អន្តរជាតិ
UN ស្នើកាត់ទោសអគ្គមេបញ្ជាការទ័ពមីយ៉ាន់ម៉ាលើករណីប្រល័យពូជសាសន៍ប្រឆាំងជនជាតិរ៉ូហ៊ីងយ៉ា
អគ្គមេបញ្ជាការកងទ័ពមីយ៉ាន់ម៉ា ឧត្តមសេនីយ៍ មីន អ៊ុងឡាំង (រូបភាព AFP)
×![]()
ដោយ: តន ចាន់រិទ្ធារ៉ា
អង្គការសហប្រជាជាតិ នៅថ្ងៃទី២៧ ខែសីហា បានចេញផ្សាយរបាយការណ៍ជុំវិញការបោសសម្អាតក្រុមជនជាតិភាគតិចរ៉ូហ៊ីងយ៉ានៅមីយ៉ាន់ម៉ា។ ក្រុមស៊ើបអង្កេតរបស់ស្ថាប័នពិភពលោកកំពូលនេះ បានរកឃើញថា យោធាមីយ៉ាន់ម៉ាមានចេតនាប្រល័យពូជសាសន៍ជនភាគតិចមួយនេះ។ អង្គការសហប្រជាជាតិបានស្នើឲ្យកាត់ទោសមេទ័ពមីយ៉ាន់ម៉ា៦រូបលើករណីនេះ។ ស្ថាប័ននេះក៏រិះគន់រដ្ឋាភិបាលមីយ៉ាន់ម៉ាដែលបរាជ័យមិនអាចការពារជនភាគតិចបាន។
ក្នុងរបាយការណ៍កម្រាស់២០ទំព័រ បេសកកម្មរកការពិតរបស់អង្គការសហប្រជាជាតិបានចាត់ទុកសកម្មភាពរបស់យោធាមីយ៉ាន់ម៉ានៅរដ្ឋ Rakhine ដូចជាការសម្លាប់រង្គាល និងការបំពានផ្លូវភេទទ្រង់ទ្រាយធំលើជនភាគតិចមូស្លីមរ៉ូហ៊ីងយ៉ា ជា «ចេតនាប្រល័យពូជសាសន៍»។ បេសកកម្មស៊ើបអង្កេតឯករាជ្យ ក៏ស្នើឲ្យកាត់ទោសអគ្គមេបញ្ជាការទ័ពមីយ៉ាន់ម៉ា មីន អ៊ុងឡាំង និងឧត្តមសេនីយ៍៥នាក់ទៀតដែលរៀបចំឲ្យមានសកម្មភាពបែបនេះ។
វិបត្តិរ៉ូហ៊ីងយ៉ា បានផ្ទុះឡើងតាំងពីខែសីហាឆ្នាំមុន ក្រោយយោធាមីយ៉ាន់ម៉ាបើកប្រតិបត្តិការទ្រង់ទ្រាយធំនៅរដ្ឋ Rakhine បោសសម្អាតក្រុមឧទ្ទាមដែលវាយប្រហារទីតាំងសន្តិសុខនៅក្បែរព្រំដែនបង់ក្លាដែស។ ជនរ៉ូហ៊ីងយ៉ារាប់សែននាក់បានភៀសខ្លួនពីយុទ្ធនាការប្រកបដោយហិង្សារបស់យោធាមីយ៉ាន់ម៉ាដែលបានសម្លាប់មនុស្ស រំលោភផ្លូវភេទ និងដុតផ្ទះសម្បែងរបស់ពួកគេ។ ទាំងយោធា ទាំងរដ្ឋាភិបាលរបស់លោកស្រី អ៊ុងសាន ស៊ូជី បានបដិសេធការចោទប្រកាន់ពាក់ព័ន្ធការបោសសម្អាតពូជសាសន៍។
យោងតាមទីភ្នាក់ងារព័ត៌មាន AFP ក្រុមស៊ើបអង្កេតពិសេសលើកឡើងថា សកម្មភាពរបស់យោធាមិនសមស្របនឹងការគំរាមកំហែងសន្តិសុខដែលពួកគេយកជាមូលហេតុដើម្បីបើកប្រតិបត្តិការឡើយ។ បង្កើតក្នុងឆ្នាំ២០១៧ ក្រុមស៊ើបអង្កេតដែលបានសម្ភាសជនរងគ្រោះនៅទឹកដីបង់ក្លាដែស និងនៅប្រទេសផ្សេងទៀត អះអាងថា ខ្លួនមានភស្តុតាងគ្រប់គ្រាន់ដើម្បីបើកការស៊ើបអង្កេត និងកាត់ទោសមន្ត្រីជាន់ខ្ពស់យោធាមីយ៉ាន់ម៉ា។
ទោះទទួលស្គាល់ថា លោកស្រី ស៊ូជី មានអំណាចតិចតួចក្ដី ក្រុមស៊ើបអង្កេតនេះ ក៏រិះគន់រដ្ឋាភិបាលស៊ីវិលមីយ៉ាន់ម៉ាចំៗ ដ្បិតអសកម្មភាព និងបរាជ័យមិនអាចជួយក្រុមភាគតិចដែលរងគ្រោះបាន។ របាយការណ៍ខាងលើរកឃើញថា លោកស្រី ស៊ូជី មិនបានប្រើប្រាស់អំណាចតួនាទីជាប្រមុខរដ្ឋាភិបាល ឬក៏អំណាចខាងសីលធម៌ដើម្បីហាមឃាត់ការបែកធ្លាយហេតុការណ៍ឃោរឃៅរបស់យោធា។ សកម្មភាពបែបនេះបានរួមចំណែកក្នុងឧក្រិដ្ឋកម្មសាហាវយង់ឃ្នង។
ជាមួយគ្នានេះ ក្រុមស៊ើបអង្កេតរបស់អង្គការសហប្រជាជាតិ បានស្នើឲ្យក្រុមប្រឹក្សាសន្តិសុខបញ្ជូនសំណុំរឿងនេះទៅកាន់តុលាការឧក្រិដ្ឋកម្មអន្តរជាតិដើម្បីចាត់ការបន្ត ឬក៏បង្កើតអង្គជំនុំជម្រះឧក្រិដ្ឋកម្មអន្តរជាតិមួយដើម្បីដោះស្រាយសំណុំរឿងនេះ។ លើសពីនោះ គេក៏ឃើញមានសំណើឲ្យដាក់ទណ្ឌកម្មអាវុធ ឬទណ្ឌកម្មលើបុគ្គលជាក់លាក់ណាមួយដែលទទួលខុសត្រូវលើសកម្មភាពដ៏អមនុស្សធម៌លើជនភាគតិចមូស្លីមរ៉ូហ៊ីងយ៉ា៕
Tag:
UN
មីយ៉ាន់ម៉ា
មីន អ៊ុងឡាំង
© រក្សាសិទ្ធិដោយ thmeythmey.com
