អន្តរជាតិ
លោកស្រី ស៊ូជី មិនបារម្ភថា រដ្ឋប្រហារយោធាកើតឡើងនៅមីយ៉ាន់ម៉ាទៀតឡើយ
× ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី អះអាងដោយភាពជឿជាក់ថា រដ្ឋាភិបាលស៊ីវិលរបស់លោកស្រីមិនបារម្ភខ្លាចមានចលនារដ្ឋប្រហារយោធាជាថ្មីឡើយ បើសម្អាងលើទំនាក់ទំនងរវាងរដ្ឋាភិបាល និងក្រុមយោធាបច្ចុប្បន្ន។
លោកស្រីនិយាយពីឥទ្ធិពលយោធាក្នុងបញ្ហានយោបាយមីយ៉ាន់ម៉ានេះក្នុងពេលផ្តល់បឋកថាសាធារណៈជុំវិញដំណើរការប្រជាធិបតេយ្យូបនីយកម្មមីយ៉ាន់ម៉ា និងបញ្ហាប្រឈមនៅវិទ្យាស្ថានសិក្សាអាស៊ីអាគ្នេយ៍ (ISEAS) សិង្ហបុរីថ្ងៃ ២១ ខែសីហា។
ម្ចាស់ពានរង្វាន់ណូបែលសន្តិភាពប៉ុន្តែត្រូវសហគមន៍អន្តរជាតិថ្កោលទោសព្រោះអលទ្ធភាពដោះស្រាយបញ្ហា បានពន្យល់ថា វាគ្មានហេតុផលអ្វីដែលរដ្ឋាភិបាលស៊ីវិលមីយ៉ាន់ម៉ាត្រូវខ្លាចរដ្ឋប្រហារឡើយព្រោះក្នុងនយោបាយអ្វីៗក៏អាចកើតឡើងដែរ។
ប៉ុន្តែលោកស្រី ស៊ូជី មិនជឿថា រឿងនេះនឹងកើតឡើងទេ។ ហេតុផលសំខាន់ដែលធ្វើលោកស្រីជឿបែបនេះគឺ ទំនាក់ទំនងដែលមានរវាងរដ្ឋាភិបាលស៊ីវិលលោកស្រីដែលចាប់កំណើតក្រោយការបោះឆ្នោតឆ្នាំ ២០១៥ និងក្រុមយោធា។ លោកស្រីរម្លឹកថា រឿងដែលសំខាន់វាមានមន្ត្រីយោធាបីរូបកំពុងស្ថិតក្នុងជួររដ្ឋាភិបាលលោកស្រីដែរ។
លោកស្រី ស៊ូជី និយាយបែបនេះ៖«ទំនាក់ទំនងរវាងយើងជាមួយក្រុមយោធាមិនអាក្រក់ទេ។ កុំភ្លេចថា យើងមានសមាជិកគណៈរដ្ឋមន្ត្រីរហូតដល់ទៅបីរុបដែលជាមន្ត្រីយោធាកម្រិតឧត្តមសេនីយ៍ ហើយពួកគេ ក៏ល្អដែរ»។
តាមពិតទៅមីយ៉ាន់ម៉ាស្ថិតក្រោមរបបសឹកអស់រយៈពេល ៥០ឆ្នាំ ក្រោយមានរដ្ឋប្រហារដណ្តើមអំណាចនៅក្នុងឆ្នាំ ១៩៦២ រៀបចំឡើងដោយឧត្តមសេនីយ៍ Ne Win។ ថ្វីបើរដ្ឋាភិបាលស៊ីវិលចាប់កំណើតក្រោយការបោះឆ្នោតប្រវត្តិសាស្ត្រឆ្នាំ ២០១៥ ហើយដំណើរប្រជាធិបតេយ្យូបនីយកម្មនៅតែដើរទៅមុខក្តី ក្រុមយោធានៅតែមានឥទ្ធិពលលើសលុបក្នុងនយោបាយមីយ៉ាន់ម៉ាដដែល។
ក្នុងវេទិកាដដែលនោះ លោកស្រី ស៊ូជី ទទួលស្គាល់ថា ប្រជាធិបតេយ្យូបនីយកម្មមិនទាន់ដល់ចំណុចពេញលេញឡើយ។ លោកស្រីបានលើកឡើងជាថ្មីដែរពីមហិច្ឆតាកែរដ្ឋធម្មនុញ្ញបញ្ចប់ឥទ្ធិពលរបស់យោធាដែលមានលើស្ថាប័ននីតិបញ្ញត្តិ និងប្រតិបត្តិជាពិសេសលើបញ្ហាសន្តិសុខ។
រដ្ឋធម្មនុញ្ញឆ្នាំ ២០០៨ ធ្វើឲ្យក្រុមយោធានៅតែមានឥទ្ធិពលខ្លាំង។ រដ្ឋធម្មនុញ្ញនេះរក្សាអាសនៈ ២៥ភាគរយនៅសភាសម្រាប់ក្រុមយោធា និងផ្តល់ក្រសួងបីសំខាន់ៗមានការពារជាតិ សន្តិសុខព្រំដែន និងមហាផ្ទៃទៅឲ្យក្រុមយោធាកាន់កាប់ទៀតផង៕
Tag:
អ៊ុងសាន ស៊ូជី
មីយ៉ាន់ម៉ា
យោធា
© រក្សាសិទ្ធិដោយ thmeythmey.com