អន្តរជាតិ
ប្រធានាធិបតីតួកមេនីស្ថាន បង្ហាញសក់ស្កូវរបស់ខ្លួនជាលើកដំបូង
× ជាលើកដំបូងបើគិតចាប់តាំងពីឆ្នាំ២០០៦ រូបភាពដែលផ្សាយនៅលើទូរទស្សន៍រដ្ឋ និងកាសែតរដ្ឋ Netralniy Turkmenistan បង្ហាញឲ្យឃើញសរសៃសក់ស្កូវរបស់ប្រធានាធិបតីខ្លួន នាជំនួបជាមួយឯកអគ្គរដ្ឋទូតថ្មីនៃប្រទេសកាស្ថាក់ស្ថាន។
លោក Gurbanguly Berdimuhamedow អាយុ៦១ឆ្នាំ គឺជាមេដឹកនាំផ្តាច់ការម្នាក់។ នារយៈពេលប្រមា ណ ១២ឆ្នាំកន្លងមក លោកប្រធានាធិបតីតួកមេនីស្ថានតួកមេនីស្ថាន រូបនេះ មិនដែលបង្ហាញសក់ស្កូវរបស់ខ្លួនជាសាធារណៈនោះឡើយ ដោយលោកតែងតែលាបថ្នាំខ្មៅជាប់ជានិច្ច។
មិនខុសពីលោក Saparmurat Niyazov ដែលជាប្រធានាធិបតីទីមួយនោះឡើយ លោក Berdimuhamedow បានបង្កើតឲ្យមានក្បួនច្បាប់ប្លែកៗសម្រាប់ប្រទេស និងការគោរពបូជាផ្ទាល់ខ្លួន។ លោក Niyazov បានដឹកនាំតួកមេនីស្ថានចាប់ពីឆ្នាំ១៩៨៥ ហើយបានទទួលមរណភាពនៅឆ្នាំ២០០៦ ដោយសារគាំងបេះដូង។
អស់រយៈពេលជាច្រើនឆ្នាំ លោក Niyazov និយមទុកសក់ពណ៌ស ដែលមានទម្រង់ដូចជាសក់ប្រធានាធិបតីទីមួយរុស្ស៊ី លោក Boris Eltsine។ នៅឆ្នាំ១៩៩៩ គេឃើញលោកលាបសក់ពណ៌រាងក្រហមត្នោតភ្លឺជាលើកដំបូង ក្រោយទទួលបានការណែនាំពីវេជ្ជបណ្ឌិតចិនម្នាក់។ ពេលនោះ រដ្ឋមន្ត្រី និងរដ្ឋទូតជាច្រើននាក់ បាននាំគ្នាធ្វើម៉ូតសក់ដូចលោក Niyazov។ ក្រោយមកទៀត លោក Niyazov បានសម្រេចលាបសក់ពណ៌ខ្មៅវិញ។
លោក Berdimuhamedow អតីតអនុប្រធានាធិបតីដែលបានឡើងបន្តដំណែងពីលោក Niyazov បានលាបសក់ពណ៌ខ្មៅជាប្រចាំ ហើយគេមិនដែលឃើញសក់ស្កូវរបស់គាត់ជាសាធារណៈនោះឡើយ។ នេះជាលើកដំបូងបំផុតដែលទូរទស្សន៍ និងកាសែតរដ្ឋតួកមេនីស្ថាន ថតបង្ហាញឲ្យឃើញសក់ស្កូវរបស់មេដឹកនាំខ្លួន។
លោក Bermimuhamedow ចូលចិត្តបង្ហាញនូវអ្វីដែលជាភាពអស្ចារ្យរបស់ខ្លួន ដូចជាសមត្ថភាពច្រៀងបទ Pop ធ្វើ DJ និងឈ្នះការប្រណាំងរថយន្តដែលលោកបានរៀបចំជាដើម។ លោកក៏បានបង្កើតឃ្លីបវីដេអូដែលលោកដើរតួជាវីរបុរសផងដែរ។
បន្ថែមពីលើនេះ លោកបានហាមប្រាមការប្រើប្រាស់រថយន្តពណ៌ខ្មៅក្នុងកម្មវិធីរដ្ឋាភិបាល រួមទាំងការហាមឃាត់វីដេអូហ្គេម ការស្តាប់វិទ្យុក្នុងរថយន្ត និងការហាមបុរសទុកសក់វែងជាដើម។ ទោះបីជាយ៉ាងណាក៏ដោយ លោក Berminuhamedow បានលុបនូវការសម្រេចមួយចំនួនរបស់ប្រធានាធិបតីទីមួយរបស់ខ្លួន ដែលបានដាក់ខែមករាជាឈ្មោះ « Niyazov» និងខែមេសា ជំនួសដោយឈ្មោះម្តាយលោក «Niyazov» ជាដើម៕
© រក្សាសិទ្ធិដោយ thmeythmey.com