អន្តរជាតិ
បច្ចេកវិទ្យា
កូរ៉េខាងជើងមានស្មាតហ្វូន៥ម៉ូដែល ប៉ុន្តែភាគច្រើនមិនអាចភ្ជាប់អ៊ីនធ័រណិតបានឡើយ
× កូរ៉េខាងជើង ក៏ដើរមិនចេញឆ្ងាយពីបច្ចេកវិទ្យានាពេលបច្ចុប្បន្ននោះដែរ ដោយប្រទេសនេះ អនុញ្ញាតឲ្យពលរដ្ឋប្រើប្រាស់ទូរសព្ទស្មាតហ្វូន តាំងពីឆ្នាំ២០១៣មកម្ល៉េះ។ ប៉ុន្តែការប្រើប្រាស់ស្ថិតនៅក្រោមការត្រួតពិនិត្យរបស់រដ្ឋាភិបាលដដែល។
គេហទំព័រ NKNews.org ដែលផ្សព្វផ្សាយព័ត៌មានពីកូរ៉េខាងជើង បានបង្ហាញម៉ូដែលស្មាតហ្វូនចំនួន៥ ដែលបាន និងកំពុងប្រើប្រាស់នៅប្រទេសកូរ៉េខាងជើង ដោយប្រភេទខ្លះក៏អាចដំណើរការនៅប្រទេសផ្សេងផងដែរ។
ម៉ូដែលទាំង៥នោះ មិនមានលក់នៅទីផ្សារបរទេសនោះឡើយ៖
១. Pyongyang Touch៖ មិនមានព័ត៌មានច្រើននោះឡើយ ប៉ុន្តែវាជាម៉ូដែលដ៏ពេញនិយមបំផុតរបស់យុវជនកូរ៉េខាងជើង ចាប់តាំងពីឆ្នាំ២០១៤មក។ ទោះបីជាយ៉ាងណាក៏ដោយ អ្នកប្រើប្រាស់មិនអាចហៅចេញទៅបរទេស ឬភ្ជាប់អ៊ីនធ័រណែត បានទេ។
២. ម៉ូដែលដើមរបស់ Arirang៖ ប្រភពនានាបានអះអាងថា វាជាទម្រង់ដើមរបស់ Arirang ប៉ុន្តែក្រុមហ៊ុនមិនមានការបញ្ជាក់ច្បាស់លាស់នោះឡើយ។ ម៉ូដែលនេះ យកទម្រង់តាមទូរសព្ទចិន Uniscope U1201 ដែលផលិតនៅឆ្នាំ២០១៤ ។
៣. Jindallae 3 ឬហៅថា Azalea 3៖ ជាស្មាតហ្វូនថ្មីបំផុតនៅកូរ៉េខាងជើងដែលចាប់ដំណើរការពីខែមិថុនា ឆ្នាំ២០១៧។ បើតាមរបាយការណ៍មួយចំនួន ម៉ូដែលប្រភេទនេះ ក៏ធ្លាប់ចេញ Jindallae 1 និង2 ផងដែរ។
៤. Arirang 171៖ ម៉ូដែលនេះ ទើបតែចេញនៅឆ្នាំ២០១៨ ដោយសារព័ត៌មាន NK News អះអាងថា ជាម៉ូដែលទី៥របស់ Arirang។ នៅតាមទីផ្សារនានានៅកូរ៉េខាងត្បូង មានដាក់លក់ម៉ូដែលនេះ ប៉ុន្តែគេមិនដឹងតម្លៃពិតប្រាកដនោះឡើយ។
៥. Phurun Hanul H1 ឬ Blue Sky៖ វាជាប្រភេទស្មាតហ្វូនក្រោមការគ្រប់គ្រងរបស់រដ្ឋផ្ទាល់តែម្តង។ គេមិនដឹងពីសក្តានុពលច្បាស់ពីម៉ូដែលនេះឡើយ ប៉ុន្តែមានការលើកឡើងពីគុណភាពថ្មរបស់វា។
ពលរដ្ឋកូរ៉េខាងជើងដែលចង់ទិញទូរសព្ទទាំងនេះ ត្រូវទៅទិញដោយផ្ទាល់ ហើយម៉ូដែលជាច្រើនមិនអាចភ្ជាប់អ៊ីនធ័រណិត ឬហៅចេញទៅក្រៅប្រទេសបានឡើយ ព្រោះរដ្ឋគ្រាន់តែភ្ជាប់សេវា Intranet ដើម្បីអាចតាមដានណ្ណោះ៕
Tag:
ស្មាតហ្វូន
កូរ៉េខាងជើង
© រក្សាសិទ្ធិដោយ thmeythmey.com