អន្តរជាតិ
រដ្ឋមន្ត្រីបរិស្ថានបារាំងលាលែងពីតំណែង ព្រោះរដ្ឋាភិបាលមិនសូវខ្វល់ពីបញ្ហាបរិស្ថាន រដ្ឋមន្រ្តីបរិស្ដាន Nicolas Hulot សម្រេចចិត្តលាលែងពីតំណែង (រូបភាព AFP)
× រដ្ឋមន្ត្រីបរិស្ថានបារាំង Nicolas Hulot បានប្រកាសលាលែងពីតំណែងរបស់ខ្លួននៅថ្ងៃទី២៨ ខែសីហា។ លោក Hulot បានលើកយកមូលហេតុថា បញ្ហាបរិស្ថានហាក់មិនត្រូវគិតគូរខ្លាំងឡើយក្នុងគោលនយោបាយរដ្ឋាភិបាលបារាំង។
ជាអតីតពិធីករទូរទស្សន៍ និងជាសកម្មជនការពារបរិស្ថាន លោក Nicolas Hulot ជាសមាជិករដ្ឋាភិបាលដែលមានប្រជាប្រិយភាពរបស់រដ្ឋាភិបាលប្រធានាធិបតី អេម៉ានុយអែល ម៉ាក្រុង ។ លោក ម៉ាក្រុង ដែលជាប្រធានាធិបតីបារាំងវ័យក្មេងជាងគេ បានជ្រើសរើសអ្នកជំនាញឲ្យធ្វើជារដ្ឋមន្ត្រីតាមវិស័យនីមួយៗតួយ៉ាងលោក Hulot ជារដ្ឋមន្ត្រីបរិស្ថានតែម្ដង។
យ៉ាងណាមិញ លោក Hulot បានសម្រេចចិត្តបោះបង់តំណែងរដ្ឋមន្ត្រីរបស់ខ្លួន ព្រោះលោកហាក់ដូចជាមនុស្សម្នាក់គត់ក្នុងគណៈរដ្ឋមន្ត្រីដែលគិតគូរពីបរិស្ថាន។ យោងតាមទីភ្នាក់ងារព័ត៌មាន AFP លោក Hulot បានប្រាប់វិទ្យុបារាំង France Inter ថា លោកសម្រេចចិត្តលាលែងពីតំណែងរដ្ឋមន្ត្រីបរិស្ថានហើយ។ លោកបន្តថា លោកខកចិត្តយ៉ាងខ្លាំងចំពោះការខ្វះខាតនយោបាយក្នុងការដោះស្រាយបញ្ហាបម្រែបម្រួលអាកាសធាតុ ការពារពារជីវចម្រុះ និងការគំរាមកំហែងបរិស្ថានផ្សេងទៀត។
ចំពោះការលាលែងតំណែងនេះ លោក Hulot មិនទាន់ជូនដំណឹងផ្លូវការទៅកាន់លោកប្រធានាធិបតី ម៉ាក្រុង ឬនាយករដ្ឋមន្ត្រី Edouard Philippe ឡើយ។ ការលាលែងនេះ ពិតជាបង្កបញ្ហាឈឺក្បាលសម្រាប់លោក ម៉ាក្រុង ដែលកំពុងជួបបញ្ហាជាច្រើនស្រាប់ផង៕
Tag:
បារាំង
Nicolas Hulot
© រក្សាសិទ្ធិដោយ thmeythmey.com