនវិញសងសឹកអាមេរិកភ្លាមៗដែរដោយដាក់ពន្ធលើទំនិញ ៥៤៥មុខនាំមកពីអាមេរិក ដែលភាគច្រើនជាផលិតផលកសិកម្មរួមមានផលិតផលអាហារសមុទ្រ សាច់ សណ្តែកសៀង និងពោតជាដើម។
ក្រៅពីពន្យល់ពីផលវិបាកនៃសង្គ្រាមពាណិជ្ជកម្ម លោក ស៊ី ក៏បានស្នើឲ្យមេដឹកនាំប្រទេស BRICS បន្តតស៊ូមតិ និងជំរុញកិច្ចសហប្រតិបត្តិការឈ្នះឈ្នះដើម្បីធ្វើយ៉ាងណាបន្តកសាងសេដ្ឋកិច្ចដែលបើកចំហ, ជំរុញការច្នៃប្រឌិត, ការពារកិច្ចសហប្រតិបត្តិការពហុភាគី, អភិវឌ្ឍអភិបាលកិច្ចសកល និងធានាឲ្យបាននូវការអភិវឌ្ឍប្រកបដោយបរិយាប័ន្នដើម្បីប្រយោជន៍ប្រជាជនទូទៅ។
មេដឹកនាំដែលមានឥទ្ធិពលបំផុតក្នុងប្រវត្តិសាស្ត្រចិនបន្ទាប់ពីប្រធាន ម៉ៅ សេទុង ខាងលើនេះក៏ឆ្លៀតអំពាវនាវឲ្យបណ្តាប្រទេស BRICS បន្តរួមចំណែកជួយគាំទ្រដល់រដ្ឋកំពុងអភិវឌ្ឍ និងបណ្តាសេដ្ឋកិច្ចរីកលូតលាស់ថ្មីឲ្យលូតលាស់បានរហ័ស និងទទួលបានប្រយោជន៍ពីសាកលភាវូបនីយកម្មផង។
មេដឹកនាំចិនក៏បានលើកឡើងពីគំនិតផ្តួចផ្តើមរួមដែលមានស្រាប់ដូចជា កិច្ចសហប្រតិបត្តិការត្បូង-ត្បូងដែលមានប្រទេសកំពុងអភិវឌ្ឍជាសមាជិក។ វេទិកាកិច្ចសហប្រតិបតិ្តការនេះមានតួនាទីស្នូលក្នុងការធានាបើកទ្វារចំហ ធានាស្ថានភាពវិនិយោគដែលរាក់ទាក់, ពង្រឹងនិងការពារកម្មសិទ្ធិបញ្ញា ក៏ដូចជាបង្កើនការនាំចេញ។
ចំណែកគំនិតផ្តួចផ្តើមខ្សែក្រវាត់មួយវិថីមួយ (OBOR) របស់ចិនវិញ លោក ស៊ី ជិនភីង បានសង្កត់ធ្ងន់ផងដែរថា វានឹងជួយដើម្បីបង្កើតឱកាសថ្មីទាំងសង្គម និងសេដ្ឋកិច្ចសម្រាប់បណ្តាប្រទេសទាំងអស់ដែលចូលរួម និងអាចសម្រេចបានគោលដៅអភិវឌ្ឍប្រកបដោយនិរន្តរភាពរបស់អង្គការសហប្រជាជាតិឆ្នាំ ២០៣០ផងដែរ៕
Tag:
ស៊ី ជិនភីង
BRICS
ចិន
© រក្សាសិទ្ធិដោយ thmeythmey.com