អន្តរជាតិ
លោក ប្រាយុទ្ធ ស្នើប្រជាជនថៃកុំយកតំណែងប្រធានអាស៊ានឡូកឡំនយោបាយ មេដឹកនាំរបបយោធាថៃ ប្រាយុទ្ធ ចន្ទអូចា នាកិច្ចប្រជុំកំពូលអាស៊ានកន្លងមក។ (រូបភាព AFP)
× នៅចុងសប្ដាហ៍មុន មេដឹកនាំរបបយោធាថៃ ប្រាយុទ្ធ ចន្ទអូចា បានស្នើឲ្យប្រជាជនថៃកុំយកតំណែងប្រធានអាស៊ានទៅឡូកឡំនឹងនយោបាយដែលធ្វើឲ្យជាតិបែកបាក់។ លោក ប្រាយុទ្ធ លើកឡើងបែបនេះ បន្ទាប់ពីមានប្រព័ន្ធផ្សព្វផ្សាយមួយនៅឥណ្ឌូណេស៊ីស្នើឲ្យរដ្ឋាភិបាលក្រុងហ្សាការតាប្រឆាំងការផ្ទេរតំណែងប្រធានអាស៊ានឆ្នាំ២០១៩ ទៅឲ្យថៃដែលកំពុងដឹកនាំដោយរបបយោធា បើសិនគ្មានការបោះឆ្នោតតាមបែបប្រជាធិបតេយ្យទេនោះ។
ថៃ នឹងត្រូវធ្វើជាប្រធានប្ដូរវេនរបស់អាស៊ាននៅឆ្នាំ២០១៩ បន្តពីសិង្ហបុរីដែលកំពុងកាន់កាប់តំណែងប្រធានអាស៊ាននៅឆ្នាំ២០១៨ នេះ។ នេះបើតាមការគិតតាមលំដាប់អក្ខរក្រមជាភាសាអង់គ្លេសរបស់សមាជិកអាស៊ាន (Singapore-Thailand) ដែលបានកំណត់ក្នុងធម្មនុញ្ញអាស៊ាន។ យ៉ាងណាមិញ តំណែងប្រធានអាស៊ាននេះ ទំនងធ្វើឲ្យរបបសឹកថៃរបស់លោក ប្រាយុទ្ធ ចន្ទអូចា ជួបបញ្ហាខ្លះព្រោះតែការពន្យារពេលបោះឆ្នោត និងដំណើរការប្រជាធិបតេយ្យ។
នៅឥណ្ឌូណេស៊ី សារព័ត៌មាន Jakarta Post បានចេញផ្សាយបទអត្ថាធិប្បាយមួយដែលជំទាស់ការកាន់តំណែងប្រធានអាស៊ានរបស់ថៃ បើរបបយោធាមិនរៀបចំការបោះឆ្នោតទេនោះ។ ក្នុងបទអត្ថាធិប្បាយនៅថ្ងៃទី៣១ ខែកក្កដា ប្រធានាធិបតីឥណ្ឌូណេស៊ី ចូកូ វីដូដូ ត្រូវបានស្នើឲ្យប្រើប្រាស់យន្តការស្ងាត់ស្ងៀមរបស់អាស៊ានដើម្បីជជែកពីតួនាទីរបស់ថៃ។ ថៃមានសិទ្ធិកាន់តំណែងប្រធានអាស៊ាន ប៉ុន្តែមិនមែនក្រោមការដឹកនាំរបស់ក្រុមយោធាដែលដណ្ដើមអំណាចពីប្រជាជនឡើយ។
ប្រាយុទ្ធ ប្រាប់ប្រជាជន៖ តំណែងប្រធានអាស៊ានជារបស់រួម
មិនទាន់ដល់ពេលកាន់តំណែងប្រធានអាស៊ានផង រដ្ឋាភិបាលយោធាថៃ បានជួបការរិះគន់ទៅហើយ ព្រោះខ្លួនកាន់អំណាចតាមរយៈរដ្ឋប្រហារ។ យ៉ាងណាក្ដី លោកនាយករដ្ឋមន្ត្រី ប្រាយុទ្ធ ចន្ទអូចា បានប្រាប់ឲ្យប្រជាជនថៃ កុំយកកៅអីប្រធានអាស៊ាននេះបង្កទៅជាបញ្ហាដែលនាំឲ្យប្រទេសបែកបាក់។ នេះបើតាមការលើកឡើងរបស់លោក Sansern Kaewkamnerd ដែលបានស្រង់សម្ដីរបស់លោក ប្រាយុទ្ធ ។
បើតាមកាសែត The Nation ក្នុងន័យឆ្លើយទៅកាន់សារព័ត៌មានឥណ្ឌូណេស៊ី អ្នកនាំពាក្យខាងលើបានលើកឡើងសម្ដីលោក ប្រាយុទ្ធ ទៀតថា តំណែងប្រធានអាស៊ាននេះជារបស់ប្រជាជនថៃទាំងមូល មិនមែនជាកម្មសិទ្ធិបុគ្គលណាមួយឡើយ។ មួយវិញទៀត គេក៏មិនទាន់ដឹងថា នរណាជានាយករដ្ឋមន្ត្រីពេលថៃកាន់តំណែងប្រធានអាស៊ានឆ្នាំ២០១៩ នោះដែរ។ ហេតុនេះហើយ មេដឹកនាំយោធាដែលដឹកនាំរដ្ឋប្រហារឆ្នាំ២០១៤ ស្នើឲ្យប្រជាជនកុំប្រើបញ្ហានេះបង្កើតការបែកបាក់ក្នុងសង្គម។
តាមទម្លាប់ ការប្ដូរវេនប្រធានអាស៊ាននឹងធ្វើឡើងនៅខែវិច្ឋិកាខាងមុខ។ នាយករដ្ឋមន្ត្រីសិង្ហបុរី លី សៀនឡុង នឹងប្រគល់ញញួរប្រធានទៅឲ្យលោក ប្រាយុទ្ធ ដែលជាប្រមុខរដ្ឋាភិបាលថៃសព្វថ្ងៃ ដើម្បីធ្វើជាប្រធានអាស៊ាន។ នេះមានន័យថា លោក ប្រាយុទ្ធ នឹងកាន់តំណែងនេះរហូតដល់ពេលមានរដ្ឋាភិបាលថ្មីក្រោយការបោះឆ្នោតដែលគ្រោងធ្វើនៅខែកុម្ភៈ ឆ្នាំ២០១៩ ។ ប្រមុខរដ្ឋាភិបាលថ្មីនឹងបន្តអង្គុយកៅអីប្រធានអាស៊ានតែម្ដង៕
Tag:
អាស៊ាន
ថៃ
ឥណ្ឌូណេស៊ី
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com