អន្តរជាតិ
អតីតរដ្ឋមន្ត្រីការបរទេស ឃីស៊ីងហ្គឺ ធ្លាប់ជំរុញឲ្យលោក ត្រាំ ចាប់ដៃរុស្ស៊ីដើម្បីទប់ជាមួយចិន
× អតីតរដ្ឋមន្ត្រីការបរទេសអាមេរិក ហេនរី ឃីស៊ីងហ្គឺ (Henry Kissinger) បានផ្តល់យោបល់ឲ្យលោក ដូណាល់ ត្រាំពង្រឹងទំនាក់ទំនងជាមួយរុស្ស៊ីកន្លងមក ដើម្បីទប់ទល់ជាមួយការរះត្រដែតឡើងរបស់មហាយក្សចិន។ លោក ឃីស៊ីងហ្គឺធ្លាប់នាំឲ្យរដ្ឋបាលអាមេរិកចាប់ដៃគ្នាជាមួយចិនដើម្បីប្រឆាំងសហភាពសូវៀតដែលក្នុងអំឡុងឆ្នាំ ១៩៧០នោះ។
សារព័ត៌មានអាមេរិក Daily Beast បានដកស្រង់ប្រភពផ្សេងគ្នាជាច្រើនថា អតីតប្រមុខការទូតអាមេរិកលោក ឃីស៊ីងហ្គឺ បានផ្តល់ប្រឹក្សាយោបល់ច្រើនលើកដល់ប្រធានាធិបតី ត្រាំ ស្តារទំនាក់ទំនងជាមួយរុស្ស៊ីដើម្បីប្រយោជន៍ការទូតអាមេរិក។ ចាប់ដៃរុស្ស៊ីគឺដើម្បីទប់ទល់ជាមួយចិនប៉ុណ្ណោះ។
តាមប្រភពព័ត៌មានដដែល អ្នកការទូតអាមេរិកជើងចាស់និងល្បីល្បាញនេះបានផ្តល់យោបល់ដល់លោក ត្រាំ តាំងពីចុងឆ្នាំ ២០១៦ ពេលដែលលោក ត្រាំ ត្រៀមស្បថចូលកាន់តំណែង។ ក្រៅពីលោក ត្រាំ លោកក៏ផ្តល់យោបល់ទៅទីប្រឹក្សាជាន់ខ្ពស់ និងជាកូនប្រសារលោក ត្រាំ គឺលោក Jared Kushner។
លោក ឃីស៊ីងហ្គឺ ក៏គាំទ្រចំពោះជំនួបរវាងលោក ត្រាំ និងលោក វ្ល៉ាឌីមៀ ពូទីន កាលពីសប្តាហ៍មុនដែរព្រោះវាត្រួសត្រាយផ្លូវសម្រាប់ការពង្រឹងកិច្ចសហប្រតិបត្តិការរួមគ្នា។ លោកនិយាយបែបនេះ៖ «ជំនួបនេះវាត្រូវកើតឡើង។ ខ្ញុំតស៊ូមតិដើម្បីឲ្យមានកិច្ចប្រជុំបែបនេះច្រើនឆ្នាំហើយ»។
យ៉ាងណាមិញ ក្រៅពីលោក ឃីស៊ីងហ្គឺ មន្ត្រីជាន់ខ្ពស់ក្រសួងការបរទេស មន្ទីរបញ្ចាកោណ និងទីប្រឹក្សាសន្តិសុខជាតិសុទ្ធតែបានផ្តល់យោបល់ប្រហាក់ប្រហែលគ្នានេះដែរចំពោះប្រធានាធិបតី។ ពួកគេជឿជាក់ថា ការចាប់ដៃបង្កើតសម្ព័ន្ធភាពជាមួយរុស្ស៊ីជារឿងមិនអាចខ្វះបាន និងអាចទប់ទល់ជាមួយចិនបានយ៉ាងមានប្រសិទ្ធភាពទៀត។
ក្រៅពីរុស្ស៊ី អ្នកយុទ្ធសាស្ត្រអាមេរិកព្យាយាមតស៊ូមតិឲ្យអាមេរិកស្រវាចាប់ប្រទេសផ្សេងទៀតក្នុងតំបន់មានហ្វីលីពីន, ឥណ្ឌា ជប៉ុន ប្រទេសមជ្ឈិមបូព៌ា និងតួអង្គផ្សេងទៀតដែលអាចជួយទប់ឥទ្ធិពលចិន និងរក្សាអនុត្តរភាពអាមេរិកផងដែរ។
តាមពិតទៅលោក ឃីស៊ីងហ្គឺ មានឈ្មោះល្បីដោយសារលោកជាតួអង្គសំខាន់ដែលជំរុញការកសាងស្ពានសម្ព័ន្ធភាពរវាងរដ្ឋបាលលោក រីឆាត និចសុន ជាមួយរដ្ឋាភិបាលចិនដើម្បីប្រឆាំងសហភាពសូវៀតអំឡុងឆ្នាំ ១៩៧០នោះ។
យ៉ាងណាក៏ដោយចុះ យោបល់របស់លោក ឃីស៊ីងហ្គឺដែលចង់ឲ្យអាមេរិកងាកទៅរករុស្ស៊ីនោះនៅតែជាសំណួរនៅឡើយ។ អ្នកជំនាញនៅតែមានមន្ទិលសង្ស័យ ចំពោះសមត្ថភាពអាមេរិកក្នុងការហួសទាញរុស្ស៊ីឲ្យចាប់ដៃខ្លួន និងប្រឆាំងចិននៅពេលអនាគតនោះ។
ដូចឃើញស្រាប់កាលពីសប្តាហ៍មុន លោក ពូទីន បានបំពេញទស្សនកិច្ចទៅកាន់ក្រុងប៉េកាំងតបតាមការអញ្ជើញរបស់លោក ស៊ី ជិនភីង។ ប្រមុខរដ្ឋរុស្ស៊ីរូបនេះបានកោតសរសើរទំនាក់ទំនងរវាងរុស្ស៊ីនិងចិន និងអះអាងថា ទំនាក់ទំនងនេះកើនដល់កម្រិតខ្ពស់បំផុតមិនធ្លាប់មាន ហើយភាគីក៏បានចុះកិច្ចព្រមព្រៀងជាច្រើនរួមគ្នាគ្របដណ្តប់លើវិស័យពាណិជ្ជកម្ម សន្តិសុខ និងលំហរអាកាសផងដែរ។ ភាគីក៏សន្យាបន្តពង្រឹងកិច្ចសហប្រតិបត្តិការយុទ្ធសាស្ត្រដើម្បីដោះស្រាយបញ្ហាប្រឈមអន្តរជាតិដែលស្មុគស្មាញនោះ។
Tag:
រុស្ស៊ី
ចិន
អាមេរិក
ហេនរី ឃីស៊ីងហ្គឺ
© រក្សាសិទ្ធិដោយ thmeythmey.com