លោក បែ មករា ស្នើសហព័ន្ធបង្ហាញភស្តុតាងពាក់ព័ន្ធនឹងការពិន័យលោក ហៅ សុជាតិ

កីឡាជាតិ

ជាតិ

លោក បែ មករា ស្នើសហព័ន្ធបង្ហាញភស្តុតាងពាក់ព័ន្ធនឹងការពិន័យលោក ហៅ សុជាតិ

27, Jul 2018 , 8:59 pm

រូបភាព

លោក បែ មករា (ស្តាំ) និងលោក ហៅ សុជាតិ

ដោយ: ថ្មីៗ

អ្នកចាត់ការទូទៅក្លិបបឹងកេតលោក បែ មករា អះអាងថា លោកបានដាក់បណ្តឹងសុំសម្រាលទោសទៅកាន់គណៈកម្មការឧទ្ធរណ៍នៃសហព័ន្ធកីឡាបាល់ទាត់កម្ពុជារួចហើយ ពាក់ព័ន្ធនឹងការរពិន័យរបស់លោក ហៅ សុជាតិ គ្រូបង្វឹកបឹងកេត។ ទន្ទឹមនឹងទទួលស្គាល់ទោសកំហុសមួយចំនួន ថ្នាក់ដឹកនាំរូបេនេះ ស្នើឲ្យគណៈកម្មការវិន័យបង្ហាញភ័ស្តុតាង ពាក់ព័ន្ធការចោទប្រកាន់។

ក្រោយគណៈកម្មការវិន័យនៃសហព័ន្ធកីឡាបាល់ទាត់កម្ពុជា ទុកពេលឲ្យ៥ថ្ងៃ ដើម្បីប្តឹងឧទ្ធរណ៍ពាក់ព័ន្ធរឿងពិន័យលោក ហៅ សុជាតិ មិនឲ្យពាក់ព័ន្ធបាល់ទាត់រយៈពេល១ខែ និងថវិកា៥០ម៉ឺនរៀល។ នៅថ្ងៃទី២៧ ខែកក្កដា ឆ្នាំ២០១៨ លោក បែ មករា អ្នកចាត់ការទូទៅក្លិបបឹងកេតបានបញ្ជាក់ថា លោកបានបណ្តឹងទៅកាន់គណៈកម្មការឧទ្ធរណ៍នៃសហព័ន្ធកីឡាបាល់ទាត់រួចហើយ។

លោក បែ មករា អះអាងថា បណ្តឹងឧទ្ធរណ៍របស់ក្លិបបឹងកេត គឺក្នុងន័យសុំសម្រាលទោស មិនមែនបដិសេធសេចក្តីសម្រេចទាំងស្រុងនោះទេ។ ព្រោះមានចំណុចមួយចំនួនក្នុងបទចោទអាចទទួលយកបាន និងមួយចំនួនមិនអាចទទួលយកបាន។ ប៉ុន្តែថ្នាក់ដឹកនាំរូបនេះ បដិសេធទាំងស្រុងត្រង់ចំណុចថា លោក ហៅ សុជាតិ បានប្រើប្រាស់សម្តីមិនសមរម្យលើមន្ត្រីការប្រកួត។

លោកបានចាត់ទុកការពិន័យរបស់កម្មការវិន័យនៃសហព័ន្ធកីឡាបាល់ទាត់កម្ពុជា ដែលហាមលោក ហៅ សុជាតិ មិនឲ្យពាក់ព័ន្ធការប្រកួតបាល់ទាត់ ដែលរៀបចំដោយសហព័ន្ធរយៈពេល១ និងពិន័យថវិកា៥០ម៉ឺនរៀលថា ហាក់មានទម្ងន់ទោសធ្ងន់ធ្ងរពេក។ ដោយ លោក លើកជាចម្ងល់ថា រឿងកើតឡើងក្នុងពានរង្វាន់លីគ ហេតុអ្វីសហព័ន្ធពិន័យរហូតដល់ពានសម្តេច ហ៊ុន សែន?

ទន្ទឹមនឹងនេះ ថ្នាក់ដឹកនាំក្លិបបឹងកេតខាងលើ ស្នើឲ្យគណៈកម្មការវិន័យនៃសហព័ន្ធកីឡាបាល់ទាត់កម្ពុជា បង្ហាញភ័ស្តុតាងពាក់ព័ន្ធនឹងបទចោទរបស់ខ្លួន។ គួររំលឹកថា កាលពីថ្ងៃទី២៦ ខែកក្កដា ឆ្នាំ២០១៨ គណៈកម្មការវិន័យបានចេញសេចក្តីសម្រេចពិន័យលោក ហៅ សុជាតិ គ្រូបង្វឹកបឹងកេតមិនឲ្យចូលរួមក្នុងព្រឹត្តិការណ៍ប្រកួតបាល់ទាត់ ដែលរៀបចំដោយសហព័ន្ធរយៈពេល១ខែ និងថវិកា៥០ម៉ឺនរៀល ក្រោមបទចោទរុញ និងប្រើសម្តីមិនសមរម្យលើមន្ត្រីការប្រកួត។ ការពិន័យនេះ កើតឡើងក្នុងជំនួបបឹងកេតយកឈ្នះសូលទីឡូអង្គរ ២-១ កាលពីថ្ងៃទី២១ ខែកក្កដា ឆ្នាំ២០១៨៕