អន្តរជាតិ
អតីតជើងឯកកីឡាគ្រីឃីតប៉ាគីស្ថានប្រកាសឈ្នះឆ្នោត តែបក្សកាន់អំណាចទាត់ចោលលទ្ធផល
× អតីតជើងឯកកីឡាគ្រីឃីតដែលក្លាយជាអ្នកនយោបាយលោក Imran Khan បានប្រកាសជ័យជម្នះក្នុងការបោះឆ្នោតសាកលដ៏តានតឹងខ្លាំង និងពោរពេញដោយភាពមិនប្រក្រតីកាលពីថ្ងៃពុធទី ២៥ ខែកក្កដាកន្លងមក។ លទ្ធផលផ្លូវការមិនទាន់ត្រូវបានគេប្រកាសនៅឡើយទេ ប៉ុន្តែប្រព័ន្ធផ្សព្វផ្សាយក្នុងស្រុកវាយតម្លៃថា អ្នកនយោបាយខាងលើបានសំឡេងគាំទ្រភាគច្រើនមែន។
ស្របពេលដែលបញ្ហាចម្រូងចម្រាសរឿងបោះឆ្នោតបន្តកើតឡើង ហើយលទ្ធផលផ្លូវការត្រូវគេពន្យារពេលប្រកាសឲ្យសាធារណជនបានដឹងនោះ បេក្ខជននាយករដ្ឋមន្ត្រីនៃបក្សប៉ាគីស្ថាន Tehreek-e-Insaf លោក Imran Khan ចេញមុខថ្លែងសារទៅកាន់ប្រជាជាតិ។ លោកប្រកាសថា បក្សលោកឈ្នះការបោះឆ្នោតភ្លូកទឹកភ្លូកដីផង។
បើតាមការចុះផ្សាយរបស់ទីភ្នាក់ងារព័ត៌មាន AFP លោក Khan បានចាត់ទុកការបោះឆ្នោតលើកនេះថាជាជោគជ័យដ៏ធំសម្រាប់ប៉ាគីស្ថាន និងអះអាងថា វាមានតម្លាភាពល្អថែមទៀតផង។ ប៉ុន្តែគេដឹងច្បាស់ថា ការបោះឆ្នោតនេះមានហិង្សាប្រដាប់អាវុធធ្ងន់ធ្ងរ កេងបន្លំសន្លឹកឆ្នោតនិងភាពមិនប្រក្រតីច្រើនទៀតផង។
ពីរដ្ឋធានីអ៊ីស្លាម៉ាបាដ លោក Khan និយាយតាមកញ្ចក់ទូរទស្សន៍ដូច្នេះ៖«យើងទទួលជោគជ័យ ហើយយើងទទួលបានអំណាចដឹកនាំប្រទេសលើកនេះ។ គ្មានឡើយជនរងគ្រោះដោយសារបញ្ហានយោបាយនោះ។ ព្រះបានផ្តល់ឱកាសឲ្យខ្ញុំបានឡើងកាន់អំណាចដើម្បីអនុវត្តគោលនយោបាយនិងមនោគមន៍វិជ្ជាដែលខ្ញុំចាប់ផ្តើមកាលពី ២២ ឆ្នាំមុន»។
អ្វីដែលគួរឲ្យចាប់អារម្មណ៍ក្នុងពេលថ្លែងសារនយោបាយនេះដែរ អនាគតនាយករដ្ឋមន្ត្រីប៉ាគីស្ថានបានសន្យាដោះស្រាយបញ្ហាក្តៅមួយចំនួនក្នុងសង្គមប៉ាគីស្ថាន និង ពង្រឹងទំនាក់ទំនងជាមួយប្រទេសជាមិត្ត និង ប្រទេសជិតខាងផង។ លោកប្តេជ្ញាចិត្តធ្វើយ៉ាងណាកម្ចាត់បញ្ហាពុករលួយស៊ីរូងផ្ទៃក្នុងឲ្យខាងតែបាននៅពេលលោកកាន់អំណាចជាផ្លូវការ។
ពាក់ព័ន្ធទំនាក់ទំនងជាមួយប្រទេសដទៃ អតីតកីឡាករដ៏ល្បីនេះបានសន្យារក្សាតុល្យភាពក្នុងទំនាក់ទំនងជាមួយសម្ព័ន្ធមិត្តអាមេរិកដើម្បីធានាប្រយោជន៍ភាគីទាំងពីររយៈពេលវែងផង។ ប៉ុន្តែអ្វីដែលសំខាន់លោក Khan ក៏ត្រៀមខ្លួនអង្គុយតុចរចាជាមួយឥណ្ឌាដែលជាសត្រូវសួរពូជដើម្បីដោះស្រាយជម្លោះទឹកដីកាស្មៀរដែលបន្សល់ទុកតាំងពីម្ចាស់អាណានិគមនិយមអង់គ្លេសចាកចេញឆ្នាម ១៩៤៧ មកនោះ។
ថ្វីបើមានលោក Khan ប្រកាសជ័យជម្នះបែបនេះក្តី គណបក្សធំៗមួយចំនួន រួមទាំងបក្សកាន់អំណាចដឹកនាំដោយអតីតនាយករដ្ឋមន្ត្រី Nawaz Sharif បានទាត់ចោលលទ្ធផល និងចោទប្រកាន់ថា ការបោះឆ្នោតនេះមិនត្រឹមត្រូវ និងយុត្តិធម៌ឡើយ។ បក្សលោក Sharif បានព្រមានចាត់វិធានការទាំងផ្នែកនយោបាយ និងផ្លូវច្បាប់ដើម្បីឆ្លើយតបនឹងលទ្ធផលបោះឆ្នោតនេះដែរ។
ខាងអ្នកជំនាញបានវាយតម្លៃថា គណបក្សឈ្នះឆ្នោត Tehreek-e-Insaf អាចនឹងចាប់ដៃជាមួយគណបក្សនយោបាយផ្សេងទៀតដើម្បីបង្កើតរដ្ឋាភិបាលចម្រុះផងបើសិនជាភាគីនយោបាយអាចចរចា និងស្វែងរកដំណោះស្រាយរួមគ្នាបាន។ ប៉ុន្តែវាក៏មានក្តីបារម្ភខ្លាំងដែរថា ភាពចលាចលផ្នែកនយោបាយកើតឡើងកាន់តែធ្ងន់ធ្ងរពេលភាគីមិនអាចស្វែងរកដំណោះស្រាយរួមគ្នាបាននោះ៕
Tag:
Imran Khan
ប៉ាគីស្ថាន
© រក្សាសិទ្ធិដោយ thmeythmey.com