អន្តរជាតិ
អ្នកជំនាញ៖ ទ័ពជើងទឹករុស្ស៊ីគួរមាននាវាដឹកយន្តហោះចម្បាំងយ៉ាងហោច ៤គ្រឿង រូបភាព AP
× អ្នកជំនាញបានផ្តល់យោបល់ថា កងទ័ពជើងទឹករុស្ស៊ីត្រូវផ្តោតសំខាន់លើការកសាងសមត្ថភាពនិងឥទ្ធិពលរបស់ខ្លួនតាមរយៈការបង្កើនចំនួនសព្វាវុធសំខាន់ៗ។ បច្ចុប្បន្នរុស្ស៊ីមានត្រឹមនាវាដឹកយន្តហោះមួយគ្រឿងប៉ុណ្ណោះ ប៉ុន្តែតាមស្ថានភាពជាក់ស្តែងរុស្ស៊ីត្រូវការនាវាដឹកយន្តហោះយ៉ាងហោចណាស់ក៏ បួនគ្រឿងដែរ។
ប្រធានមជ្ឈមណ្ឌលស្រាវជ្រាវវិទ្យាសាស្ត្ររដ្ឋ Krylov របស់រុស្ស៊ីលោក Valery Polovinkin បានអះអាងប្រាប់ទីភ្នាក់ងារព័ត៌មានរុស្ស៊ី TASS ថា បើតាមទ្រឹស្តីកងនាវារុស្ស៊ីប្រចាំភាគខាងជើងនិងប៉ាស៊ីហ្វិកត្រូវការនាវាដឹកយន្តហោះបួនគ្រឿង។
« តាមការវាយតម្លៃបែបវិទ្យាសាស្ត្រ នាវាមិនអាចបន្តប្រតិបត្តិការមិនឈប់ឡើយ ហើយវាត្រូវបន្តទទួលការថែទាំ ជួសជុល និងកែលម្អជាដើម។ ដូច្នេះហើយ វាចាំបាច់ត្រូវមាននាវាពីរក្នុងតំបន់មួយៗ»។ លោក Polovinkin បាននិយាយដូច្នេះ។
អ្នកជំនាញខាងលើបានបន្ថែមថា នាវាដឹកយន្តហោះរបស់រុស្ស៊ីនៅពេលអនាគតគឺត្រូវមានទម្ងន់ចន្លោះពី ប្រាំមួយតោនដល់មួយសែនតោន ហើយទម្ងន់នេះអាចប្រែប្រួលទៅតាមម៉ាស៊ីន នោងថាមពលរបស់នាវានីមួយៗផងដែរ។
តាមពិតទៅវិទ្យាស្ថានស្រាវជ្រាវ Krylov មានឈ្មោះល្បីល្បាញដោយសារស្ថាប័ននេះមានតួនាទីចម្បងក្នុងការរៀបចំ និងរចនានាវាដឹកយន្តហោះសម្រាប់អតិថិជននានានៅបរទេសកន្លងមក។ ដល់ឥឡូវនេះស្ថាប័ននេះក៏ចាប់ផ្តើមផ្តោតលើការផ្តល់សេវាកម្មដល់អតិថិជនក្នុងស្រុកផងដែរ។
បច្ចុប្បន្ននេះ រុស្ស៊ីមានត្រឹមនាវាដឹកយន្តហោះមួយគ្រឿងប៉ុណ្ណោះគឺ Admiral Kuznetsov ដែលទើបទទួលបានការកែលម្អទ្រង់ទ្រាយធំប៉ុន្មានខែមុននេះ។ កងទ័ពជើងទឹករុស្ស៊ីបានអះអាងថា ខ្លួននឹងអាចទទួលបាននាវាដឹកយន្តហោះដើរដោយថាមពលនុយក្លេអ៊ែរនៅចុងឆ្នាំ ២០៣០ ហើយនាវាទាំងនោះមានទម្ងន់មិនក្រោមប្រាំពីរម៉ឺនតោនឡើយ។
ខណៈដែលរុស្ស៊ីមានត្រឹមនាវាដឹកយន្តហោះចម្បាំងមួយគ្រឿងនោះ សហរដ្ឋអាមេរិកវិញ មាននាវាដឹកយន្តហោះសរុបរហូតដល់ ១១ គ្រឿងឯណោះ ហើយនាវាអាមេរិកភាគច្រើនត្រូវបានពង្រាយទៅកាន់តំបន់ជាច្រើនលើពិភពលោកផងដើម្បីពង្រឹងអំណាចយោធារបស់ខ្លួន។
Tag:
អាមេរិក
រុស្ស៊ី
នាវាដឹកយន្តហោះ
© រក្សាសិទ្ធិដោយ thmeythmey.com