ជាតិ
សេដ្ឋកិច្ច
×![]()
ភ្នំពេញ៖ គ្រឹះស្ថានមីក្រូហិរញ្ញវត្ថុ អេអឹមខេ (AMK) ដែលជាគ្រឹះស្ថានឈានមុខមួយនៅកម្ពុជា បានប្រកាសលក់ភាគហ៊ុនរបស់ខ្លួនចំនួន ៨០ភាគរយ ទៅឲ្យធនាគារ The Shanghai Commercial & Savings Bank, Ltd. (SCSB) ដែលមានមូលដ្ឋាននៅតៃវ៉ាន់។ 
លោក គា បូរាណ អគ្គនាយកអេអឹមខេ អះអាងថា SCSB ជាដៃគូដ៏ស័ក្ដិសម សម្រាប់ពង្រឹងបន្ថែមដល់គ្រឹះស្ថានមួយនេះ។ «យើងមានជំនឿយ៉ាងមុតមាំថា ប្រព័ន្ធធនាគារមួយដែលមានភាពរឹងមាំ គឺត្រូវការម្ចាស់ភាគហ៊ុនដែលមានប្រភពទុនធំ ហើយ SCSB គឺជាធនាគារស័ក្ដិសម ដែលនាំឲ្យ អេអឹមខេ អភិវឌ្ឍន៍ទៅជំហានបន្ទាប់ទៀត»។ លោក គា បូរាណ បានថ្លែងដូចនេះក្នុងសេចក្ដីប្រកាសព័ត៌មានរបស់ AMK នៅថ្ងៃទី៣០ខែសីហា។
លោក គា បូរាណ បន្ថែមដូចនេះទៀតថា៖«នៅពេលដែលយើងមានប្រភពទុនធំ មានអ្នកជំនាញចាំជួយយើង អេអឹមខេ នឹងមានឱកាសកាន់តែច្រើនដើម្បីពង្រឹងអាជីវកម្មរបស់ខ្លួនដែលធ្វើឲ្យផលិតផល និងសេវាកម្មរបស់យើងកាន់តែមានភាពសម្បូរបែបជូនដល់អតិថិជនទូទៅ ជាពិសេសពលរដ្ឋជនបទ»។
ទោះមានការលក់ភាគហ៊ុនភាគច្រើន តែគ្រឹះស្ថានមួយនេះ នៅតែធ្វើប្រតិបត្តិការក្រោមឈ្មោះ អេអឹមខេ និងក្រុមគ្រប់គ្រងដដែល។
បើតាមរបាយការណ៍ប្រចាំឆ្នាំ២០១៧ ប្រាក់កម្ចីរបស់អេអឹមខេមានចំនួន ២០៧លានដុល្លារ កើនពី ១៥១លានដុល្លារនៅឆ្នាំ២០១៦។ ប្រាក់សន្សំមានចំនួន ១២១លានដុល្លារ កើនពី ៩០លានដុល្លារនៅឆ្នាំ២០១៦។ តែប្រាក់ចំណេញបានថយចុះមកត្រឹម ៥,២លានដុល្លារនៅឆ្នាំ២០១៧ បើធៀបនឹង ៦,៦លានដុល្លារនៅឆ្នាំ២០១៦។
ការលក់ភាគហ៊ុនទាំងស្រុង ឬមួយផ្នែក ក្នុងចំណោមគ្រឹះស្ថានមីក្រូហិរញ្ញវត្ថុនៅកម្ពុជា បានកើតឡើងជាបន្តបន្ទាប់ក្នុងរយៈពេលចុងក្រោយនេះ។ អ្នកក្នុងវិស័យនេះអះអាងថា ការប្រកួតប្រជែងច្រើនក្នុងឧស្សាហកម្ម និងពិដានអត្រាការប្រាក់ ១៨ភាគរយ គឺជាមូលហេតុមួយចំនួនដែលនាំឲ្យមានការផ្លាស់ប្ដូរនេះ៕
Tag:
AMK
មីក្រូហិរញ្ញវត្ថុ
© រក្សាសិទ្ធិដោយ thmeythmey.com
