ការប្រឡងបាក់ឌុប បានបញ្ចប់ហើយ ដោយអវត្តមានបេក្ខជនប្រឡងជិត២០០០នាក់

ជាតិ

បាក់ឌុប

ការប្រឡងបាក់ឌុប បានបញ្ចប់ហើយ ដោយអវត្តមានបេក្ខជនប្រឡងជិត២០០០នាក់

21, Aug 2018 , 6:28 pm

រូបភាព

ដោយ: ថ្មីៗ

ភ្នំពេញ៖ បេក្ខជនប្រឡងសញ្ញាបត្រមធ្យមសិក្សាទុតិយសភូមិ (បាក់ឌុប) បានបញ្ចប់ហើយ នៅថ្ងៃទី២១ សីហានេះ។ ក្រសួងអប់រំ យុវជន និងកីឡា វាយតម្លៃថា ការប្រឡងបាក់ឌុបឆ្នាំនេះ មានភាពល្អប្រសើរជាងឆ្នាំមុន បើទោះជាខេត្តមួយចំនួន មានភ្លៀងក៏ដោយ។

បេក្ខជនប្រឡង បានគោរពតាមបទបញ្ញត្តិយ៉ាងល្អ ស្ទើរតែពុំមាននាំមកជាប់ខ្លួន នូវសំណៅឯកសារ និងឧបករណ៍ហាមឃាត់ឡើយ។ នេះជាការបញ្ជាក់របស់ក្រសួងអប់រំ ដែលបានបន្ថែមថា បេក្ខជនប្រព្រឹត្តកំហុសឆ្គងមាន៧ករណី ដោយក្នុងនោះក្រសួងដកហូតទូរសព្ទ៥ករណី និងសំណៅឯកសារ២ករណី។

បើតាមក្រសួងអប់រំ គណៈមេប្រយោគប្រព្រឹត្តខុសឆ្គងដោយទុកទូរសព្ទដៃជាប់ខ្លួន នៅក្នុងមណ្ឌលសំណេរ៥ករណី។ ចំណែកបេក្ខជនមានបញ្ហាសុខភាពធ្ងន់ធ្ងរ៦៤ករណី ដែលក្នុងនោះមាន៥ករណី បានបញ្ជូនទៅមន្ទីពេទ្យ ហើយមិនអាចត្រឡប់មកប្រឡងវិញបាន។

ក្នុងដំណើរការប្រឡងរយៈពេល២ថ្ងៃនេះ បេក្ខជនអវត្តមាន១៨៩៩នាក់ ត្រូវជា១,៦៥ភាគរយ នៃចំនួនបេក្ខជនប្រឡង១១៥,២៦៨នាក់ ។ មុខវិជ្ជាប្រឡងមានចំនួន៧ ចែកចេញជាថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម។ ថ្នាក់វិទ្យាសាស្ត្រមានមុខវិជ្ជា ប្រវត្តិវិទ្យា ជីវវិទ្យា គីមីវិទ្យា ភាសាបរទេស អក្សរសាស្ត្រខ្មែរ រូបវិទ្យា និងគណិតវិទ្យា។ ថ្នាក់វិទ្យាសាស្ត្រសង្គមមានមុខវិជ្ជា ផែនដីនិងបរិស្ថានវិទ្យា ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌ ពលរដ្ឋវិជ្ជា និងអក្សរសាស្ត្រខ្មែរ។

តាមការគ្រោងទុក លទ្ធផលប្រឡងនៅតាមមណ្ឌលរាជធានីភ្នំពេញ និងខេត្តកណ្ដាល នារសៀលថ្ងៃទី១១ កញ្ញា ឆ្នាំ២០១៨ និងនៅតាមមណ្ឌលប្រឡងតាមបណ្ដាខេត្តផ្សេងទៀត នៅថ្ងៃទី១២ កញ្ញាឆ្នាំ២០១៨។ នេះបើតាមក្រសួងអប់រំ៕