ព្រះមហាក្សត្រ នឹងយាងជាអធិបតី ក្នុងកិច្ចប្រជុំលើកដំបូងរបស់រដ្ឋសភា

ជាតិ

ព្រះមហាក្សត្រ នឹងយាងជាអធិបតី ក្នុងកិច្ចប្រជុំលើកដំបូងរបស់រដ្ឋសភា

25, Aug 2018 , 6:19 pm

រូបភាព

រូបពី AFP៖ ព្រះមហាក្សត្រ និងសម្តេច ហេង សំរិន នាទិវាឯករាជ្យជាតិ កាលពីថ្ងៃទី៩ ខែវិច្ឆិកា ឆ្នាំ២០១៦

ដោយ: ថ្មីៗ

ព្រះមហាក្សត្រ នឹងយាងជាព្រះរាជាធិបតីភាព ក្នុងពិធីបើកសម័យប្រជុំដំបូងរបស់រដ្ឋសភានីតិកាលទី៦ នៅថ្ងៃទី៥ នៅព្រឹកថ្ងៃទី៥ ខែកញ្ញា ឆ្នាំ២០១៨។ នេះបើសេចក្តីជូនដំណឹងរបស់ក្រសួងព្រះបរមរាជវាំង ដែលធ្វើឡើងនៅថ្ងៃ២២ ខែសីហា ឆ្នាំ២០១៨ ហើយផ្ញើជូនអភិបាលរាជធានីភ្នំពេញ ដើម្បីស្នើឲ្យជួយរៀបចំនិងរក្សាសុវត្ថិភាព ថ្វាយព្រះរាជដំណើររបស់ព្រះមហាក្សត្រឲ្យបានល្អប្រសើរ។

តំណាងរាស្ត្រទាំង១២៥រូប ដែលសុទ្ធតែមកពីគណបក្សប្រជាជនកម្ពុជា នឹងត្រូវប្រកាសសុពលភាពជូន នៅក្នុងកិច្ចប្រជុំលើកដំបូងរបស់រដ្ឋសភា។ ពេលរសៀលក្នុងថ្ងៃដដែល តំណាងរាស្ត្រទាំងនោះ នឹងត្រូវចូលទៅស្បថក្នុងព្រះបរមរាជវាំង មុននឹងចូលកាន់តំណែង។

ក្រោយមកមួយថ្ងៃ គឺថ្ងៃទី៦ ខែកញ្ញា រដ្ឋសភា នឹងបើកកិច្ចប្រជុំជាលើកទីពីរ ដើម្បីរៀបចំរចនាសម្ព័ន្ធនៃថ្នាក់ដឹកនាំរដ្ឋសភា និងបង្កើតរដ្ឋាភិបាលក្នុងពេលជាមួយគ្នាតែម្តង (បោះឆ្នោតជាកញ្ចប់)។ ការបង្កើតក្បាលម៉ាស៊ីនរដ្ឋសភានិងសមាសភាពរដ្ឋាភិបាលអាណត្តិទី៦ តាមរយៈការបោះឆ្នោតជាកញ្ចប់នេះ គឺធ្វើឡើងតាមនីតិវិធី ដែលមានចែងក្នុងមាត្រា៤នៃរដ្ឋធម្មនុញ្ញបន្ថែម។

ថ្នាក់ដឹកនាំរដ្ឋសភា ដែលសំដៅនោះ រួមមាន ប្រធានរដ្ឋសភា និងអនុប្រធានរដ្ឋសភាទាំងពីររូប រួមទាំងប្រធាននិងអនុប្រធាននៃគណៈកម្មការជំនាញនានារបស់រដ្ឋសភា។ ចំណែកសមាសភាពរដ្ឋាភិបាល រួមមាន នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រី៕