លោក មាស សុភា មិនទាន់បានតំណែងដើមវិញ ខណៈមេទ័ព២រូបទៀត មិនទាន់បោះបង់តួនាទីតំណាងរាស្ត្រ

ជាតិ

នយោបាយជាតិ

លោក មាស សុភា មិនទាន់បានតំណែងដើមវិញ ខណៈមេទ័ព២រូបទៀត មិនទាន់បោះបង់តួនាទីតំណាងរាស្ត្រ

03, Sep 2018 , 9:39 pm

រូបភាព

ពីឆ្វេងទៅស្តាំ៖ លោក ប៉ុល សារឿន លោក គន់ គីម និងលោក មាស សុភា

ដោយ:

ភ្នំពេញ៖ ក្រៅពីលោក មាស សុភា ដែលបានបោះបង់ចោលតំណែងតំណាងរាស្ត្រនោះ គេមិនទាន់ឃើញលោក ប៉ុល សារឿន និងលោក គន់ គីម ដែលទៅឈរឈ្មោះតំណាងរាស្ត្រដូចគ្នានេះ បោះបង់វិញឡើយ។

ក្រោយសុំលាលែងពីតំណែងតំណាងរាស្ត្រនេះ លោក មាស សុភា ក៏មិនទាន់អាចវិលមកកាន់តួនាទីជាមេបញ្ជាការកងទ័ពជើងគោកឡើយ។ នេះបើតាមលោក ឈុំ សុជាតិ អ្នកនាំពាក្យក្រសួងការពារជាតិ ដែលបានប្រាប់សារព័ត៌មានថ្មីៗថា តំណែងលោក មាស សុភា នឹងលេចចេញជារូបរាង នៅក្រោយពេលរដ្ឋាភិបាលថ្មីកើតឡើង នាថ្ងៃទី៦ កញ្ញានេះ។

លោក ឈុំ សុជាតិ បានបញ្ជាក់ដូច្នេះថា៖«រង់ចាំមើលក្រោយថ្ងៃទី៦ កញ្ញា យើងនឹងឃើញទាំងអស់គ្នា»។

លោក មាស សុភា បានសុំព្យួរតំណែងជាមេបញ្ជាការកងទ័ពជើងគោក ហើយទៅឈរឈ្មោះជាបេក្ខជនតំណាងរាស្ត្រនៅមណ្ឌលខេត្តព្រះវិហារសម្រាប់នីតិកាលទី៦ ។ ហើយលោកបានសម្រេចចិត្តបោះបង់តំណែងជាតំណាងរាស្ត្រនេះវិញ ដែលលោក សួស យ៉ារ៉ា ជាអ្នកជំនួសលោក ក្រោយគណបក្សប្រជាជនឈ្នះឆ្នោត។

ប៉ុន្តែបេក្ខជនតំណាងរាស្ត្រពីររូបទៀត គឺលោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ និងលោក គន់ គីម នាយសេនាធិការចម្រុះនៃកងយោធពលខេមរភូមិន្ទ ដែលចេញទៅឈរឈ្មោះដូចលោក មាស សុភា ដែរនេះ មិនទាន់ដាក់ពាក្យសុំលាលែងពីតំណែងនៅឡើយទេ។ នេះបើតាមលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) ។

លោក សៅ សុខា ដែលបច្ចុប្បន្នជាមេបញ្ជាការនៃកងរាជអាវុធហត្ថលើផ្ទៃប្រទេស ត្រូវបានតែងតាំងជាអគ្គមេបញ្ជាការស្តីទីនៃកងយោធពលខេមរភូមិន្ទជំនួលលោក ប៉ុល សារឿន ហើយលោក ហ៊ុន ម៉ាណែត ដែលជាកូនប្រុសច្បងរបស់សម្តេច ហ៊ុន សែន ត្រូវបានតែងតាំងជាមេបញ្ជាការស្តីទីនៃកងទ័ពជើងគោកជំនួសលោក មាស សុភា និងត្រូវបានតែងតាំងជានាយសេនាធិការចម្រុះស្តីទីនៃកងយោធពលខេមរភូមិន្ទ ជំនួសលោក គន់ គីម៕