ម៉ាឡេស៊ីស្វាគមន៍អ្នកទេសចរបរទេស ប៉ុន្តែទិញផ្ទះសម្បែងមិនធានាថាបានសិទ្ធិរស់នៅស្របច្បាប់ទេ

អន្តរជាតិ

ម៉ាឡេស៊ីស្វាគមន៍អ្នកទេសចរបរទេស ប៉ុន្តែទិញផ្ទះសម្បែងមិនធានាថាបានសិទ្ធិរស់នៅស្របច្បាប់ទេ

29, Aug 2018 , 4:53 pm

រូបភាព

ដោយ: ថ្មីៗ

ការិយាល័យនាយករដ្ឋមន្ត្រីម៉ាឡេស៊ីបានចេញសេចក្តីថ្លែងការណ៍មួយបញ្ជាក់ថា ម៉ាឡេស៊ីស្វាគមន៍រាល់អ្នកទេសចរទាំងអស់ទូទាំងពិភពលោករួមទាំងមកពីចិនផងដែរ។ ប៉ុន្តែលិខិតដដែលនោះក៏បញ្ជាក់ថា ចំពោះ ការទិញអចលនទ្រព្យនៅម៉ាឡេស៊ីវិញ មិនអាចធានាថាពួកគេអាចទទួលបានសិទ្ធិស្របច្បាប់ដើម្បីរស់នៅម៉ាឡេស៊ីឡើយ។

មួយថ្ងៃប៉ុណ្ណោះក្រោយ នាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់ បញ្ជាក់ថា ជនបរទេសមិនអាចទិញលំនៅដ្ឋានៅក្នុងគម្រោងទីក្រុងថ្មី Forest City នៅរដ្ឋ Johor នោះ ការិយាល័យនាយករដ្ឋមន្ត្រីបានចេញសេចក្តីថ្លែងការណ៍បញ្ជាក់ភ្លាម។

យោងតាមទូរទស្សន៍សិង្ហបុរី Channel News Asia សេចក្តីថ្លែងការណ៍នោះបានបញ្ជាក់ថា ម៉ាឡេស៊ីនៅតែស្វាគមន៍រាល់បណ្តាអ្នកទេសចរទាំងអស់លើពិភពលោករួមទាំងចិនផង ហើយក៏នៅតែបន្តស្វាគមន៍រាល់ការវិនិយោគផ្ទាល់ពីបរទេសដែលអាចនាំបច្ចេកវិទ្យាថ្មី បង្កើតការងារ និងជំរុញការអភិវឌ្ឍវិស័យឧស្សាហកម្ម។

«ម៉ាឡេស៊ីស្វាគមន៍រាល់អ្នកទេចរទាំងមកពីចិន ហើយវាមិនមានការរឹតបន្តឹងអ្វីឡើយដែលត្រូវដាក់ចេញលើអ្នកទេសចរបរទេស ដរាបណាពួកគេអាចបំពេញលក្ខខណ្ឌតម្រូវទាក់ទិននឹងច្បាប់អន្តោប្រវេសន៍ដែលដាក់ចេញដោយអាជ្ញាធរម៉ាឡេស៊ី»។ នេះជាសម្តីរបស់ការិយាយល័យនាយករដ្ឋមន្ត្រីតាមសេចក្តីថ្លែងការណ៍នោះ។

ចំណែកជុំវិញការទិញអចលនទ្រព្យនៅម៉ាឡេស៊ីវិញនោះ ការិយាល័យលោក មហាធៀ បានពន្យល់ថា វាមិនមានលក្ខខណ្ឌដែលចែងថា ការទិញអចលនទ្រព្យអាចផ្តល់សិទ្ធិរស់នៅស្របច្បាប់ដោយស្វ័យប្រវត្តិឡើយ។

«លើការទិញអចលនទ្រព្យដោយជនបរទេស ទោះជាជនជាតិណាក៏ដោយ ម៉ាឡេស៊ីបានដាក់ចេញលក្ខខណ្ឌច្បាស់លាស់ណាស់ ហើយព័ត៌មានពាក់ព័ន្ធមានផ្សាយជាសាធារណៈផង។ ការទិញអចលទ្រព្យមិនអាចធានាថាគេអាចបានសិទ្ធិរស់នៅស្របច្បាប់ឡើយ»។

ការិយាល័យនាយករដ្ឋមន្ត្រីម៉ាឡេស៊ីដដែលក៏បានផ្តល់ការណែនាំដល់អ្នកដែលចង់រស់នៅម៉ាឡេស៊ីជាអចិន្ត្រៃយ៍ឲ្យចុះឈ្មោះចូលកម្មវិធីរបស់រដ្ឋាភិបាល « Malaysia My Second Home» និងបំពេញលក្ខខណ្ឌដើម្បីបានទទួលសិទ្ធិរស់នៅស្របច្បាប់។

ត្រឡប់មកវិញ សម្តីរបស់លោក មហាធៀ ពាក់ព័ន្ធនឹងគម្រោងទីក្រុង Forest City ធ្វើឲ្យក្រុមហ៊ុនម្ចាស់គម្រោងប្រតិកម្ម និងទាមទារឲ្យមានការបកស្រាយពីខាងរដ្ឋាភិបាលផង។ គម្រោងនេះជារបស់ក្រុមហ៊ុន Country Garden និងមានភាគហ៊ុនរបស់ក្សត្រស៊ុលតង់នៅ Johor ដែរ។ វាមានគោលដៅរចនា និងកសាងទីក្រុងគិតគូរពីបរិស្ថានមួយសម្រាប់ប្រជាជនប្រាំពីរសែននាក់ ហើយការសាងសង់នេះនឹងត្រូវបញ្ចប់នៅក្នុងឆ្នាំ ២០៣៥។ មតិខ្លះយល់ថា គម្រោងនេះមានគោលដៅទាក់ទាញបណ្តាប្រជាជនដែលមានធនធាននៅក្នុងប្រទេសចិនដែរ។

ការប្រកាសថា គ្មានការអនុញ្ញាតឲ្យលក់អចលនទ្រព្យនៅគម្រោង Forest City ឲ្យជនបរទេសនេះកើតឡើងក្រោយពេលដែលលោក មហាធៀ សម្រេចលុបចោលគម្រោងសាងសង់បំពង់ឧស្ម័ន និងផ្លូវរថភ្លើងជាមួយចិនមានតម្លៃលើស ២២ពាន់លានដុល្លារដែរពេលលោកបំពេញទស្សនកិច្ចនៅចិនប៉ុន្មានសប្តាហ៍មុននោះ។ រដ្ឋាភិបាលលោក មហាធៀ សម្រេចបែបនេះទំនងជាឆ្លើយតបនឹងក្តីបារម្ភរបស់ប្រជាជនម៉ាឡេស៊ីរស់នៅរដ្ឋ Johor ជុំវិញកំណើនប្រជាជនចិនដែលសម្រុកចូលទិញផ្ទះសម្បែងដែលធ្វើឲ្យអចលនវត្ថុឡើងថ្លៃ និងមានការបំពុលបរិស្ថានផងដែរ៕