ជាតិ
នយោបាយជាតិ
បក្សមាតុភូមិយើង មិនទាន់មានជំហរច្បាស់លើការចូលរួមឧត្តមក្រុមប្រឹក្សាពិគ្រោះ និងផ្តល់យោបល់ លោក ច័ន្ទ ប៊ុនហន ប្រធានគណបក្សមាតុភូមិយើង
× ភ្នំពេញ៖ គណបក្សមាតុភូមិយើង មិនទាន់មានការសម្រេចច្បាស់លាស់ណាមួយថា ចូលរួមជាមួយឧត្តមក្រុមប្រឹក្សាពិគ្រោះ និងផ្ដល់យោបល់ ដែលសម្ដេច ហ៊ុន សែន បានផ្ដួចផ្ដើមគំនិតកាលពីថ្ងៃទី២១ ខែសីហា នោះទេ។ នេះបើតាមលោក ច័ន្ទ ប៊ុនហន ប្រធានគណបក្សមាតុភូមិយើង។
កត្តាដែលនាំឲ្យថ្នាក់ដឹកនាំគណបក្សនេះនៅមិនទាន់មានការសម្រេចចិត្តច្បាស់លាស់ ក៏ព្រោះតែលោករង់ចាំមើល ការបង្កើតជាផ្លូវការសិន។ ប្រធានគណបក្សមាតុភូមិយើងចង់ដឹងអំពីតួនាទី និងកាតព្វកិច្ចឲ្យបានច្បាស់លាស់ជាមុនសិន ទើបអានសម្រេចបានថាគណបក្សលោក ចូលរួមឬមិនចូលរួម។
បន្ថែមលើនេះ លោក ច័ន្ទ ប៊ុនហន ក៏រង់ចាំមើលទឹកចិត្តប្រជាពលរដ្ឋ អ្នកគាំទ្រជាមុនសិន ថាតើ ពេញចិត្តឲ្យមានឧត្តមក្រុមប្រឹក្សាពិគ្រោះ និងផ្ដល់យោបល់នេះដែល ឬទេ? ប្រសិនជាមានការគាំទ្រពីប្រជាពលរដ្ឋច្រើន នោះគណបក្សរបស់លោកនឹងចូលរួម ជាមួយឧត្តមក្រុមប្រឹក្សាពិគ្រោះ និងផ្ដល់យោបល់នេះ។
លោក ច័ន្ទប៊ុនហន បញ្ជាក់ថា៖ «ខ្ញុំនៅរង់ចាំមើលតិចទៀតសិន សម្ដេចនាយកក៏និយាយដែរ មិនទាន់មានអីផងឲ្យគេទៅចូលរួមម៉ិច? ខ្ញុំក៏ចាំមើលប្រជាពលរដ្ឋគាត់យល់ម៉ិចដែរ រឿងអស់ហ្នឹង»។
គណបក្សមាតុភូមិយើង គឺជាគណបក្ស១ ក្នុងចំណោម៣គណបក្សផ្សេងទៀត ដែលមិនបានចូលរួមតាមការអញ្ជើញគ្រប់តំណាងគណបក្សទាំង២០ របស់សម្ដេចនាយករដ្ឋមន្ត្រី ហ៊ុន សែន កាលពីថ្ងៃទី២១ ខែសីហា ឡើយ។ គណបក្ស៣ទៀតរួមមាន គណបក្សសម្ព័ន្ធដើម្បីប្រជាធិបតេយ្យ, គណបក្សប្រជាធិបតេយ្យមូលដ្ឋាន និងគណបក្សខ្មែរឈប់ក្រ។
ឧត្តមក្រុមប្រឹក្សា និងផ្ដល់យោបល់នេះ ធ្វើឡើងសម្រាប់ប្រធាន និងអនុប្រធាន នៃគណបក្សនានា ដែលមិនបានទទួលអាសនៈ ក្នុងរដ្ឋសភាសម្រាប់ការបោះឆ្នោតនីតិកាលទី៦។ មិនតែប៉ុណ្ណោះសមាសភាពដែលចូលរួមជាមួយ ឧត្តមក្រុមប្រឹក្សាពិគ្រោះ និងផ្ដល់យោបល់នេះ អាចមានឋានៈស្មើទេសរដ្ឋមន្ត្រី និងឋានៈស្មើរដ្ឋមន្ត្រី៕
Tag:
នយោបាយ
តំណែងថ្មី
© រក្សាសិទ្ធិដោយ thmeythmey.com