តុលាការកំពូល បើកសវនាការនៅថ្ងៃ២២សីហា ដើម្បីសម្រេចថា លែងលោក កឹម សុខា ឬបន្តឃុំ

ជាតិ

នយោបាយជាតិ

តុលាការកំពូល បើកសវនាការនៅថ្ងៃ២២សីហា ដើម្បីសម្រេចថា លែងលោក កឹម សុខា ឬបន្តឃុំ

21, Aug 2018 , 8:59 pm

រូបភាព

លោក កឹម សុខា នៅពេលដែលត្រូវបានចាប់ខ្លួននៅផ្ទះកាលពីយប់ថ្ងៃទី៣ ខែកញ្ញា ឆ្នាំ២០១៧។ រូបថត AFP

ដោយ: ថ្មីៗ

តាមកាលកំណត់ក្នុងដីកា តុលាការកំពូល នឹងបើកសវនាការ នៅព្រឹកថ្ងៃទី២២ ខែសីហា ឆ្នាំ២០១៨ ដើម្បីសម្រេចលើសំណើសុំនៅក្រៅឃុំរបស់លោក កឹម សុខា អតីតប្រធានគណបក្សសង្គ្រោះជាតិ។

លោកស្រី ម៉េង សុភារី មេធាវីម្នាក់របស់លោក កឹម សុខា ប្រាប់សារព័ត៌មានថ្មីៗ តាមទូរសព្ទថា លោកស្រី មិនទាន់ទទួលបានដំណឹង ឬឃើញដីការបស់តុលាការកំពូល ដែលបង្គាប់ឲ្យដឹកលោក កឹម សុខា ឲ្យទៅកាន់សវនាការ នោះទេ។ ហេតុដូច្នេះ លោកស្រី មិនអាចបញ្ជាក់បានឡើយ ថា លោក កឹម សុខា នឹងមានវត្តមានក្នុងបន្ទប់សវនាការ ឬយ៉ាងណា។

ប៉ុន្តែ លោកស្រីមេធាវីរូបនេះ ពន្យល់ថា តាមនីតីវិធី តុលាការ ត្រូវបង្គាប់ឲ្យយកជនត្រូវចោទ ទៅកាន់សវនាការ។ លោកស្រី បន្ថែមថា សម្រាប់លោក កឹម សុខា លោក តែងតែមានឆន្ទៈចង់ចូលរួម។

លោកស្រី ម៉េង សុភារី លើកឡើងបែបនេះថា៖«ពួកខ្ញុំ នឹងចូលរួមការពារក្តីឲ្យគាត់។ តែត្រង់គេដោះលែងគាត់ ឬមិនដោះលែង ខ្ញុំ មិនអត្ថាធិបត្ថាយទេ»។

នេះជាលើកទីពីរហើយ ដែលលោក កឹម សុខា ពឹងមេធាវីឲ្យដាក់សំណើទៅកាន់តុលាការកំពូល ដើម្បីសុំនៅក្រៅឃុំជាបណ្តោះអាសន្ន។ សំណើលើកទីមួយ ត្រូវបានច្រានចោល។ មុននឹងឈានដល់តុលាការកំពូល លោក កឹម សុខា បានស្នើសុំនៅក្រៅឃុំ នៅសាលាដំបូងរាជធានីភ្នំពេញ និងនៅសាលាឧទ្ធរណ៍ជាច្រើនលើករួចមកហើយ តែសុទ្ធតែត្រូវបានបដិសេធ។

មជ្ឈដ្ឋានមួយចំនួន ជាពិសេសអ្នកតាមដានស្ថានការណ៍នយោបាយ សង្ឃឹមថា លោក កឹម សុខា អាចនឹងត្រូវបានតុលាការកំពូល ដោះលែង។ ពួកគេ សង្ឃឹមបែបនេះ បន្ទាប់ពីឃើញអ្នកប្រឆាំងរដ្ឋាភិបាលពីរនាក់ គឺលោក គឹម សុខ អ្នកវិភាគនយោបាយ និងលោកស្រី ទេព វន្នី សកម្មជនបឹងកក់ បានរួចខ្លួនពីពន្ធនាគារជាបន្តបន្ទាប់។

លើសពីនេះ ពួកគេ យល់ថា ក្រោយការបោះឆ្នោត ភាពតានតឹងនៃស្ថានការណ៍នយោបាយ ហាក់ធូរស្បើយបន្តិច។ ហើយម្យ៉ាងទៀត បើលោក កឹម សុខា ពិតជាត្រូវបានដោះលែងមែននោះ ស្ថានការណ៍ នឹងរឹតតែល្អប្រសើរ។

មកដល់ពេលនេះលោក កឹម សុខា បានជាប់ពន្ធនាគារជិតមួយឆ្នាំហើយ ក្រោមការសង្ស័យរបស់តុលាការថា បានគប់គិតជាមួយបរទេសដើម្បីផ្តួលរំលំរដ្ឋាភិបាលកម្ពុជា។ លោក ត្រូវបានចាប់ខ្លួន កាលពីដើមខែកញ្ញា ឆ្នាំ២០១៧៕