អន្តរជាតិ
ម៉ាឡេស៊ី៖ លោក អាន់វ៉ា ជាប់ឆ្នោតជាប្រធានបក្ស មុនឈោងចាប់កៅអីនាយករដ្ឋមន្ត្រី អ្នកនយោបាយម៉ាឡេស៊ី អាន់វ៉ា អ៊ីប្រាហ៊ីម និងនាយករដ្ឋមន្រ្តី មហាធៀ មហាម៉ាត់ ។ (រូបភាព AFP)
× លោក អាន់វ៉ា អ៊ីប្រាហ៊ីម នៅថ្ងៃទី៥ ខែសីហា បានជាប់ឆ្នោតជាប្រធានបក្សយុត្តិធម៌ប្រជាជន (Parti Keadilan Rakyat) ដែលជាបក្សធំជាងគេនៃសម្ព័ន្ធភាពកាន់អំណាច Patakan Harapan ។ ទោះលោកជាអ្នកបង្កើតបក្ស PKR ក្ដី លោក អាន់វ៉ា មិនដែលមានតួនាទីអ្វីក្នុងជួរបក្សឡើយ ដ្បិតត្រូវជាប់ពន្ធនាគារជាច្រើនឆ្នាំ។ ការជាប់ឆ្នោតជាមេបក្សលើកនេះ ក៏ជាការបើកផ្លូវទៅកាន់ការអង្គុយកៅអីនាយករដ្ឋមន្ត្រីរបស់ម៉ាឡេស៊ីផង។
អ្នកនយោបាយល្បីឈ្មោះ អាន់វ៉ា អ៊ីប្រាហ៊ីម បានក្លាយជាប្រធានបក្សយុត្តិធម៌ប្រជាជននៃ (PKR) នៃសម្ព័ន្ធភាព Pakatan Harapan ដែលកំពុងដឹកនាំរដ្ឋាភិបាល។ ក្នុងការបោះឆ្នោតនៅថ្ងៃទី៥ ខែសីហា លោក អាន់វ៉ា ជាបេក្ខភាពតែម្នាក់គត់សម្រាប់តំណែងប្រធានបក្សដែលលោកបង្កើតដោយផ្ទាល់ ទោះជានៅមុនការបោះឆ្នោត មានដំណឹងថា អនុប្រធានបក្សសព្វថ្ងៃ លោក Mohamed Azmin Ali ចង់ប្រជែងយកតំណែងនេះក្ដី។
ការក្លាយប្រធានជាបក្ស PKR គឺជាការបោះជំហានទៅមុខដ៏សំខាន់របស់លោក អាន់វ៉ា ក្នុងដំណើរទៅកាន់តំណែងនាយករដ្ឋមន្ត្រីដែលកំពុងកាន់កាប់ដោយអតីតមេកើយ និងគូប្រជែងនយោបាយ គឺលោក មហាធៀ មហាម៉ាត់ ។ ក្នុងកម្មវិធីនយោបាយរបស់សម្ព័ន្ធភាព PH លោក អាន់វ៉ា ជាបេក្ខជននាយករដ្ឋមន្ត្រី ហើយលោករំពឹងថា នឹងស្នងតំណែងពីលោក មហាធៀ នៅប៉ុន្មានឆ្នាំខាងមុខ។ ជាប់ជាមេដឹកនាំបក្សមានសំឡេងភាគច្រើន ក៏លុបចោលការសង្ស័យថា លោកត្រូវផាត់ចេញពីឆាកនយោបាយដែរ។
ដំណើរទៅកាន់កៅអីនាយករដ្ឋមន្ត្រីរបស់លោក អាន់វ៉ា ត្រូវឆ្លងកាត់ជាច្រើនដំណាក់កាល។ លោកត្រូវចូលរួមក្នុងបោះឆ្នោតបំពេញបន្ថែមដើម្បីក្លាយជាសមាជិកសភាសិន ទើបមានសិទ្ធិធ្វើជានាយករដ្ឋមន្ត្រី។ អ្វីដែលជាបញ្ហានោះ តើសមាជិកសភាណាមួយត្រូវបោះបង់កៅអីរបស់ខ្លួនសម្រាប់លោក អាន់វ៉ា។ ជម្រើសដែលទំនងជាងគេ គឺកៅអីសភារបស់លោកស្រី Wan Azizah Wan Ismail ដែលជាភរិយារបស់លោកផ្ទាល់។
បើលោកស្រី Wan Azizah បោះបង់អាសនៈសភាដើម្បីប្ដីមែននោះ លោក មហាធៀ ត្រូវរុះរើគណៈរដ្ឋមន្ត្រី ព្រោះលោកស្រីក៏ជាឧបនាយករដ្ឋមន្ត្រី និងជារដ្ឋមន្ត្រីកិច្ចការនារីផង។ ក្នុងករណីនេះ លោក មហាធៀ អាចតែងតាំងលោក អាន់វ៉ា ជាឧបនាយករដ្ឋមន្ត្រីផងក៏ថាបាន ដើម្បីត្រៀមផ្លាស់ប្ដូរក្បាលម៉ាស៊ីនដឹកនាំរដ្ឋាភិបាលផង។ ស្ថានភាពនេះនឹងដូចគ្នាទៅនឹងសមាសភាពរដ្ឋាភិបាលចន្លោះឆ្នាំ១៩៩៣-១៩៩៨ ដែលលោក មហាធៀ ជានាយករដ្ឋមន្ត្រី ឯលោក អាន់វ៉ា ជាឧបនាយករដ្ឋមន្ត្រី។
គួររំឭកថា លោក មហាធៀ ដែលមានវ័យ៩៣ឆ្នាំទៅហើយ បានសន្យាប្រគល់តំណែងឲ្យលោក អាន់វ៉ា បន្ទាប់ពីលោកដឹកនាំរដ្ឋាភិបាលពីរបីឆ្នាំសិន។ នេះក៏ព្រោះតែពេលឈ្នះឆ្នោតភ្លាម លោក អាន់វ៉ា មិនទាន់ទទួលបានការលើកលែងទោសពីមហាក្សត្រនៅឡើយ ហើយលោកក៏ប្រកាសសុំពេលសម្រាកសិនទៅទៀត។ ការវិលត្រឡប់ចូលឆាកនយោបាយវិញនោះ អាចជាសញ្ញាដែលលោក អាន់វ៉ា ត្រៀមខ្លួនរួចរាល់ដើម្បីក្លាយជានាយករដ្ឋមន្ត្រីម៉ាឡេស៊ីទី៨ ៕
Tag:
ម៉ាឡេស៊ី
អាន់វ៉ា អ៊ីប្រាហ៊ីម
មហាធៀ មហាម៉ាត់
© រក្សាសិទ្ធិដោយ thmeythmey.com